ಹೋಂವರ್ಕ್‌ನ ಭೂತವೂ ಮಕ್ಕಳ ಭವಿಷ್ಯವೂ!
ಪಕ್ಕದ ಮನೆಯ ಮೂರು ವರ್ಷದ ಹುಡುಗ ರವಿತೇಜ ಪ್ರತಿದಿನವೂ ನಮ್ಮ ಮನೆಗೆ ಬರುತ್ತಿದ್ದ. ಇತ್ತೀಚೆಗೆ ಅವನು ಬರುವುದು ಅಪರೂಪವಾಯಿತು. ಬಂದರೆ ಅದೂ ಸಂಜೆ ಮಾತ್ರ ಯಾವಾಗಲೋ ಒಮ್ಮೆ ಬರುತ್ತಿದ್ದ. ಯಾಕೆ ಹೀಗೆ ಎಂದು ವಿಚಾರಿಸಿದಾಗ, ‘ಅವನು ಶಾಲೆಗೆ ಹೋಗುತ್ತಿದ್ದಾನೆ, ಸಂಜೆ ಹೋಂವರ್ಕ್ ಮಾಡುತ್ತಾನೆ’ ಎಂಬ ಉತ್ತರ ಬಂತು. ‘ಅರೆ! ಅವನಿಗಿನ್ನೂ ಮೂರು ವರ್ಷ ತುಂಬಿಲ್ಲವಲ್ಲ. ಅದ್ಯಾಕೆ ಶಾಲೆಗೆ ಸೇರಿಸಿದಿರಿ’ ಎಂದು ಆತನ ಪಾಲಕರನ್ನು ಪ್ರಶ್ನಿಸಿದಾಗ, ‘ಇಲ್ಲ ಸರ್, ಮನೆಯಲ್ಲಿ ಅವನ ಕಾಟ ಹೆಚ್ಚಾಗಿದೆ. ಅದಕ್ಕೆ ಶಾಲೆಗೆ ಹಾಕಿದ್ದೇವೆ’ ಎಂದು ಉತ್ತರಿಸಿದರು. ನನಗೆ ತುಂಬಾ ಬೇಸರವೆನಿಸಿತು. ‘ನೀವು ಮಾಡಿದ್ದು ಸರಿಯಿಲ್ಲವೇನೋ ಎನಿಸುತ್ತಿದೆ. ಯೋಚನೆ ಮಾಡಿ ನೋಡಿ’ ಎಂದು ಹೇಳಿಬಂದೆ.
ಮೊಟಕಾದ ಬಾಲ್ಯ: ಇದು ಕೇವಲ ಒಬ್ಬ ಬಾಲಕ/ಬಾಲಕಿಯ ಕಥೆಯಲ್ಲ. ಎಲ್ಲಾ ಮಕ್ಕಳ ಬಾಲ್ಯವೂ ಹೀಗೇ ಕಮರುತ್ತಿದೆ. ಆಡಬೇಕಾದ ವಯಸ್ಸಿನಲ್ಲಿ ಮಕ್ಕಳನ್ನು ಶಾಲೆಗೆ ಸೇರಿಸಿ ಪಂಜರದ ಪಕ್ಷಿಗಳನ್ನಾಗಿ ಮಾಡುತ್ತಿದ್ದೇವೆ. ಎಲ್ಲದರಲ್ಲೂ ನಮ್ಮ ಮಕ್ಕಳು ಮುಂದಿರಬೇಕೆಂಬ ಬಯಕೆಯಿಂದ ಪೈಪೋಟಿಗೆ ಇಳಿಸಿದ್ದೇವೆ. ಇದರಿಂದ ಅವರ ಬಾಲ್ಯ ಮೊಟಕಾಗುತ್ತಿದೆ. ಮಗುವಿನಲ್ಲಿ ಮಾನಸಿಕ, ಬೌದ್ಧಿಕ ಹಾಗೂ ಸಾಮಾಜಿಕ ಬೆಳವಣಿಗೆಗಳು ಕುಂಠಿತವಾಗುತ್ತಿವೆ. ಮಗು ಸಾಮಾಜೀಕರಣಗೊಳ್ಳುವ ಬದಲು ಸಮಾಜಕ್ಕೆ ಕಂಟಕವಾಗುತ್ತಿದೆ.
