ಏನಾದ್ರೂ ಕೇಳ್ಬೋದು

2. ನಾನು 22 ವರ್ಷದ ಯುವಕ. ನಾನು ಕೆಲವೊಮ್ಮೆ ರಾತ್ರಿ ನಿದ್ದೆಯಲ್ಲಿ ಮಾತನಾಡುತ್ತೇನೆ. ಇದಕ್ಕೆ ಕಾರಣ ತಿಳಿದಿಲ್ಲ. ಇನ್ನು ಕೆಲವೊಮ್ಮೆ ನಿದ್ದೆಗಣ್ಣಲ್ಲೇ  ಗಾಬರಿಗೊಳ್ಳುತ್ತೇನೆ. ನನಗೆ ಏನಾದರೂ ಆಗಿದೆಯೇ ಎಂದು ತುಂಬಾ ಭಯಪಡುತ್ತೇನೆ. ಈ ಸಮಸ್ಯೆಯಿಂದ ನಾನು ತುಂಬಾ ನೊಂದಿದ್ದೇನೆ. ದಯವಿಟ್ಟು ಇದಕ್ಕೆ ಪರಿಹಾರ ತಿಳಿಸಿ.
-ರಾಘು, ಊರು ಬೇಡ
ಮಕ್ಕಳು ಹಾಗೂ ಯುವಕರಲ್ಲಿ ಇದೊಂದು ಸಾಮಾನ್ಯ ಸಮಸ್ಯೆ. ಮನಸ್ಸು ಆರೆಪ್ರಜ್ಞಾವಸ್ಥೆಯಲ್ಲಿದ್ದಾಗ ತುಂಬಾ ಕ್ರಿಯಾಶೀಲವಾಗಿರುತ್ತದೆ. ಹಾಗಾಗಿ ನಿದ್ದೆಯಲ್ಲಿದ್ದಾಗ ಮಾತನಾಡುವುದು, ನಡೆದಾಡುವಂತಹ ಪ್ರಕ್ರಿಯೆಗಳನ್ನು ಮಾಡುತ್ತಾರೆ. ಕೆಲವೊಮ್ಮೆ ವಿಪರೀತ ಮಾನಸಿಕ ಒತ್ತಡದಿಂದ ಕೂಡ ನಿದ್ದೆಯಲ್ಲಿ ನಡೆದಾಡುವುದು ಅಥವಾ ಮಾತನಾಡುವುದನ್ನು ಮಾಡುತ್ತಾರೆ. ಧ್ಯಾನ ಮಾಡುವುದನ್ನು ಅಭ್ಯಾಸ ಮಾಡುವ ಮೂಲಕ ಇದಕ್ಕೆ ಪರಿಹಾರ ಕಂಡುಕೊಳ್ಳಬಹುದು. ಧ್ಯಾನ ನಿಮ್ಮ ಮನಸ್ಸನ್ನು ಶಾಂತಗೊಳಿಸಿ, ನಿಮಗೆ ಆಂತರಿಕ ಸಮಾಧಾನ ನೀಡುತ್ತದೆ. ಬೆಳಿಗ್ಗೆ ಅರ್ಧ ಗಂಟೆ, ರಾತ್ರಿ ಮಲಗುವ ಮೊದಲು 20 ನಿಮಿಷಗಳ ಕಾಲ ಧ್ಯಾನ ಮಾಡುವುದರಿಂದ ನೀವು  ನಿದ್ದೆಯಲ್ಲಿ ಮಾತನಾಡುವ ಸಮಸ್ಯೆಯಿಂದ ಪರಿಹಾರ ಕಂಡುಕೊಳ್ಳಬಹುದು. ಇದಕ್ಕಾಗಿ ವ್ಯಥೆ ಪಡಬೇಡಿ. ಒಂದು ತಿಂಗಳು ಧ್ಯಾನ ಮಾಡಿದ ಮೇಲೂ  ನಿಮ್ಮ ಸಮಸ್ಯೆಗೆ ಪರಿಹಾರ ದೊರೆಯದಿದ್ದರೆ ಆಗ ಮನಃಶಾಸ್ತ್ರಜ್ಞರನ್ನು ಭೇಟಿ ಮಾಡಿ.

