ರೌಡಿ ಹತ್ಯೆ: ಆರು ಮಂದಿ ಬಂಧನ

ಸೈಯದ್ ಷರೀಫ್ (33), ಸೈಯದ್ ಮೆಹಬೂಬ್ (29), ಶಾರೂಕ್ ಖಾನ್ (24), ಸೈಯದ್ ಮನ್ಸೂರ್ (30), ಮೊಹಮ್ಮದ್ ಜಾಫರ್ ಹುಸೇನ್ (34), ನವಾಜ್ ಷರೀಫ್ (19) ಎಂಬುವರನ್ನು ಬಂಧಿಸಲಾಗಿದೆ. ಮತ್ತೊಬ್ಬ ಆರೋಪಿ ವಕಾರ್ ಅಹಮ್ಮದ್ (35)  ತಲೆಮರೆಸಿಕೊಂಡಿದ್ದಾನೆ ಎಂದು ಪೊಲೀಸರು ಹೇಳಿದ್ದಾರೆ. 

 

‘ಅಯೂಬ್ ನಮಗೆ ನಾನಾ ರೀತಿಯಲ್ಲಿ ಕಿರುಕುಳ ನೀಡುತ್ತಿದ್ದ. ಆತನಿಂದ ನಿತ್ಯ ತೊಂದರೆ ಅನುಭವಿಸುವುದಕ್ಕಿಂತ ಕೊಲೆ ಮಾಡಿ ಜೈಲಿಗೆ ಹೋಗುವುದೇ ಲೇಸು ಎಂದು ನಿರ್ಧರಿಸಿ ಕೃತ್ಯ ಎಸಗಿದ್ದೇವೆ’ ಎಂದು ಆರೋಪಿಗಳು  ಹೇಳಿಕೆ ನೀಡಿದ್ದಾಗಿ ಪೊಲೀಸರು ತಿಳಿಸಿದ್ದಾರೆ. 
 

‘ಬಾಸ್’ ಎಂದು ಕರೆಯಬೇಕು:  ಬೆಳ್ಳಳ್ಳಿಯಲ್ಲಿರುವ ತನ್ನ ಅಜ್ಜಿ ಮನೆಗೆ ಆಗಾಗ್ಗೆ ಬರುತ್ತಿದ್ದ ಅಯೂಬ್, ಇಲ್ಲಿನ ಹುಡುಗರನ್ನು ಸೇರಿಸಿಕೊಂಡು ದೊಡ್ಡ ಗ್ಯಾಂಗ್ ಕಟ್ಟಿಕೊಂಡಿದ್ದ. ತನ್ನನ್ನು ಬಾಸ್ ಎಂದು ಕರೆಯಬೇಕೆಂದು ಅವರಿಗೆ ತಾಕೀತು ಮಾಡುತ್ತಿದ್ದ ಎಂದು ಪೊಲೀಸರು ತಿಳಿಸಿದರು.
 

ಆರೋಪಿ ಸೈಯದ್ ಮನ್ಸೂರ್ ಅಯೂಬ್‌ಗೆ ₹ 6 ಲಕ್ಷ ಸಾಲ ಕೊಟ್ಟಿದ್ದ. ಸಾಲ ವಾಪಸ್ ಕೇಳಿದಾಗ ‘ಆ ಹಣವನ್ನು ಖರ್ಚು ಮಾಡಲು ನೀನೇ ಇರುವುದಿಲ್ಲ’ ಎಂದು ಧಮ್ಕಿ ಹಾಕುತ್ತಿದ್ದ ಎನ್ನಲಾಗಿದೆ.  
 

‘ಸಯ್ಯದ್ ಷರೀಫ್‌ನ ಜಾಗದಲ್ಲಿದ್ದ ಶೆಡ್‌ ಕೆಡವಿ ಹಣಕ್ಕೆ ಬೇಡಿಕೆ ಇಟ್ಟಿದ್ದ ಅಯೂಬ್, ಶಾರೂಕ್ ಖಾನ್‌ಗೂ ರಿಯಲ್ ಎಸ್ಟೇಟ್‌ ವ್ಯವಹಾರದಲ್ಲಿ ಮೋಸ ಮಾಡಿದ್ದ. ಯಾವಾಗಲೂ ತನ್ನ ಸೇವೆ ಮಾಡಿಕೊಂಡಿರಬೇಕು ಎಂದು ಜಾಫರ್ ಹುಸೇನ್‌ನನ್ನು ಪೀಡಿಸುತ್ತಿದ್ದ. ಇದೇ ರೀತಿ ಉಳಿದವರಿಗೂ ಕಿರುಕುಳ ಕೊಡುತ್ತಲೇ ಇದ್ದ ಕಾರಣಕ್ಕೆ ಕೊಲೆ ಮಾಡಿದ್ದಾರೆ’ ಎಂದು ಪೊಲೀಸರು ತಿಳಿಸಿದ್ದಾರೆ.

****
ಮನೆಯಿಂದ ಕರೆಸಿ ಹತ್ಯೆ
‘ಆತನ ಕಿರುಕುಳದಿಂದ ಬೇಸತ್ತಿದ್ದ ಆರೋಪಿಗಳು ದೂರ ಉಳಿದಿದ್ದರು. ಇದರಿಂದ ಕೋಪಗೊಂಡ ಅಯೂಬ್ ಮತ್ತಷ್ಟು ಕಿರುಕುಳ ಕೊಡಲು ಮುಂದಾಗಿದ್ದ. ಸಂಘಟನೆಯೊಂದರ ಕಾರ್ಯಕ್ರಮದ ಅಂಗವಾಗಿ ಬ್ಯಾನರ್‌ಗಳನ್ನು ಕಟ್ಟುವ ವಿಚಾರಕ್ಕೂ ತಲೆಹಾಕಿ ಆರೋಪಿಗಳ ಮೇಲೆ ಹಲ್ಲೆ ನಡೆಸಿದ್ದ.

 

ಇದರಿಂದ ಕುಪಿತಗೊಂಡು ಮೇ 20 ರಂದು ಮನೆಯಿಂದ ಕರೆಸಿ ನೀಲಗಿರಿ ತೋಪಿನಲ್ಲಿ ರುಂಡ ಕತ್ತರಿಸಿ ಕೊಲೆ ಮಾಡಿದ್ದಾಗಿ ವಿಚಾರಣೆ ವೇಳೆ ಆರೋಪಿಗಳು ತಪ್ಪೊಪ್ಪಿಕೊಂಡಿದ್ದಾರೆ’ ಎಂದು ಹೇಳಿದರು.