ಒತ್ತಾಯವೇ ಒತ್ತಡ: ನಮ್ಮ ಮಗುವಿಗೆ ಸ್ವಲ್ಪ ಜಾಸ್ತಿ ಹೋಂವರ್ಕ್ ಕೊಡಿ- ಇದು ಮಕ್ಕಳನ್ನು ಶಾಲೆಗೆ ಕಳಿಸುವ ಬಹುತೇಕ ಪಾಲಕರ ಬೇಡಿಕೆ. ಹೆಚ್ಚು ಹೆಚ್ಚು ಹೋಂವರ್ಕ್ ಮಾಡಿದರೆ ಮಗು ಬುದ್ಧಿವಂತ ಆಗುತ್ತದೆ ಎಂಬುದು ಅವರ ಅನಿಸಿಕೆಯಾಗಿದೆ. ಇನ್ನು ಕೆಲವು ಪಾಲಕರು ಸಂಜೆ ಟಿ.ವಿ. ನೋಡುವುದಕ್ಕಾಗಿ ಮಕ್ಕಳಿಗೆ ಹೆಚ್ಚು ಹೋಂವರ್ಕ್ ಕೊಡಲು ಕೇಳುತ್ತಾರೆ. ಹೋಂವರ್ಕ್ ನೆಪದಲ್ಲಿ ಮಗುವನ್ನು ಟಿ.ವಿ.ಯಿಂದ ದೂರವಿಡುವ ಹುನ್ನಾರ. ಕೆಲ ಮಕ್ಕಳು ಹೋಂವರ್ಕ್ ಮಾಡಿಲ್ಲವೆಂಬ ಕಾರಣಕ್ಕೆ ಶಾಲೆಗೆ ಹೋಗಲು ಹಿಂದೇಟು ಹಾಕುತ್ತಾರೆ. ಇಂತಹ ಸಂದರ್ಭಗಳಲ್ಲಿ ಪಾಲಕರು ಮಕ್ಕಳ ಕೈಹಿಡಿದು ಶಾಲೆಯವರೆಗೂ ತೆರಳಿ ಶಿಕ್ಷಕರಿಗೆ ಸಮಜಾಯಷಿ ಹೇಳಿ ಬರುವುದನ್ನು ಕಾಣುತ್ತೇವೆ. ಈ ಎಲ್ಲಾ ತಾಪತ್ರಯಗಳನ್ನು ತಪ್ಪಿಸಲು ಬಹುತೇಕ ಸಂದರ್ಭಗಳಲ್ಲಿ ಪಾಲಕರೇ ಮಕ್ಕಳ ಹೋಂವರ್ಕ್ ಮಾಡುವುದುಂಟು.
