ನವದೆಹಲಿ: ‘ಆಧಾರ್‌ಗೆ ಹೆಸರು ನೋಂದಾಯಿಸುವ ವೇಳೆ ವಯಸ್ಸು ದೃಢೀಕರಣ ದಾಖಲೆಗಳನ್ನು ಸಲ್ಲಿಸುವುದು ಕಡ್ಡಾಯವಲ್ಲ. ಆದರೆ ಈಗಾಗಲೇ ನಮೂದಾಗಿರುವ ಜನ್ಮದಿನಾಂಕವನ್ನು ಬದಲಿಸಲು ಇಂತಹ ದಾಖಲೆಗಳನ್ನು ಕಡ್ಡಾಯವಾಗಿ ಸಲ್ಲಿಸಬೇಕು’ ಎಂದು ವಿಶಿಷ್ಟ ಗುರುತಿನ ಚೀಟಿ ಪ್ರಾಧಿಕಾರ ಸ್ಪಷ್ಟಪಡಿಸಿದೆ.
ಅಲಹಾಬಾದ್‌ ಸಮೀಪದ ಗ್ರಾಮದ ಪ್ರತಿ ಐವರಲ್ಲಿ ಒಬ್ಬರ ಆಧಾರ್‌ನಲ್ಲಿ, ಅವರ ಜನ್ಮ ದಿನಾಂಕ ಜನವರಿ 1 ಎಂದು ನಮೂದಾಗಿದೆ. ಇದು ಆಧಾರ್ ನೋಂದಣಿ ವೇಳೆ ಆದ ಲೋಪ ಎಂದು ಸಾಮಾಜಿಕ ಜಾಲತಾಣಗಳಲ್ಲಿ ಭಾರಿ ಟೀಕೆ ವ್ಯಕ್ತವಾಗುತ್ತಿದೆ. ಹೀಗಾಗಿ ಪ್ರಾಧಿಕಾರ ಈ ಸ್ಪಷ್ಟೀಕರಣ ನೀಡಿದೆ.
‘ಆ ಗ್ರಾಮದ ಬಹುತೇಕ ಜನರಿಗೆ, ಅವರ ಜನ್ಮ ದಿನಾಂಕವೇ ತಿಳಿದಿಲ್ಲ. ಜತೆಗೆ, ಅದನ್ನು ದೃಢೀಕರಿಸುವ ಯಾವ ದಾಖಲೆಗಳೂ ಅವರ ಬಳಿ ಇಲ್ಲ. ಅಂತಹ ಸಂದರ್ಭದಲ್ಲಿ ಅಂದಾಜಿನ ಜನ್ಮದಿನಾಂಕ ನಮೂದಿಸಲು ಅವಕಾಶವಿದೆ. ಜನ್ಮ ದಿನಾಂಕ ತಪ್ಪಾಗಿ ನಮೂದಾಗಿರುವವರು ಅಗತ್ಯ ದಾಖಲೆಗಳನ್ನು ಒದಗಿಸಿದರೆ, ಸರಿಪಡಿಸಲಾಗುವುದು’ ಎಂದು ಪ್ರಾಧಿಕಾರ ತಿಳಿಸಿದೆ.
