ಬಹುಭಾಷಾ ನಟಿ ಶ್ರೀದೇವಿ ಅವರಿಗೆ ತಮ್ಮ ಮಗಳು ಜಾಹ್ನವಿ ಸಿನಿಮಾದಲ್ಲಿ ನಟಿಸುವುದಕ್ಕಿಂತ ಮದುವೆಯಾಗಿ ‘ಸೆಟ್ಲ್’ ಆದರೆ ಹೆಚ್ಚು ಸಂತೋಷವಂತೆ. ಜಾಹ್ನವಿ ನಾಯಕಿಯಾಗಿ ನಟಿಸುತ್ತಿರುವ ‘ಸ್ಟೂಡೆಂಟ್ ಆಫ್ ದಿ ಇಯರ್ 2’ ಚಿತ್ರದ ಬಗೆಗೆ ಕೇಳಲಾದ ಪ್ರಶ್ನೆಗೆ ಶ್ರೀದೇವಿ ಈ ಉತ್ತರ ನೀಡಿದ್ದಾರೆ.
‘ಚಿತ್ರರಂಗ ಕೆಟ್ಟ ಕ್ಷೇತ್ರವೇನು ಅಲ್ಲ, ನಾನು ಈ ರಂಗದಿಂದಲೇ ಬೆಳಕಿಗೆ ಬಂದವಳು ಆದರೆ ತಾಯಿಯಾಗಿ ಮಗಳ ಜೀವನ ಸುಖಮಯವಾಗಿರುವುದನ್ನು ನೋಡುವುದೇ ಖುಷಿ’ ಎನ್ನುವ ಮೂಲಕ ತಾವು ಉತ್ತಮ ತಾಯಿ ಎಂಬುದನ್ನು ಸೂಚ್ಯಗೊಳಿಸಿದ್ದಾರೆ.
ತಾವು, ಮಗಳ ನಟಿಸುವ ನಿರ್ಣಯದ ಪರವಾಗಿಲ್ಲದಿದ್ದರೂ ಆಕೆಯ ಆಸೆಗೆ ಅಡ್ಡಿಬರಬಾರದೆಂದು ಶ್ರೀದೇವಿ ಅವರು ಜಾಹ್ನವಿ ಅವರ ಸಿನಿಮಾ ಪಯಣಕ್ಕೆ ಒಲ್ಲದ ಮನಸ್ಸಿನಿಂದ ಒಪ್ಪಿಗೆ ಸೂಚಿಸಿದ್ದಾರಂತೆ.
ಮಗಳ ಸಿನಿ ಬದುಕಿಗೆ ಶುಭ ಹಾರೈಸಿರುವ ಅವರು ‘ಆಕೆ ನಟಿಯಾಗಿ ಉತ್ತಮ ಕೆಲಸ ಮಾಡಿದರೆ ನನಗೆ ಹೆಮ್ಮೆಯಾಗುತ್ತದೆ’ ಎಂದಿದ್ದಾರೆ.