‘ಯಾಕೋ ಹೋಂವರ್ಕ್ ಮಾಡಿಲ್ಲ’ ಎಂದು ಶಾಲೆಯಲ್ಲಿ, ‘ಹೋಂವರ್ಕ್ ಮಗಿಸುವವರೆಗೆ ಊಟವೂ ಇಲ್ಲ, ನಿದ್ದೆಯೂ ಇಲ್ಲ’ ಎಂದು ಮನೆಯಲ್ಲಿ ಮಗುವನ್ನು ಪೀಡಿಸುವುದು ಸಹಜವಾಗಿಬಿಟ್ಟಿದೆ. ಹೋಂವರ್ಕ್ ಕುರಿತ ಇಂತಹ ಹೇಳಿಕೆಗಳು ಮಗುವಿನ ಮೇಲೆ ಕೆಟ್ಟ ಪರಿಣಾಮ ಬೀರುತ್ತವೆ ಎಂಬುದು ಪಾಲಕರಿಗೆ ತಿಳಿಯುವುದು ಇನ್ನೂ ಯಾವಾಗ? ಹೋಂವರ್ಕ್ ಕೇವಲ ಬರವಣಿಗೆಗೆ ಮಾತ್ರ ಸೀಮಿತವಾಗಿರುವುದೇ ದುರಂತ. ಕಲಿಕೆಯ ಅಭ್ಯಾಸ/ರೂಢಿಯ ಹೆಸರಿನಲ್ಲಿ ಶಾಲೆಗಳಲ್ಲಿ ಪುಟಗಟ್ಟಲೆ ನೀಡುವ ಹೋಂವರ್ಕ್‌ನಿಂದ ಮಕ್ಕಳ ಕಲಿಕೆಯೇನೂ ಉನ್ನತ ಮಟ್ಟಕ್ಕೆ ಏರಿಲ್ಲ.
.jpg)
ಹೋಂವರ್ಕ್ ಎನ್ನುವುದು ಮಕ್ಕಳಿಗೆ ಮತ್ತು ಪಾಲಕರಿಗೆ ದುಃಸ್ವಪ್ನ ಮತ್ತು ಹಿಂಸೆಯಾಗಿದೆ. ಪ್ರೌಢಶಿಕ್ಷಣ ಹಂತದಲ್ಲಾದರೆ ಮಕ್ಕಳಿಗೆ ಮಾನಸಿಕ ಗಟ್ಟಿತನ ಸಿದ್ಧಿಸಿರುತ್ತದೆ. ನಾವು ಯಾಕೆ ಕಲಿಯಬೇಕು? ಶಿಕ್ಷಣದಿಂದ ನಮಗಾಗುವ ಲಾಭಗಳೇನು? ಎಂಬುದರ ಬಗ್ಗೆ ಅರಿವು ಇರುತ್ತದೆ. ಆದರೆ ಪ್ರಾಥಮಿಕ ಹಂತದ ಅದರಲ್ಲೂ ಕಿರಿಯ ಪ್ರಾಥಮಿಕ ಹಂತದ ಮಕ್ಕಳಿಗೆ ನಾವು ಯಾಕೆ ಕಲಿಯಬೇಕೆಂಬ ಬಗ್ಗೆ ಕಿಂಚಿತ್ತೂ ಅರಿವು ಇರುವುದಿಲ್ಲ. ಅಂತಹ ಮಕ್ಕಳಿಗೆ ನೀಡುವ ಹೋಂವರ್ಕ್ ಒಂದು ರೀತಿಯ ಹಿಂಸೆಯಲ್ಲವೇ? ಇನ್ನು ಶಾಲಾಪೂರ್ವ ಶಿಕ್ಷಣದ ಹೆಸರಿನಲ್ಲಿ ನಡೆಯುತ್ತಿರುವ ಎಲ್.ಕೆ.ಜಿ, ಯು.ಕೆ.ಜಿ, ಪ್ಲೇಗ್ರೂಪ್, ಪ್ಲೇಹೋಂಗಳ ಮಕ್ಕಳ ಪಾಲಿಗಂತೂ ಹೋಂವರ್ಕ್ ಎನ್ನುವುದು ಕೊರಳ ಉರುಳು ಎನ್ನಬಹುದು.
