ಸೋಮವಾರ, 10–7–1967

ಅಸ್ಸಾಂ ಮಾತುಕತೆ ವಿಫಲ: ‘ಪಟಾಸ್ಕರ್‌ ಸೂತ್ರ’ ಜಾರಿಗೆ ಕಾಂಗ್ರೆಸ್‌ ಪಟ್ಟು
ನವದೆಹಲಿ, ಜುಲೈ 9– ಅಸ್ಸಾಂ ಮರು ರೂಪಿಸುವ ಉದ್ದೇಶದಿಂದ ಹಮ್ಮಿಕೊಂಡಿದ್ದ ಎರಡು ದಿನಗಳ ಸಮ್ಮೇಳನ ನಿರೀಕ್ಷಿತ ಫಲ ನೀಡದೆ ವಿಫಲಗೊಂಡಿದೆ.
ಹಿಲ್‌ ಲೀಡರ್ಸ್‌ ಕಾನ್ಫರೆನ್ಸ್‌ನ ಪ್ರತಿನಿಧಿಗಳು ಸಮ್ಮೇಳನವನ್ನು ಬಹಿಷ್ಕರಿಸುವ ನಿರ್ಧಾರ ಕೈಗೊಂಡಿದ್ದರಿಂದಾಗಿ 11 ಸದಸ್ಯರ ಉಪಸಮಿತಿಗೆ ಮುಖಭಂಗವಾದಂತಾಗಿದೆ.
‘ಇಂದು ನಡೆದ ಸಭೆಯಲ್ಲಿ ಯಾವುದೇ ತೀರ್ಮಾನ ಕೈಗೊಳ್ಳಲು ಸಾಧ್ಯವಾಗಲಿಲ್ಲ’ ಎಂದು ಉಪಸಮಿತಿಯ ಅಧ್ಯಕ್ಷರೂ ಆಗಿರುವ ಯೋಜನಾ ಸಚಿವ ಶ್ರೀ ಅಶೋಕ್‌ ಮೆಹ್ತಾ ತಿಳಿಸಿದರು.
ಇಂದು ಸುಮಾರು ಎರಡು ಗಂಟೆಗಳ ಕಾಲ ನಡೆದ ಅಧಿವೇಶನದಲ್ಲಿ ಕಾಂಗ್ರೆಸ್‌ ಮುಖಂಡರು ಪಟಾಸ್ಕರ್‌ ಆಯೋಗದ ಸಲಹೆಗಳನ್ನು ಜಾರಿ ಮಾಡಲೇಬೇಕು ಎಂಬ ನಿಲುವಿಗೆ ಅಂಟಿಕೊಂಡಿದ್ದರು.