‘ಫುಲೆ’ ಎನ್ನುವ ಸುಂದರ ಸ್ವಪ್ನಗಳ ಅರಸುತ್ತ...

ಆಧುನಿಕ ಭಾರತದ ಸಾಮಾಜಿಕ ಚಳವಳಿಯ ಹರಿಕಾರರೆಂದೇ ಪ್ರಸಿದ್ಧರಾದ ಮಹಾರಾಷ್ಟ್ರದ ಜೋತಿಬಾಫುಲೆ ‘ಸತ್ಯಶೋಧಕ ಸಮಾಜ’ವನ್ನು ಕಟ್ಟಿ, ತಳಸಮುದಾಯದ ಏಳಿಗಾಗಿ ದುಡಿದು ‘ಮಹಾತ್ಮ’ ಎನ್ನಿಸಿಕೊಂಡವರು.

‘ಶಿಕ್ಷಣವೊಂದೇ ಸಮಾಜದ ಎಲ್ಲ ಕೆಡುಕುಗಳ ನಿವಾರಣೆಗೆ ಸಾಧನ’ ಎಂದು ನಂಬಿದ್ದ ಜೋತಿಬಾ – ಸಮಾಜದ ಅಕ್ಷರ ವಂಚಿತರಿಗೆ, ಶೂದ್ರಾದಿ ಹೆಣ್ಣುಮಕ್ಕಳಿಗೆ ಶಾಲೆಗಳನ್ನು ಸ್ಥಾಪಿಸಿ ಜ್ಞಾನದ ಹೆಬ್ಬಾಗಿಲನ್ನು ತೆರೆದವರು. ದೇಶದ ಮೊದಲ ಶಿಕ್ಷಕಿ ಎನಿಸಿಕೊಂಡ ಅವರ ಪತ್ನಿ ಸಾವಿತ್ರಿಬಾಯಿ ಫುಲೆಯವರ ಜೊತೆಗೂಡಿ ವರ್ಣಾಶ್ರಮ ವ್ಯವಸ್ಥೆಯ ವಿರುದ್ಧದ ಹೋರಾಟದಲ್ಲಿ ಟೊಂಕ ಕಟ್ಟಿ ನಿಂತವರು.

ಒಳ್ಳೆಯ ಶಿಕ್ಷಕ, ಸಮಾಜ ಸುಧಾರಕ, ಸ್ತ್ರೀಪರ ಸಂವೇದಿ, ಕೆಳಜಾತಿ ವರ್ಗಗಳ ಹಿತ ಚಿಂತಕ, ಎಲ್ಲಕ್ಕಿಂತ ಹೆಚ್ಚಾಗಿ ಆದರ್ಶ ಪತಿಯೂ ಆಗಿ ಸಮಾಜಕ್ಕೇ ಒಂದು ಅತ್ಯುತ್ತಮ ಮಾದರಿಯಾಗಿರುವ ಜೋತಿಬಾ ಸ್ಮರಣೆ ಸರ್ವ ಕಾಲಕ್ಕೂ ಅಗತ್ಯವಾದದ್ದು. ಪುಲೆ ಅವರು ವಾಸವಾಗಿದ್ದ ಮನೆ, ಈಗಲೂ ಹಲವು ನೆನಪುಗಳನ್ನು ಉಸುರುವಂತಿದೆ. 

 

ಮಹಾರಾಷ್ಟ್ರದ ಪುಣೆ, ಹಲವಾರು ಸಾಮಾಜಿಕ ಕ್ರಾಂತಿಕಾರಿಗಳು ಬಾಳಿ, ಬದುಕಿದ್ದ ತವರೂರು. ನಮ್ಮ ನೆಲದ ಒಳಿತಿಗಾಗಿ ದುಡಿದ ಪ್ರಾತಃಸ್ಮರಣೀಯರು ಬದುಕಿದ, ನಡೆದಾಡಿದ, ಸಮಾಜದ ಕಲ್ಯಾಣಕ್ಕಾಗಿ ಶ್ರಮಿಸಿದವರ ಕರ್ಮಭೂಮಿಯನ್ನು ನೋಡುವ ಮಹದಾಸೆಯಿಂದ ಇತ್ತೀಚೆಗೆ ಪುಣೆಗೆ ಭೇಟಿ ನೀಡಿದ್ದೆ. ಅದರಲ್ಲೂ ಭಾರತದ ಪ್ರತಿಯೊಬ್ಬ ಹೆಣ್ಣು ಮಗಳೂ ಸ್ಮರಿಸಿಕೊಳ್ಳಲೇಬೇಕಾದ ‘ಅಕ್ಷರದವ್ವ’ ಸಾವಿತ್ರಿಬಾಯಿ ಫುಲೆ ಬದುಕಿ–ಬಾಳಿದ ಪುಣ್ಯಭೂಮಿಯನ್ನು ನೋಡುವ ಹಿರಿದಾಸೆಯಿಂದ ಫುಲೆವಾಡಾದ ಜಾಡು ಹಿಡಿದು ಹೊರಟೆ.