ಹೋಂವರ್ಕ್ ಏಕೆ ಬೇಕು?: ಮಕ್ಕಳು ಶಾಲೆಯಲ್ಲಿ ಕಲಿತ ಕಲಿಕಾಂಶಗಳನ್ನು ಮನನ ಮಾಡಿಕೊಳ್ಳಲು ಹೋಂವರ್ಕ್ ಅಗತ್ಯ. ಮಕ್ಕಳು ಸ್ವತಂತ್ರವಾಗಿ ಕಲಿಯುವಂತೆ ಮಾಡುವುದು ಹೋಂವರ್ಕ್‌ನ ಉದ್ದೇಶ. ಹೋಂವರ್ಕ್ ಇಂದಿನ ಮತ್ತು ನಾಳಿನ ತರಗತಿಗಳ ಸ್ನೇಹ ಸೇತುವೆಯಾಗಬೇಕು. ಅಂದರೆ ಇಂದಿನ ತರಗತಿಗಳಲ್ಲಿ ಕಲಿತ ಕಲಿಕಾಂಶಗಳನ್ನು ಮನನ ಮಾಡಿಕೊಂಡು ನಾಳಿನ ತರಗತಿಗಳಿಗೆ ಮಗು ಪೂರ್ವ ತಯಾರಿ ನಡೆಸಬೇಕು. ನಾಳೆ ನಾನು ಏನೇನು ಕಲಿಯಬಹುದು ಎಂದು ಮಗು ಊಹಿಸುವಂತಾಗಬೇಕು. ಹೋಂವರ್ಕ್ ಎಂಬುದು ಕಲಿಕಾಂಶ/ಪರಿಕಲ್ಪನೆಯ ಮುಂದಿನ ಭಾಗಕ್ಕೆ ಮಗುವನ್ನು ಕರೆದೊಯ್ಯುವ ಮಾನಸಿಕ ಸಿದ್ಧತೆ.
ಹೋಂವರ್ಕ್‌ನ ವ್ಯಾಪಕ ಲಾಭಗಳು ಹೀಗಿವೆ. ಮಕ್ಕಳಲ್ಲಿ ಉತ್ತಮ ಓದಿನ ಹವ್ಯಾಸ ಬೆಳೆಸುತ್ತದೆ. ಶಾಲೆ ಮತ್ತು ಶಿಕ್ಷಣದ ಬಗೆಗಿನ ಸಕಾರಾತ್ಮಕತೆಯನ್ನು ಇಮ್ಮಡಿಗೊಳಿಸುತ್ತದೆ. ಶಾಲೆ/ತರಗತಿ ಹೊರಗೂ ಸಹ ಸಂತೋಷದಿಂದ ಕಲಿಯಬಹುದು ಎಂಬುದನ್ನು ಮಕ್ಕಳಿಗೆ ತಿಳಿಸುತ್ತದೆ. ಶಾಲೆ ಮತ್ತು ಕುಟುಂಬದ ನಿತ್ಯ ಸಂವಹನದ ಸೇತುವೆ. ಮಗು ಶಾಲೆ ಮತ್ತು ಶಾಲೆಯ ಹೊರಗೆ ಹೇಗೆ ಕಲಿಯುತ್ತಿದೆ ಎಂಬುದನ್ನು ಪಾಲಕರು ತಿಳಿಯಲು ಸಹಕಾರಿ.
