ಮೆಟ್ಟಿಲು ಕಾಮಗಾರಿಗೆ ಮರುಜೀವ

ಈ ರೀತಿ ಸುಮಾರು 800 ಮೆಟ್ಟಿಲುಗಳನ್ನು ತಳಭಾಗದಿಂದ ಮೇಲ್ತುದಿಯವರೆಗೆ ನಿರ್ಮಿಸಲಾಗುತ್ತಿದೆ. ಒಂದೇ ಸಮನೆ ಮೆಟ್ಟಿಲುಗಳನ್ನು ಏರುವುದು ಕಷ್ಟವಾಗುತ್ತದೆ ಎಂಬ ಕಾರಣಕ್ಕೆ ಅಲ್ಲಲ್ಲಿ ವಿರಮಿಸಲು ಮಟ್ಟಸ ಜಾಗವನ್ನು ಕಲ್ಪಿಸಲಾಗುತ್ತಿದೆ.

ದೊಡ್ಡಬಳ್ಳಾಪುರದಿಂದ ಈ ಕಲ್ಲುಗಳನ್ನು ತರಿಸಿಕೊಳ್ಳ ಲಾಗುತ್ತಿದೆ. ಅದಕ್ಕೆ ಸೂಕ್ತ ಆಕಾರ ನೀಡಿ ಅಂದಗೊಳಿಸಿ ಅಳವಡಿಸುವ ಕೆಲಸಕ್ಕೆ ಸುಮಾರು ₹4,000 ದಿಂದ ₹5,000 ವೆಚ್ಚವಾಗುತ್ತಿದೆ.  ಮೆಟ್ಟಿಲಿನ ಎರಡೂ ಭಾಗಗಳಲ್ಲಿ ಕಬ್ಬಿಣದ ಗ್ರಿಲ್‌ ಅಳವಡಿಸಲಾಗುತ್ತಿದೆ. ಓಡಾಡುವ ವೇಳೆ ಆಯಾಸ ವಾದಾಗ ಮತ್ತು ಆಯತಪ್ಪದಂತೆ ಹಿಡಿದುಕೊಳ್ಳಲು ಇದು ನೆರ ವಾಗುತ್ತದೆ.

ಸಮಸ್ಯೆಗಳದ್ದೇ ಕಾರುಬಾರು: ಮಹತ್ವಾಕಾಂಕ್ಷೆಯ ಯೋಜನೆಗೆ ಸದಾ ಒಂದಿಲ್ಲೊಂದು ಅಡ್ಡಿ ಆತಂಕಗಳು ಎದುರಾಗುತ್ತಲೇ ಇವೆ. ಈ ಕಾರಣದಿಂದಲೇ ಕಾಮಗಾರಿ ವಿಳಂಬವಾಗಿದೆ ಎನ್ನುತ್ತಾರೆ ಸಹಾಯಕ ಎಂಜಿನಿಯರ್ ಚಿಕ್ಕಲಿಂಗಯ್ಯ.

ಕಾಮಗಾರಿಗೆ ಮುಖ್ಯವಾಗಿ ಎದುರಾಗಿರುವುದು ಕಾರ್ಮಿಕರ ಕೊರತೆ. ಹೆಚ್ಚು ಶ್ರಮ ಬೇಡುವ ಈ ಕೆಲಸಕ್ಕೆ ಅಧಿಕ ಕಾರ್ಮಿಕರ ಅಗತ್ಯವಿದೆ. ಆದರೆ ಸಾಕಷ್ಟು ಪ್ರಮಾಣದಲ್ಲಿ ಕಾರ್ಮಿಕರು ಸಿಗುತ್ತಿಲ್ಲ. ಕಾಂಕ್ರೀಟ್‌ ಹಾಕುವ ಕೆಲಸವನ್ನು ಸ್ಥಳೀಯ ಕೆಲಸಗಾರರಿಂದ ಮಾಡಿಸಲಾಗಿದೆ. ಕಲ್ಲಿನ ಮೆಟ್ಟಿಲನ್ನು ಹೊತ್ತು ತರುವ ಮತ್ತು ಅದನ್ನು ಕೂರಿಸುವ ಕೆಲಸಕ್ಕೆ ಆಂಧ್ರಪ್ರದೇಶದ ಕಾರ್ಮಿಕರೇ ಬೇಕಾಗಿದ್ದಾರೆ ಎಂದು ಅವರು ‘ಪ್ರಜಾವಾಣಿ’ಗೆ ತಿಳಿಸಿದರು.