3. ನಾನು ಒಬ್ಬನನ್ನು ತುಂಬಾ ಪ್ರೀತಿಸುತ್ತಿದ್ದೆ. ಅವನು ನನಗೆ  ಮೋಸ ಮಾಡಿ ದೂರವಾದ. ನಾನು ವೀಕ್ ಮೈಂಡೆಡ್‌ ಅಲ್ಲ. ಆದರೆ ಅವನಿಲ್ಲದೇ ಬದುಕಲು ಆಗುತ್ತಿಲ್ಲ. ನಾನು ಅವನ ಬಳಿ ನನ್ನ ಜೊತೆ ಇರುವಂತೆ ಬೇಡಿಕೊಂಡಿದ್ದೆ. ಅವನು ಇರಲಿಲ್ಲ. ನಾನು ಯೂನಿವರ್ಸಿಟಿ ಟಾಪರ್. ಆದರೆ ನನಗೆ ಈ ನೋವನ್ನು ಭರಿಸಲು ಆಗುತ್ತಿಲ್ಲ. ನನಗೆ ಮಾಡಿದ ಮೋಸದ ಅರಿವು ಅವನಿಗಾಗಬೇಕು ಎಂಬುದು ನನ್ನ ಬಯಕೆ.
-ಹೆಸರು ಬೇಡ, ಊರು ಬೇಡ
ಪ್ರೀತಿ ಎನ್ನುವುದು ಒಂದು ಮಧುರ ಅನುಭೂತಿ. ನಿಮ್ಮ ಭಾವನೆಗಳೊಂದಿಗೆ ಸಾಗುವ ಒಂದು ಸುಂದರ ಅನುಭವ ಪ್ರೀತಿ. ಆದರೆ ನೀವು ಪ್ರೀತಿಯ ಇತಿಮಿತಿಗಳನ್ನು ಅರ್ಥ ಮಾಡಿಕೊಳ್ಳಬೇಕು. ಒತ್ತಾಯಪೂರ್ವಕವಾಗಿ ಪ್ರೀತಿಯನ್ನು ಪಡೆದುಕೊಳ್ಳುವುದರಿಂದ  ಭವಿಷ್ಯದಲ್ಲಿ ನಿಮಗೆ ನಿರಾಸೆ ಉಂಟಾಗಬಹುದು. ಒಬ್ಬ ವ್ಯಕ್ತಿಯಿಂದ ಮೋಸ ಹೋದಾಗ ಅಥವಾ ಅವರ ಮನಸ್ಸಲ್ಲಿ ನಮ್ಮ ಬಗ್ಗೆ ನಿರುತ್ಸಾಹ  ಮೂಡಿದಾಗ, ಆ ವ್ಯಕ್ತಿಯ ಬಗ್ಗೆ ಕೋಪ ಹಾಗೂ ಬೇಸರ ಮೂಡುವುದು ಸಹಜ.

ವಾಸ್ತವವನ್ನು ಅರಿಯಿರಿ. ಇದರಿಂದ ನೀವು ನಿರಾಳರಾಗಬಹುದು. ಪ್ರೀತಿ ನಮ್ಮೊಳಗೆ ಮಧುರ ಅನುಭವ ಹಾಗೂ ಕ್ಷಮಿಸುವುದನ್ನು ಕಲಿಸುತ್ತದೆ. ಮೋಸ ಹೋಗಿದ್ದೇನೆ ಎಂಬ ಋಣಾತ್ಮಕ ಭಾವನೆಯಿಂದ ಹೊರಗೆ ಬನ್ನಿ. ಒಂದಲ್ಲ ಒಂದು ದಿನ ನಿಮ್ಮ ಹುಡುಗನಿಗೆ ನಿಮ್ಮ ಪ್ರೀತಿಯ ಆಳ ಅರಿವಾಗುತ್ತದೆ. ನೀವು ನಿಮ್ಮ ಓದು ಮತ್ತು ಭವಿಷ್ಯದತ್ತ ಗಮನ ಹರಿಸಿ. ಸದ್ಯ ನೀವು ಯಾವುದಕ್ಕೆ ಪ್ರಾಶಸ್ತ್ಯ ನೀಡಬೇಕು ಎಂಬುದನ್ನು ತಿಳಿದು ಅದರತ್ತ ಗಮನ ಕೊಡಿ. ಬದುಕು ಸುಂದರವಾಗಿರುತ್ತದೆ.