ಯಾವ ಹಂತಕ್ಕೆ ಎಷ್ಟು ಹೋಂವರ್ಕ್?: ಇಂದು ಮಗುವಿನ ಆಹಾರ, ಆರೋಗ್ಯ ಮತ್ತು ನಿದ್ರೆಗಳಿಗಿಂತ ಹೋಂವರ್ಕ್‌ಗೇ ಮೊದಲ ಆದ್ಯತೆಯಾಗಿದೆ. ಹೋಂವರ್ಕ್ ಕಡ್ಡಾಯವಾಗಿ ಬೇಕು ಎನ್ನುವುದಾದರೆ ಯಾವ ತರಗತಿಗೆ ಎಷ್ಟು ಹೋಂವರ್ಕ್ ಬೇಕು ಎಂಬುದು ಚರ್ಚೆಯ ವಿಷಯವಾಗಿದೆ. ಮಗು ನಿನಗೆ ಹೋಂವರ್ಕ್ ಬೇಕೇ ಎಂದು ಕಿರಿಯ ಪ್ರಾಥಮಿಕ ಹಂತದ ಮಕ್ಕಳನ್ನು ಕೇಳಿದರೆ ಬೇಡ ಎನ್ನುತ್ತಾರೆ. ಪ್ರತೀ ಮಗುವೂ ಅಂದರೆ ಉನ್ನತ ಮತ್ತು ಕಡಿಮೆ ಕಲಿಕಾ ಹಂತದಲ್ಲಿರುವ ಪ್ರತೀ ಮಗುವೂ ಹೋಂವರ್ಕ್‌ನ್ನು ದ್ವೇಷಿಸುತ್ತದೆ ಎಂದು ಬೋಸ್ಟನ್‌ನ ಮಾನವ ಅಭಿವೃದ್ದಿ ಮತ್ತು ಮನಶಾಸ್ತ್ರಜ್ಞರಾದ ಪ್ರೊ.ಜಾನೈನ್ ಬೆಮ್‌ಪೆಚಾಟ್ ಅಭಿಪ್ರಾಯ ಪಡುತ್ತಾರೆ. ಹೋಂವರ್ಕ್ ಮಗುವಿನ ಮಾನಸಿಕ ಸ್ಥಿಮಿತಕ್ಕೆ ಅನುಗುಣವಾಗಿ ಇರಬೇಕೆಂಬುದು ಶಿಕ್ಷಣ ತಜ್ಞರು ಮತ್ತು ಮನೋವೈದ್ಯರ ವಾದ.
ಪಾಲಕರ ಪಾತ್ರ: ಮಗುವಿನ ಹೋಂವರ್ಕ್ ನಿರ್ವಹಣೆಯಲ್ಲಿ ಪಾಲಕರ ಪಾತ್ರ ಮಹತ್ತರವಾದುದು. ಮಗು ಪರಿಕಲ್ಪನೆಗಳನ್ನು ಅರ್ಥಮಾಡಿಕೊಳ್ಳಲು ಪಾಲಕರು ಭಾವನಾತ್ಮಕ ಬೆಂಬಲ ನೀಡಬೇಕೇ ವಿನಾ ಸಮಸ್ಯೆಯನ್ನು ಪರಿಹರಿಸುವುದಲ್ಲ. ಪಾಲಕರ ಅಲ್ಪ ಸಹಾಯ ಪಡೆದು ಹೋಂವರ್ಕ್ ಮಾಡುವುದು ಕಲಿಕಾರ್ಥಿಯ ಜವಾಬ್ದಾರಿ. ಮಕ್ಕಳೊಂದಿಗೆ ಸಂಭಾಷಣೆ ನಡೆಸುತ್ತ ಅವರೊಂದಿಗೆ ಪ್ರೀತಿಯ ಮಾತುಗಳನ್ನಾಡುತ್ತ ಹೋಂವರ್ಕ್ ಮಾಡುವಂತೆ ಪ್ರೇರೇಪಿಸಬೇಕು. ಆದಷ್ಟೂ ಅವರ ಆವೇಶಗಳನ್ನು ತಗ್ಗಿಸಬೇಕು. ಶಾಲೆಯಲ್ಲಿ ಮಗುವಿನ ಕಲಿಕಾ ಸಾಮರ್ಥ್ಯಗಳ ಕುರಿತು ಆಗಾಗ್ಗೆ ಶಿಕ್ಷಕರೊಂದಿಗೆ ಮಾತನಾಡಬೇಕು. ಮಗು ಉತ್ತಮ ಕಲಿಕಾ ಪ್ರದರ್ಶನ ನೀಡಿದಾಗ ಶ್ಲಾಘಿಸಬೇಕು. ಮನೆಯಲ್ಲಿ ಚೆನ್ನಾಗಿ ಓದಿದ್ದರಿಂದ ಇಷ್ಟು ಉತ್ತಮ ಪ್ರದರ್ಶನ ತೋರಲು ಸಾಧ್ಯವಾಯಿತು ಎಂದು ಪ್ರೋತ್ಸಾಹಿಸಬೇಕು.
