ಫೋಟೊಗಳ ಮೇಲೆ ಅಥವಾ ಕಲಾಚಿತ್ರಗಳ ಮೇಲೆ ಅಥವಾ ಕೆಳಗೆ ವಿಚಿತ್ರ ವಾಕ್ಯಗಳನ್ನು ಅಥವಾ ಉಕ್ತಿಗಳನ್ನು ಬರೆದು ಹಂಚುವುದನ್ನು ನೋಡಿರುತ್ತೀರಿ. ಇವು ಮುಖ್ಯವಾಗಿ ಸಾಮಾಜಿಕ ಜಾಲತಾಣ ಮತ್ತು ವಾಟ್ಸ್‌ಆ್ಯಪ್ ಮೂಲಕ ಹಂಚಲ್ಪಡುತ್ತವೆ. ಇವುಗಳಿಗೆ ಮೀಮ್ ಎಂಬ ಹೆಸರಿದೆ. ಮೀಮ್‌ಗಳನ್ನು ತಯಾರಿಸಲು ಹಲವು ಕಿರುತಂತ್ರಾಂಶಗಳು (ಆ್ಯಪ್) ಲಭ್ಯವಿವೆ. ಬಹುತೇಕ ಕನ್ನಡ ಮೀಮ್‌ಗಳು ಕನ್ನಡ ಪಠ್ಯವನ್ನು ಇಂಗ್ಲಿಷ್ ಲಿಪಿಯಲ್ಲಿ ಬರೆದಿರುತ್ತವೆ –ಅಂದರೆ ಕಂಗ್ಲಿಷ್ ಮೀಮ್‌ಗಳು. ಕನ್ನಡ ಪಠ್ಯವು ಕನ್ನಡ ಲಿಪಿಯಲ್ಲಿದ್ದರೇ ಒಳ್ಳೆಯದಲ್ಲವೇ? ಅಂದರೆ ನಮಗೆ ಬೇಕು ಕನ್ನಡದಲ್ಲೇ ಮೀಮ್ ತಯಾರಿಸುವ ಕಿರುತಂತ್ರಾಂಶ. ಅದೂ ಲಭ್ಯವಿದೆ. ಗೂಗಲ್ ಪ್ಲೇ ಸ್ಟೋರಿನಲ್ಲಿ Kannada Image Editor - Troll Meme Text Creator ಎಂದು ಹುಡುಕಿ ಅಥವಾ bit.ly/gadgetloka288 ಜಾಲತಾಣಕ್ಕೆ ಭೇಟಿ ನೀಡಿ ಇದನ್ನು ಪಡೆಯಬಹುದು. ಇದು ಮೀಮ್ ತಯಾರಕ ಮಾತ್ರವಲ್ಲ. ಹಲವು ರೀತಿಯಲ್ಲಿ ಚಿತ್ರಗಳನ್ನು ಬದಲಾವಣೆ ಮಾಡಬಹುದು ಮತ್ತು ಪಠ್ಯ ಸೇರ್ಪಡೆ ಮಾಡಬಹುದು. ಇದರಲ್ಲಿ ಕನ್ನಡ ಯುನಿಕೋಡ್‌ನಲ್ಲೇ ಪಠ್ಯ ಸೇರಿಸಬಹುದು.
