ಜಿಲ್ಲಾಸ್ಪತ್ರೆಯಲ್ಲಿ ಹೆರಿಗೆ: ತಾಯಿ ಸಾವು

ಕವಿತಾ ಅವರು ತಾಲ್ಲೂಕಿನ ಕೃಷ್ಣಶೆಟ್ಟಿ ಮತ್ತು ಸುಶೀಲಮ್ಮ ದಂಪತಿ ಪುತ್ರಿ. ಹಾಸನದ ರಘು ಅವರೊಂದಿಗೆ ಕವಿತಾ ವಿವಾಹವಾಗಿತ್ತು. ಜಿಲ್ಲಾಸ್ಪತ್ರೆಯ ಶವಾಗಾರದ ಬಳಿ ಸಂಬಂಧಿಕರ ಆಕ್ರಂದನ ಮುಗಿಲು ಮುಟ್ಟಿತ್ತು.

ಸಂಬಂಧಿಕ ಜಗದೀಶ್‌ ಅವರು ಸುದ್ದಿಗಾರರೊಂದಿಗೆ ಮಾತನಾಡಿ, ‘ಕವಿತಾಗೆ ತಡರಾತ್ರಿ ಹೆರಿಗೆ ನೋವು ಕಾಣಿಸಿಕೊಂಡಿತ್ತು. ಶನಿವಾರ ನಸುಕಿನ 4 ಗಂಟೆ ವೇಳೆಗೆ ಜಿಲ್ಲಾಸ್ಪತ್ರೆಗೆ ಕರೆತಂದೆವು. 5 ಗಂಟೆ ಹೊತ್ತಿಗೆ ದಾಖಲು ಮಾಡಿ ಕೊಂಡರು. 6.30ರ ಹೊತ್ತಿಗೆ ಶುಶ್ರೂಷಕಿ ಯೊಬ್ಬರು ಗಂಡು ಮಗು ಜನಿಸಿದೆ ಎಂದು ತಿಳಿಸಿದರು. ಆದರೆ, ತಾಯಿಯ ಬಗ್ಗೆ ಯಾವುದೇ ಮಾಹಿತಿ ನೀಡಲಿಲ್ಲ’ ಎಂದರು.

‘ತಾಯಿಯನ್ನು ಜಿಲ್ಲಾಸ್ಪತ್ರೆ ವೈದ್ಯರೇ ಅನುರಾಧಾ ಆಸ್ಪತ್ರೆಗೆ ಒಯ್ದಿದ್ದಾರೆ. ತಾಯಿ ಮೃತಪಟ್ಟಿರುವುದನ್ನು ಮಧ್ಯಾಹ್ನ ತಿಳಿಸಿದ್ದಾರೆ. ಹೆರಿಗೆ ವೇಳೆ ತಾಯಿ ಮೃತಪಟ್ಟಿರುವ ಶಂಕೆ ಇದೆ. ಹೆರಿಗೆಗೆ ದಾಖಲಿಸಿಕೊಂಡಿದ್ದ ವೈದ್ಯೆ ಡಾ.ಉಮಾ ಅವರು ಸಂಪರ್ಕಕ್ಕೆ ಸಿಗುತ್ತಿಲ್ಲ. ಮಗು ವನ್ನು ತೀವ್ರ ನಿಗಾ ಘಟಕದಲ್ಲಿ ಇಟ್ಟಿರುವು ದಾಗಿ ಹೇಳಿದ್ದಾರೆ. ಮಗುವನ್ನೂ ನಮಗೆ ತೋರಿಸಿಲ್ಲ’ ಎಂದು ದೂರಿದರು.

ಜಿಲ್ಲಾಸ್ಪತ್ರೆಯ ಜಿಲ್ಲಾ ಶಸ್ತ್ರಚಿಕಿತ್ಸಕ ಡಾ.ದೊಡ್ಡಮಲ್ಲಪ್ಪ ‘ಪ್ರಜಾವಾಣಿ’ ಯೊಂದಿಗೆ ಮಾತನಾಡಿ, ‘ಹೆರಿಗೆ ನಂತರ ರಕ್ತಸ್ರಾವ ಹೆಚ್ಚಾಗಿದೆ. ಜಿಲ್ಲಾಸ್ಪತ್ರೆಯಲ್ಲಿ ವೆಂಟಿಲೇಷನ್‌ ಸೌಕರ್ಯ ಇಲ್ಲದಿದ್ದರಿಂದ ಮಹಿಳೆಯನ್ನು ಖಾಸಗಿ ನರ್ಸಿಂಗ್‌ ಹೋಮ್‌ಗೆ ಒಯ್ಯಲಾಗಿದೆ’ ಎಂದರು.

**

ಅಂತರ ಪಾಲಿಸಿಲ್ಲ: ಡಾ.ದೊಡ್ಡಮಲ್ಲಪ್ಪ
ಕವಿತಾ ಅವರಿಗೆ ಇದು ಎರಡನೇ ಹೆರಿಗೆ. ವರ್ಷದ ಹಿಂದೆ ಸಿಜೇರಿಯನ್‌ ಹೆರಿಗೆಯಾಗಿದೆ. ಒಮ್ಮೆ ಸಿಜೇರಿಯನ್‌ ಆದ ನಂತರ ಇನ್ನೊಂದು ಮಗುವಿಗೆ ಕನಿಷ್ಠ ಮೂರು ವರ್ಷ ಅಂತರ ಕಾಯ್ದುಕೊಳ್ಳಬೇಕು. ಈ ದಂಪತಿ ಅದನ್ನು ಪಾಲಿಸಿಲ್ಲ. ಹೆರಿಗೆ ನಂತರ ರಕ್ತಸ್ರಾವ ಹೆಚ್ಚಾಗಿ, ಚಿಕಿತ್ಸೆಗೆ ಸ್ಪಂದಿಸದೆ ಮೃತಪಟ್ಟಿದ್ದಾರೆ’ ಎಂದು  ಡಾ.ದೊಡ್ಡಮಲ್ಲಪ್ಪ ತಿಳಿಸಿದರು.