ಮಗುವಿನ ಹೋಂವರ್ಕ್‌ಗಾಗಿ ನಿತ್ಯವೂ ನಿಗದಿತ ಸಮಯವನ್ನು ಮೀಸಲಿಡಬೇಕು. ಅದು ಹೋಂವರ್ಕ್ ವೇಳೆ ಎಂದು ನಿಗದಿಯಾಗಬೇಕು. ಈ ಸಮಯದಲ್ಲಿ ಒಂದೊಂದು ಹಂತ/ವಿಷಯವನ್ನು ಮಗು ಪೂರ್ಣಗೊಳಿಸಿದಾಗ ಕೊಂಚ ಬಿಡುವು ನೀಡಬೇಕು. ಇದು ಮಗುವಿನ ಅವಧಾನವನ್ನು ಹೆಚ್ಚಿಸುತ್ತದೆ. ಪಾಲಕರು ಮಗುವಿಗೆ ಮಾರ್ಗದರ್ಶಕರಾಗಬೇಕೇ ಹೊರತು ಅವರೇ ಜವಾಬ್ದಾರಿ ಹೋರಬಾರದು.
ಮಗು ಶಾಲಾ ಕೆಲಸದಲ್ಲಿ ನಿರಾಸಕ್ತಿ ತೋರುತ್ತಿದ್ದರೆ ಮತ್ತು ಇತರರಿಂದ ಪಡೆದ ನೋಟ್ಸ್‌ಗಳನ್ನು ಕಾಪಿ ಮಾಡುತ್ತಿದ್ದರೆ ಆ ಮಗು ಒತ್ತಡದಲ್ಲಿದೆ ಎಂದರ್ಥ. ಅಂತಹ ಸಂದರ್ಭಗಳಲ್ಲಿ ಪಾಲಕರು ಶಿಕ್ಷಕರೊಂದಿಗೆ ಮಾತನಾಡಿ ಮಗುವಿನ ಒತ್ತಡಕ್ಕೆ ಕಾರಣ ಕಂಡುಕೊಂಡು ನಿವಾರಿಸಲು ಪ್ರಯತ್ನಿಸಬೇಕು. ಇಲ್ಲದಿದ್ದರೆ ಮಗುವಿನ ಭವಿಷ್ಯ ಕಗ್ಗಂಟಾಗುತ್ತದೆ. ಹೋಂವರ್ಕ್ ಮಾಡಲು ಮಗುವಿಗೆ ಸ್ಥಳಾವಕಾಶ ಮಾಡಿಕೊಡಿ. ಅದು ಮಗು ಸ್ನೇಹಿ ವಾತಾವರಣದಿಂದ ಕೂಡಿರಬೇಕು. ಮಗು ಅತೀ ಕಡಿಮೆ ಅವಧಾನದ ಮಟ್ಟ ಹೊಂದಿರುತ್ತದೆ. ಹೋಂವರ್ಕ್ ಮುಗಿಸಲು ಹೆಚ್ಚು ಸಮಯ ಬಳಸಿಕೊಂಡರೆ ಮಗುವಿನ ಮೆದುಳಿನಲ್ಲಿ ಒತ್ತಡ ಏರ್ಪಡುತ್ತದೆ ಎಂಬುದನ್ನು ಮನಶಾಸ್ತ್ರಜ್ಞರು ಒತ್ತಿ ಹೇಳುತ್ತಾರೆ.
