ಮೈಸವರಿ
ಮನಸ್ಸಿಗೆ ಬಸಿದ ಮಾತು
ಕೈ ತೋರಿ ಸದಾ ಪುಸ್ತಕಹೊತ್ತಿರುವ
ನಿನ್ನಜ್ಜ ಅಂಬೇಡ್ಕರ್ ಓದಿದ್ದು
ಬೀದಿಬಲ್ಬಿನಲ್ಲೆ ಅಂತೇಳಿ
ಒಂದೊಂದೆ ಪದವ ಎದೆಗಿಟ್ಟು
ಓದಲು ಅಟ್ಟುವಾಗ
ಪುಸ್ತಕ ಹಿಡಿದು ನಡೆಯುವಾಗ
ಅಜ್ಜನೆಂದರೆ ಪುಸ್ತಕ
ಓದುವುದೆಂದರೆ ಅಜ್ಜನಂತಾಗುವ ಹಂಬಲ
ಹೊತ್ತುಟ್ಟುವ ಮೊದಲೇ ಒಕ್ಕಲಿಗ್ಹೋಗಿ
ಧೂಳೆಲ್ಲವ ಕುಡಿದುಣ್ಣುವ ಅಮ್ಮನ ಜೊತೆ
ಪೋಟೊದಿಂದಲೇ ಕಣ್ಣಾಡಿಸುವ ಅಜ್ಜನ ದೃಷ್ಟಿಗೆ
ಅಲಲೆ ಅಂತಲೆ ಜೋಳಿಗೆಯೊಳಗೆ ಕುಂತಿದ್ದ
ಮುದ್ದಾದ ಕನ್ನಡ ಪದಗಳು ಕಾಲವ ಕಡೆದು
ಶಿಕ್ಷಣ ಸಂಘಟನೆ ಹೋರಾಟದ ಪದಕಟ್ಟಿದವು
ಶಾರದಾ ಪೂಜೆ ಸರಸ್ವತಿ ಪೂಜೆಯಲ್ಲಿ
ಮುಟ್ಟಿದರೆ ಮುನಿಯುವ ಮಂದಿಯೊಳಗೆ
ಅಜ್ಜನ ಹೆಸರೆತ್ತಿ ಕೈ ಮುಗಿಯಲು ಕಲಿಸಿದ
ಅಮ್ಮನ ಬೆವರು
ಪದಗಳ ನಾಡಿ ಹಿಡಿದು
ಅನ್ನಕ್ಕಿಂತ ಅಕ್ಷರಲೇಸು ಅಂದಾಗ
ಅಜ್ಜನ ಎಡೆಯಲ್ಲಿ ಅರಳಿರುವ
ಸೊಸೈಟಿ ಅಕ್ಕಿಯು ನಾಚಿಕೊಂಡಿತು
ಊರು ಬಾಯಿ ಹಲುಬಿದರು
ತಲೆಯೆತ್ತಿ ನಡೆಯಲೆಂದು
ಕತ್ತಲ ಗೂಡಲ್ಲಿ ಬೆಳಗುವ ಬಲ್ಬಿನಡಿ
ಓದಲು ಅಡರಿಕೊಂಡವನ ಎದರಿಗೆ
ಸರಿವೊತ್ತಾದರು ಅಮ್ಮ ಕುಂತಿದ್ದಾಳೆ ಅಜ್ಜನಾಗಿ
ಬೆರಳಿಗೊಂದೊಂದು ನವಿಲುಗರಿಯ ತೊಟ್ಟು