‘ಹಿಂದೂ ಧರ್ಮದಿಂದ ಲಿಂಗಾಯತ ಸಮಾಜ ಪ್ರತ್ಯೇಕವಾಗಬಾರದು’

‘ಜಾತಿ ವ್ಯವಸ್ಥೆಯನ್ನು ಒಪ್ಪಲಿ, ಬಿಡಲಿ ಶಿವ ಭಕ್ತರೆಲ್ಲ ಹಿಂದೂಗಳೇ ಎಂಬುದು ನಿಸ್ಸಂಶಯ. ಕ್ರೈಸ್ತರು, ಮುಸಲ್ಮಾನರು ರಾಷ್ಟ್ರ ವ್ಯಾಪಿಯಾಗಿ ಸಂಘಟಿತರಾಗಿದ್ದಾರೆ. ಉಳಿದವರು ಸಂಘಟಿತರಾಗಲು ಹಿಂದೂ ಧರ್ಮ ಒಂದೇ ನೆಲೆಯಾಗಿದೆ. ಆದ್ದರಿಂದ ಅದನ್ನು ದುರ್ಬಲಗೊಳಿಸುವ ಪ್ರಯತ್ನ ಆಗಬಾರದು. ಲಿಂಗಾಯತರ ಪ್ರತ್ಯೇಕತೆಯ ಮಾತು ಬೇಡ ಎಂಬುದು ಕಳಕಳಿಯ ಮನವಿ’ ಎಂದು ಹೇಳಿದರು.

ವೀರಶೈವ ಸಮಾಜವೂ ವಿಘಟನೆಗೊಳ್ಳಬಾರದು: ‘ಸಂಪ್ರದಾಯ, ನಂಬಿಕೆ ಮತ್ತು ಆಚರಣೆಯ ಪ್ರತ್ಯೇಕತೆಯ ಕಾರಣ ವೀರಶೈವ ಸಮಾಜವೂ ವಿಘಟನೆಯಾಗಬಾರದು. ಶ್ರೀ ವೈಷ್ಣವರಲ್ಲಿ ಸಹ ತೆಂಗಲೆ, ವಡಗೆಲೆ ಎಂಬ ಭೇದವಿದೆ. ಸ್ಮಾರ್ತರಲ್ಲಿ ಶೈವ, ಭಾಗವತ ಮುಂತಾದ ಸಂಪ್ರದಾಯವಿದೆ. ಮುಸಲ್ಮಾನರಲ್ಲಿಯೂ ಶಿಯಾ, ಸುನ್ನಿ ಎಂಬ ಭೇದವಿದೆ. ವೀರಶೈವರಲ್ಲಿಯೂ ಭೇದಗಳಿದ್ದರೂ ಎಲ್ಲರೂ ವೀರಶೈವ ಅಥವಾ ಲಿಂಗಾಯತರ ಹೆಸರಿನಲ್ಲಿ ಒಂದಾಗಬೇಕು’ ಎಂದು ಪೇಜಾವರ ಶ್ರೀಗಳು ಸಲಹೆ ನೀಡಿದರು.
‘ಯಾವುದೇ ರಾಜಕೀಯ ಉದ್ದೇಶದಿಂದ ನಾನು ಈ ಮಾತು ಹೇಳುತ್ತಿಲ್ಲ. ಹಿಂದೂ ಸಂಘಟನೆಗೆ ಯಾವುದೇ ರೀತಿಯಿಂದಲೂ ಧಕ್ಕೆ ಆಗಬಾರದು ಎಂಬ ಕಾರಣಕ್ಕೆ ಒಂದಾಗಿರಿ ಎಂದು ಹೇಳುತ್ತಿದ್ದೇನೆ’ ಎಂದರು.

ಕೂಡಲಸಂಗಮ ಎಂದರೆ ಶಿವ: ‘ಬಸವಣ್ಣನವರು ವಚನಗಳಲ್ಲಿ ಬಳಸಿರುವ ‘ಕೂಡಲ ಸಂಗಮ’ ಎಂದರೆ ಶಿವ ಎಂಬುದಾಗಿದೆ. ಬಸವಣ್ಣನವರ ಕೆಲವು ವಚನಗಳಲ್ಲಿ ವೇದಗಳ ಉಲ್ಲೇಖ ಇದೆ. ‘ಮಾದಾರ ಚೆನ್ನಯ್ಯ ಶಿವ ದೀಕ್ಷೆ ಪಡೆದಾಗ ವೇದ ನಡುಗಿತು’ ಎಂಬ ಮಾತನ್ನೂ ಸಹ ಬಸವಣ್ಣ ಹೇಳಿದ್ದಾರೆ. ಶಿವ ದೀಕ್ಷೆ ಪಡೆದ ನಂತರ ಎಲ್ಲರೂ ಸಮಾನರು ಎಂಬುದು ಅವರ ನಿಲುವಾಗಿತ್ತು. ವೇದಗಳನ್ನು ಅವರು ಒಪ್ಪಿದ್ದರು ಅಥವಾ ಇಲ್ಲ ಎಂಬುದರ ಬಗ್ಗೆಯೇ ಈಗ ಚರ್ಚೆ ನಡೆಯುತ್ತಿದೆ. ಪ್ರತ್ಯೇಕ ಧರ್ಮದ ಪ್ರಸ್ತಾವನೆ ಬೇಡ ಎಂದು ಸರ್ಕಾರಕ್ಕೂ ತಿಳಿಸಲಾಗುತ್ತದೆ. ಮಠಾಧೀಶರೊಂದಿಗೂ ಮಾತನಾಡಲಾಗುವುದು’ ಎಂದರು.

‘ವೀರಶೈವ ಲಿಂಗಾಯತ ಸಮಾಜದ ಆಂತರಿಕ ವಿಷಯವಾಗಿದ್ದು ಆ ಬಗ್ಗೆ ಮಾತನಾಡುವುದು ಅಷ್ಟು ಸಮಂಜಸವಲ್ಲ. ಆದರೂ ವೀರಶೈವ ಸಮಾಜ ಮತ್ತು ಮಠಾಧಿಪತಿಗಳೊಂದಿಗೆ ದೀರ್ಘ ಕಾಲದ ಸಂಪರ್ಕ, ಸೌಹಾರ್ದ ಮತ್ತು ಆತ್ಮೀಯತೆ ಇರುವುದರಿಂದ ನನ್ನ ಅಭಿಪ್ರಾಯವನ್ನು ಹೇಳುತ್ತಿದ್ದೇನೆ. ಯಾರೂ ಸಹ ಅನ್ಯತಾ ಭಾವಿಸಬಾರದು’ ಎಂದು ಸ್ವಾಮೀಜಿ ಸ್ಪಷ್ಟಪಡಿಸಿದರು.
*
ಕನ್ಯಾಕುಮಾರಿಯಿಂದ ಹಿಮಾಲಯದ ವರೆಗೆ ಶಿವನೇ ಪರದೈವ ಎಂದು ನಂಬುವ ಹಿಂದೂಗಳಿರುವಾಗ, ಶಿವ ಭಕ್ತರಾದ ಲಿಂಗಾಯತರು ಮಾತ್ರ ಹಿಂದೂಗಳಲ್ಲ ಎಂದು ಹೇಳುವುದು ಹೇಗೆ?
ವಿಶ್ವೇಶತೀರ್ಥ ಸ್ವಾಮೀಜಿ,
ಪೇಜಾವರ ಮಠ