ಶಿಕ್ಷಕರ ಪಾತ್ರ: ಹೋಂವರ್ಕ್ ನೀಡುವಲ್ಲಿ ಶಿಕ್ಷಕರ ಕಾಳಜಿ ಮತ್ತು ಬದ್ಧತೆ ಎದ್ದು ಕಾಣುತ್ತದೆ. ಸೃಜನಶೀಲ ಶಿಕ್ಷಕರು ನೀಡುವ ಹೋಂವರ್ಕ್ ವಿಭಿನ್ನ ಹಾಗೂ ವೈಶಿಷ್ಟ್ಯದಿಂದ ಕೂಡಿರುತ್ತದೆ. ಮಗುವೂ ಕೂಡಾ ಸೃಜನಶೀಲತೆ ಬೆಳೆಸಿಕೊಳ್ಳಲು ಬೇಕಾದ ವಾತಾವರಣ ಸೃಷ್ಟಿಸುತ್ತದೆ. ಹಾಗಾಗಿ ಶಿಕ್ಷಕರು ಕೇವಲ ನೇರ ಪ್ರಶ್ನೆಗಳನ್ನು ನೀಡದೇ ಅನ್ವಯಿಕ ಪ್ರಶ್ನೆಗಳನ್ನೂ ನೀಡಬೇಕು. ಹೋಂವರ್ಕ್ ಮಗುವಿನಲ್ಲಿ ಒತ್ತಡ ಹೇರುವಂತಿರಬಾರದು. ಬದಲಾಗಿ ಮಗು ಖುಷಿಯಾಗಿ ಮಾಡಿ ಮುಗಿಸುವಂತಿರಬೇಕು. ಇಷ್ಟೇನಾ? ಇನ್ನಷ್ಟು ಇದ್ದಿದ್ದರೆ ಚೆನ್ನಾಗಿತ್ತು ಎನ್ನುವಂತಿರಬೇಕು. ಅಂದರೆ ಮಗುವಿನ ಭೌತಿಕ, ಮಾನಸಿಕ, ಶೈಕ್ಷಣಿಕ ಸ್ಥಿತಿಯನ್ನು ಅರ್ಥೈಸಿಕೊಂಡು ಅದನ್ನು ಉತ್ತಮಪಡಿಸಲು ಪೂರಕವಾಗುವಂತೆ ಹೋಂವರ್ಕ್ ನೀಡಬೇಕು. ಕೆಲಸದ ಒತ್ತಡದ ನೆಪ ಹೇಳಿ ಕೇವಲ ರೈಟ್ ಮಾರ್ಕ್ ಹಾಕುವುದಲ್ಲ. ಕಡ್ಡಾಯವಾಗಿ ಪರಿಶೀಲಿಸಬೇಕು. ಮಕ್ಕಳು ಮಾಡಿದ ತಪ್ಪನ್ನು ಕೆಂಪು ಮಸಿಯಿಂದ ಸೊನ್ನೆ ಸುತ್ತುವ ಬದಲು ಅದನ್ನು ಸರಿಪಡಿಸಲು ಇರುವ ಮಾರ್ಗವನ್ನು ತಿಳಿಸಬೇಕು. ಹೋಂವರ್ಕ್‌ನಲ್ಲಿ ಬರವಣಿಗೆಗೆ ನೀಡುವಷ್ಟು ಪ್ರಾಮುಖ್ಯವನ್ನು ಓದುವ ಮತ್ತು ಮಾತನಾಡುವ ಕ್ಷೇತ್ರಕ್ಕೂ ನೀಡಬೇಕು. ಆಗ ಮಾತ್ರ ಅದಕ್ಕೊಂದು ನಿರ್ದಿಷ್ಟತೆ ಸಿಗುತ್ತದೆ. ಹೀಗೆ ಮಾಡುವುದರಿಂದ ಹೋಂವರ್ಕ್ ಒತ್ತಡರಹಿತವಾಗಿ ಹ್ಯಾಪಿವರ್ಕ್ ಆಗುವುದರಲ್ಲಿ ಮತ್ತು ಮಕ್ಕಳ ಭವಿಷ್ಯವೂ ಉತ್ತಮವಾಗುವುದರಲ್ಲಿ ಸಂದೇಹವೇ ಇಲ್ಲ. ಅಲ್ಲವೇ?
