ಶ್ರಾವಣ ಆರಂಭ: ಹೂವಿನ ಬೆಲೆ ಏರಿಕೆ!

ಶ್ರಾವಣ ಆರಂಭಕ್ಕೂ ಮುನ್ನಾ ದಿನವೇ ಭಾನುವಾರ ಭೀಮನ ಅಮಾವಾಸ್ಯೆಯಂದು ಹೂವಿನ ಬೆಲೆ ಏರಿಕೆಯ ಮುನ್ಸೂಚನೆ ಸಿಕ್ಕಿತ್ತು. ಸೋಮವಾರ ಶ್ರಾವಣ ಆರಂಭವಾಗಿದ್ದು ವಿವಿಧ ಹೂವುಗಳಿಗೆ ಬೇಡಿಕೆ ಹೆಚ್ಚಾಗಿದೆ. ಕೆ.ಜಿ. ಬಿಡಿ ಮಲ್ಲಿಗೆ ಹೂವಿನ ಬೆಲೆ ₹ 180ಕ್ಕೆ ಏರಿದೆ. ಮೊದಲು ₹ 150ಕ್ಕೆ ಸಿಗುತ್ತಿತ್ತು. ಮಾರು ಮಲ್ಲಿಗೆ  ₹ 50ಕ್ಕೆ ಮಾರಾಟವಾಗುತ್ತಿದೆ.

ಕೆ.ಜಿ.ಕಾಕಡ ಕೂಡ ₹ 160ಕ್ಕೆ ಏರಿದೆ. ಮಾರು ₹ 40ಕ್ಕೆ ಸಿಗುತ್ತಿದೆ. ಸೇವಂತಿಗೆ ಹೂವಿನ ಕೊರತೆ ಉಂಟಾಗದ್ದು ಅಂಗಡಿಗಳಲ್ಲಿ ಹೆಚ್ಚಾಗಿ ಕಾಣುತ್ತಿಲ್ಲ. ಬೆಲೆಯೂ ಹೆಚ್ಚಾಗಿದ್ದು ಮಾರು ₹ 50ಕ್ಕೆ ಮಾರಾಟವಾಗುತ್ತಿದೆ. ಹಾರದ ಬೆಲೆಯಲ್ಲೂ ಕೊಂಚ ಹೆಚ್ಚಾಗಿದ್ದು ₹ 50ರಿಂದ 150ರವರೆಗೆ ಮಾರಾಟವಾಗುತ್ತಿದೆ.

‘ಶ್ರಾವಣ ಮಾಸದಲ್ಲಿ ಹೂವಿನ ಬೆಲೆ ಹೆಚ್ಚಳವಾಗುವುದು ಸಹಜ. ಶ್ರಾವಣದಲ್ಲಿ ಕೆಲವರು ಮದುವೆ ಮಾಡುವುದರಿಂದ ಹೂವಿನ ಬೆಲೆ ಇನ್ನೂ ಹೆಚ್ಚಾಗಲಿದೆ’ ಎಂದು ಹೂವಿನ ವ್ಯಾಪಾರಿ ಅಜಿತ್‌ ಹೇಳಿದರು.

ತರಕಾರಿ ಬೆಲೆ ಸ್ಥಿರ: ಟೊಮೆಟೊ ಹೊರತುಪಡಿಸಿ ತರಕಾರಿ ಬೆಲೆಯಲ್ಲಿ ಹೆಚ್ಚೇನೂ ವ್ಯತ್ಯಾಸ ಕಂಡುಬಂದಿಲ್ಲ. ಮೂಲಂಗಿ ಬೆಲೆಯಲ್ಲಿ ಕಳೆದ ವಾರಕ್ಕಿಂತ ಈ ಬಾರಿ ₹ 10 ಕಡಿಮೆಯಾಗಿದೆ. ಕಳೆದವಾರ ಕೆ.ಜಿ ಮೂಲಂಗಿ ₹ 30 ಇತ್ತು, ಈ ವಾರ ₹ 20ಕ್ಕೆ ಮಾರಾಟವಾಗುತ್ತಿದೆ.

ಕೆ.ಜಿ. ಕ್ಯಾರೆಟ್‌, ಬೀಟರೂಟ್‌ ₹ 40ಕ್ಕೆ ಸಿಗುತ್ತಿದೆ. ಬೀನ್ಸ್‌ ಬೆಲೆಯಲ್ಲಿ ವ್ಯತ್ಯಾಸವಾಗಿಲ್ಲ. ಕೆ.ಜಿ.ಬೀನ್ಸ್‌ ₹ 40ಕ್ಕೆ ಮಾರಾಟವಾಗುತ್ತಿದೆ. ಕೆ.ಜಿ. ದೊಣಮೆಣಸಿನಕಾಯಿ ₹ 40, ಈರೇಕಾರಿ ₹ 40, ಪಡುವಲಕಾಯಿ ₹ 20, ತೊಂಡೆಕಾಯಿ ₹ 20, ಬದನೆಕಾಯಿ ₹ 30ಕ್ಕೆ ಮಾರಾಟವಾಗುತ್ತಿವೆ.

