ತಮಿಳುನಾಡಿನಲ್ಲಿ ಮತ್ತೆ ಬಿಕ್ಕಟ್ಟು ಆಡಳಿತದ ಮೇಲೆ ಕೆಟ್ಟ ಪರಿಣಾಮ

ಇಷ್ಟಕ್ಕೂ, ಭಿನ್ನಮತೀಯ ಚಟುವಟಿಕೆಯನ್ನು ಪೋಷಿಸುತ್ತ ಈ ಎಲ್ಲ ಆಟಗಳನ್ನು ಆಡಿಸುತ್ತಿರುವವರು ಈಗ ಬೆಂಗಳೂರು ಜೈಲಿನಲ್ಲಿ ಇರುವ ಪಕ್ಷದ ಪ್ರಧಾನ ಕಾರ್ಯದರ್ಶಿ ವಿ.ಕೆ. ಶಶಿಕಲಾ. ಅವರ ನಿಕಟ ಸಂಬಂಧಿಯೂ ಆದ ಪಕ್ಷದ ಉಪ ಪ್ರಧಾನ ಕಾರ್ಯದರ್ಶಿ ಟಿ.ಟಿ.ವಿ. ದಿನಕರನ್‌ ಹೊರಗೆ ನಿಂತು ದಾಳ ಉರುಳಿಸುತ್ತಿದ್ದಾರೆ. ಅಂದರೆ, ತಮಿಳುನಾಡಿನ ರಾಜಕಾರಣದಲ್ಲಿ ತನ್ನನ್ನು ಮೂಲೆಗುಂಪು ಮಾಡಲು ಸಾಧ್ಯವಿಲ್ಲ ಎಂದು ಶಶಿಕಲಾ ಅವರು ಕಂಬಿಯ ಹಿಂದೆ ಇದ್ದುಕೊಂಡೇ ಸಾಬೀತು ಮಾಡಲು ಹೊರಟಿದ್ದಾರೆ. ಜಯಾ ನೆರಳಿನಲ್ಲಿಯೇ ಬೆಳೆದ ಅವರು ಜಯಾ ಸಾವಿನ ಬೆನ್ನಲ್ಲೇ ಇಡೀ ಪಕ್ಷವನ್ನು ತಮ್ಮ ವಶಕ್ಕೆ ತೆಗೆದುಕೊಳ್ಳಲು ಹವಣಿಸಿದ್ದಲ್ಲದೇ ಮುಖ್ಯಮಂತ್ರಿ ಕುರ್ಚಿ ಮೇಲೆ ಕುಳಿತುಕೊಳ್ಳಲು ಶತಾಯಗತಾಯ ಪ್ರಯತ್ನ ಮಾಡಿದ್ದರು. ಅದಕ್ಕಾಗಿ ರೆಸಾರ್ಟ್ ರಾಜಕಾರಣಕ್ಕೂ ಕೈಹಾಕಿ ಶಾಸಕರನ್ನು ಹಿಡಿದಿಟ್ಟುಕೊಂಡಿದ್ದರು. ಇಷ್ಟೆಲ್ಲ ನಡೆದರೂ ಜನಾಭಿಪ್ರಾಯ ಅವರ ಪರವಾಗಿರಲಿಲ್ಲ. ಪ್ರಕರಣವೊಂದರಲ್ಲಿ ಜೈಲು ಸೇರಬೇಕಾಯಿತು. ಮುಖ್ಯಮಂತ್ರಿ ಹುದ್ದೆ ಕನಸಾಗಿಯೇ ಉಳಿದರೂ ಜೈಲಿನಿಂದಲೇ ರಿಮೋಟ್‌ ಕಂಟ್ರೋಲ್‌ ಮೂಲಕ ನಿಯಂತ್ರಿಸುವ ಪ್ರಯತ್ನವನ್ನೇನೂ ಅವರು ಕೈಬಿಟ್ಟಂತಿಲ್ಲ. ಸರ್ಕಾರದ ಬುಡವನ್ನೇ ಅಲ್ಲಾಡಿಸುವಷ್ಟು ಶಕ್ತಿವಂತರಾಗಿದ್ದಾರೆ. ಪಳನಿಸ್ವಾಮಿ ಮತ್ತು ಪನ್ನೀರಸೆಲ್ವಂ ಬಣ ವಿಲೀನದಿಂದ ಅವರು ಮತ್ತು ಅವರ ಬೆಂಬಲಿಗರು ವಿಚಲಿತರಾದಂತಿದೆ. ಶಶಿಕಲಾ ಮತ್ತು ದಿನಕರನ್‌ ಅವರನ್ನೇ ಪಕ್ಷದ ಎಲ್ಲ ಹುದ್ದೆಗಳಿಂದ ಉಚ್ಚಾಟಿಸುವುದು ಕೂಡ ವಿಲೀನದ ಷರತ್ತುಗಳಲ್ಲಿ ಒಂದಾಗಿತ್ತು. ಅದೀಗ ಏನಾಗುತ್ತದೋ ಕಾದು ನೋಡಬೇಕಿದೆ.

ಇದು ಆಡಳಿತ ಪಕ್ಷದೊಳಗಿನ ಬಂಡಾಯ ಎಂದು ಸುಮ್ಮನಾಗುವಂತೆಯೂ ಇಲ್ಲ. ಏಕೆಂದರೆ ಇದರಿಂದ ಸೃಷ್ಟಿಯಾಗುವ ಅಭದ್ರತೆ, ಅನಿಶ್ಚಯ ಯಾವ ರಾಜ್ಯಕ್ಕೂ ಒಳ್ಳೆಯದಲ್ಲ. ಇದು ಆಡಳಿತದ ಮೇಲೆ ಪ್ರತಿಕೂಲ ಪರಿಣಾಮ ಬೀರುತ್ತದೆ. ಅಧಿಕಾರಿಗಳನ್ನು ನಿಯಂತ್ರಣದಲ್ಲಿ ಇಟ್ಟುಕೊಳ್ಳಲು, ಅವರಿಂದ ಕೆಲಸ ಮಾಡಿಸಿಕೊಳ್ಳಲು ಕಷ್ಟವಾಗುತ್ತದೆ. ಇದರ ಕಹಿಫಲ ಅನುಭವಿಸಬೇಕಾದವರು ಜನಸಾಮಾನ್ಯರು. ಆದ್ದರಿಂದ ಪಕ್ಷದ ಒಳಗಿನ ವಿದ್ಯಮಾನಗಳು ರಾಜ್ಯಾಡಳಿತದ ಮೇಲೆ ಪ್ರಭಾವ ಬೀರದಂತೆ ಮುಖ್ಯಮಂತ್ರಿ ನೋಡಿಕೊಳ್ಳಬೇಕು. ಪ್ರಜಾಸತ್ತಾತ್ಮಕ ಮೌಲ್ಯಗಳನ್ನು ಕಾಪಾಡಬೇಕು. ಅಲ್ಲಿನ ಅಸ್ಥಿರತೆ ಬೇಗ ಅಂತ್ಯವಾಗಬೇಕು.