ಹೋಂವರ್ಕ್ ಹೇಗಿರಬೇಕು?: ಮಕ್ಕಳ ಕಲಿಕೆಯಲ್ಲಿ ಪಾಲಕರ ಸಹಭಾಗಿತ್ವ ಅಗತ್ಯ. ಆದರೆ ಇದನ್ನು ತಪ್ಪಾಗಿ ಅರ್ಥೈಸಿಕೊಂಡ ಪಾಲಕರು ಕಲಿಯಲು ಮಗುವಿನ ಮೇಲೆ ಮಾತ್ರ ಒತ್ತಡ ಹೇರುತ್ತಾರೆ. ಬದಲಾಗಿ ಮಗು ಚೆನ್ನಾಗಿ ಕಲಿಯಲು ತಾವೇನು ಮಾಡಬೇಕು? ಎಂದು ಬಹುತೇಕರು ಯೋಚಿಸುವುದೇ ಇಲ್ಲ. ಮಗುವಿನ ಸ್ಥಾನದಲ್ಲಿ ನಿಂತು ಕೊಂಚ ಯೋಚಿಸಿದರೆ ಒಂದಿಷ್ಟು ವಿಭಿನ್ನ ಆಯ್ಕೆಗಳು ದೊರೆಯುತ್ತವೆ. ಅವುಗಳನ್ನು ಕೆಳಗಿನಂತೆ ಪಟ್ಟಿ ಮಾಡಬಹುದು.
* ಮಗುವಿನ ದೈಹಿಕ, ಮಾನಸಿಕ ಮತ್ತು ಬೌದ್ದಿಕ ವಯಸ್ಸಿಗನುಗುಣವಾಗಿ ಹೋಂವರ್ಕ್ ನೀಡುವುದು/ನೀಡಿಸುವುದು.
* ಹೋಂವರ್ಕ್‌ನಿಂದ ಮಗುವಿನಲ್ಲಿ ಸಂತಸದಾಯಕ ಕಲಿಕೆ ಮೂಡಬೇಕು.
* ಹೋಂವರ್ಕ್ ಶಾಲಾ ಕಲಿಕೆಗಿಂತ ವಿಭಿನ್ನವಾಗಿದ್ದು, ಒತ್ತಡ ರಹಿತವಾಗಿರಬೇಕು.
* ಹೋಂವರ್ಕ್‌ನಿಂದ ಮಗು ಹೊಸತನ ಕಲಿಯುವಂತಿರಬೇಕು.
* ಹೋಂವರ್ಕ್ ಮಗುವಿನಲ್ಲಿ ಸೃಜನಶೀಲತೆಯನ್ನು ಉತ್ತೇಜಿಸುವಂತಿರಬೇಕು.
* ಹೋಂವರ್ಕ್ ಎಂಬುದು ತರಗತಿ ಹೊರಗಿನ ಕಲಿಕೆಯನ್ನು ಶಾಲಾ ಕೊಠಡಿಗೆ ಅನ್ವಯಿಸುವಂತಿರಬೇಕು.
* ಹೋಂವರ್ಕ್‌ನಿಂದ ಮಗು ತನಗೆ ಬೇಕಾದ ಜ್ಞಾನವನ್ನು ತಾನೇ ಕಟ್ಟಿಕೊಳ್ಳಲು ಸಶಕ್ತವಾಗಬೇಕು.
ತಾಜಾ ಸುದ್ದಿಗಾಗಿ ಪ್ರಜಾವಾಣಿ ಟೆಲಿಗ್ರಾಂ ಚಾನೆಲ್ ಸೇರಿಕೊಳ್ಳಿ | ಪ್ರಜಾವಾಣಿ ಆ್ಯಪ್ ಇಲ್ಲಿದೆ: ಆಂಡ್ರಾಯ್ಡ್ | ಐಒಎಸ್ | ನಮ್ಮ ಫೇಸ್‌ಬುಕ್ ಪುಟ ಫಾಲೋ ಮಾಡಿ.