ಪಾತಾಳಕ್ಕಿಳಿದ ಕೊತ್ತಂಬರಿ ಬೆಲೆ!
ರಮ್ಜಾನ್‌ ಮಾಸದಲ್ಲಿ ಒಂದು ಕಟ್ಟು ಕೊತ್ತಂಬರಿ ಸೊಪ್ಪಿನ ಬೆಲೆ ₹ 60ಕ್ಕೇರಿತ್ತು. ಆದರೆ ಈ ವಾರ ಸೊಪ್ಪಿನ ಬೆಲೆ ಪಾತಾಳಕ್ಕಿಳಿದಿದೆ. ₹ 2–3ಕ್ಕೆ ಒಂದು ಕಟ್ಟು ಕೊತ್ತಂಬರಿ ಸೊಪ್ಪು ಸಿಗುತ್ತಿದೆ.‘ಸಂಜೆಯ ವೇಳೆಯಲ್ಲಿ ತರಕಾರಿ ಮಾರುಕಟ್ಟೆಗೆ ಬಂದರೆ ರೂಪಾಯಿಗೊಂದು ಕಟ್ಟು ಕೊತ್ತಂಬರಿ ಮಾರುತ್ತಿದ್ದಾರೆ. ಸೊಪ್ಪು ತಿನ್ನುವವರಿಗೆ ಇದು ಸಕಾಲ’ ಎಂದು ಗ್ರಾಹಕರಾದ ತಿಮ್ಮೇಗೌಡ ಹೇಳಿದರು.

ಹುರಳಿ, ರಾಗಿ ದುಬಾರಿ: ಕಳೆದ ವಾರಕ್ಕಿಂತ ಹುರಳಿ ಹಾಗೂ ರಾಗಿ ಬೆಲೆಯಲ್ಲಿ ಹೆಚ್ಚಳವಾಗಿದೆ. ಕಳೆದ ವಾರ ಕೆ.ಜಿ ಹುರಳಿ ₹ 60 ಇತ್ತು. ಈ ವಾರ ₹ 70ಕ್ಕೆ ಏರಿದೆ. ರಾಗಿ ಬೆಲೆಯಲ್ಲೂ ಹೆಚ್ಚಳ ಕಂಡುಬಂದ್ದು ಕೆ.ಜಿ.ರಾಗಿ ₹ 30ಕ್ಕೆ ಮಾರಾಟವಾಗುತ್ತಿದೆ.

‘ಜಿಲ್ಲೆಯಲ್ಲಿ ಮಳೆ ಕೊರತೆಯಾಗಿದ್ದು ಇನ್ನೂ ಸರಿಯಾಗಿ ಬಿತ್ತನೆ ಮಾಡಿಲ್ಲ. ಹೀಗಾಗಿ ರೈತರು ಮನೆಯಲ್ಲಿ ಬಿತ್ತನೆ ಬೀಜವಾಗಿ ರಾಗಿ ದಾಸ್ತಾನು ಇಟ್ಟು ಕೊಂಡಿರುವ ಕಾರಣ ಕೊರತೆಯುಂಟಾಗಿ ಬೆಲೆ ಕೊಂಚ ಏರಿದೆ’ ಎಂದು ಧಾನ್ಯ ವ್ಯಾಪಾರಿ ವಿನಯ್‌ ತಿಳಿಸಿದರು.

₹ 60ಕ್ಕಿಳಿದ ಟೊಮೆಟೊ!
ಕಳೆದ ವಾರಕ್ಕೆ ಹೋಲಿಸಿದರೆ ಈ ವಾರ ಟೊಮೆಟೊ ಬೆಲೆಯಲ್ಲಿ ₹ 20 ಇಳಿದಿದೆ. ₹ 80ಕ್ಕೆ ಮಾರಾಟವಾಗುತ್ತಿದ್ದ ಕೆ.ಜಿ.ಟೊಮೆಟೊ ಈ ವಾರ ₹ 60ಕ್ಕೆ ಬಂದು ನಿಂತಿದೆ.

‘ಮಂಡ್ಯ ಜಿಲ್ಲೆಯಲ್ಲಿ ವರ್ತಕರು ಟೊಮೆಟೊವನ್ನು ತಮಿಳುನಾಡಿಗೆ ಕಳುಹಿಸುತ್ತಿದ್ದಾರೆ. ಹೀಗಾಗಿ ನಮ್ಮ ಸಣ್ಣ ವ್ಯಾಪಾರಿಗಳಿಗೆ ಟೊಮೆಟೊ ಸಿಗುತ್ತಿಲ್ಲ. ಒಂದು ಕ್ರೇಟ್‌ ಬೆಲೆ ₹ 1300ಕ್ಕಿಂತಲೂ ಹೆಚ್ಚಾಗಿದೆ’ ಎಂದು ಟೊಮೆಟೊ ವ್ಯಾಪಾರಿ ರಮೇಶ್‌ ತಿಳಿಸಿದರು.