ಕಲ್ಲು ಮತ್ತಿತರ ಪರಿಕರಗಳನ್ನು ಬೆಟ್ಟದ ಮೇಲ್ಭಾಗಕ್ಕೆ ಕೊಂಡೊಯ್ಯಲು ಟ್ರ್ಯಾಕ್ಟರ್‌ಗಳ ಅಗತ್ಯವಿತ್ತು. ಕಡಿದಾದ ರಸ್ತೆಯಲ್ಲಿ ಅವುಗಳನ್ನು ಸಾಗಿಸುವ ಪರಿಣತ ಚಾಲಕರು ಕಡಿಮೆ. ಅವರನ್ನೇ ಕಾಡಿ ಬೇಡಿ ಒಪ್ಪಿಸಬೇಕು. ಅಲ್ಲದೆ ಬಾಡಿಗೆಯೂ ಹೆಚ್ಚು. ಇನ್ನು ಕಾಮಗಾರಿ ನಡೆಯುವ ಸ್ಥಳಕ್ಕೆ ನೀರು ಸಾಗಿಸುವುದು ಸಹ ಸುಲಭವಲ್ಲ.

ನೀರಿನ ಕೊರತೆಯೂ ಹಲವು ಬಾರಿ ಅಡಚಣೆ ಉಂಟುಮಾಡಿದೆ. ನಡುವೆ ಅನುದಾನ ಬಿಡುಗಡೆಯಾಗದೆ ಸಂಕಷ್ಟ ಎದುರಾಗಿತ್ತು. ಬಿಸಿಲ ಝಳ ಹೆಚ್ಚಿದ್ದರಿಂದ ಕೆಲಸ ಸರಾಗವಾಗಿ ನಡೆಯುತ್ತಿರಲಿಲ್ಲ. ಈಗ ಮಳೆಬಂದರೂ ಅಡ್ಡಿಯಾಗಬಹುದು ಎಂದು ಸಮಸ್ಯೆಗಳ ಸರಮಾಲೆಯನ್ನೇ ಅವರು ತೆರೆದಿಟ್ಟರು.

ಶ್ರಾವಣಕ್ಕೆ ಕಾಮಗಾರಿ ಪೂರ್ಣ
ಚಾಮರಾಜನಗರ: ಬೆಟ್ಟದ ಮೇಲ್ಭಾಗದಲ್ಲಿರುವ ಕರಿವರದರಾಜ ಸ್ವಾಮಿ ದೇವಸ್ಥಾನದ ಬಾಗಿಲು ತೆರೆಯುವುದು ಶನಿವಾರ ಮಾತ್ರ. ಈ ದಿನ ಭಕ್ತರ ಸಂಖ್ಯೆ ಹೆಚ್ಚಿರುತ್ತದೆ. ಶ್ರಾವಣ ಮಾಸದ ಶನಿವಾರ ಅಧಿಕ ಸಂಖ್ಯೆಯಲ್ಲಿ ಭಕ್ತರ ದಂಡು ಹರಿದುಬರುತ್ತದೆ.

ಈ ವೇಳೆಗೆ ಮೆಟ್ಟಿಲು ಮತ್ತು ಗ್ರಿಲ್ ಅಳವಡಿಸುವ ಕಾರ್ಯ ಸಂಪೂರ್ಣಗೊಳ್ಳುವ ನಿರೀಕ್ಷೆಯಿದೆ.  ಅಗತ್ಯ ಪ್ರಮಾಣದ ಕಾರ್ಮಿಕರು ಲಭ್ಯವಾಗಿದ್ದಾರೆ.
ಹೀಗಾಗಿ ಕಾಮಗಾರಿ ಚುರುಕು ಗೊಳ್ಳಲಿದ್ದು, ಇನ್ನು ಎರಡು ತಿಂಗಳಲ್ಲಿ ಮಾರ್ಗ ಓಡಾಟಕ್ಕೆ ಮುಕ್ತಗೊಳ್ಳಲಿದೆ ಎಂದು ಚಿಕ್ಕಲಿಂಗಯ್ಯ ತಿಳಿಸಿದರು.

*
ಈ ಯೋಜನೆಯಿಂದ ನಷ್ಟವೇ ಹೆಚ್ಚು. ನಿರಂತರವಾಗಿ ಸಮಸ್ಯೆಗಳೂ ಎದುರಾಗುತ್ತಿವೆ. ಒಪ್ಪಿಕೊಳ್ಳಬಾರದಿತ್ತು ಎಂದೆನಿಸುತ್ತಿದೆ. ಆದರೆ, ನಷ್ಟವಾದರೂ ಗುಣಮಟ್ಟದ ಮೆಟ್ಟಿಲುಗಳನ್ನು ನಿರ್ಮಿಸಿಕೊಡುತ್ತೇನೆ.
-ಚಿಕ್ಕಲಿಂಗಯ್ಯ,
ಸಹಾಯಕ ಎಂಜಿನಿಯರ್‌