ಕೊಬ್ಬರಿ ಧಾರಣೆಯಲ್ಲಿ ಏರಿಕೆ

ಆ. 26ರಂದು ತಿಪಟೂರು ಎಪಿಎಂಸಿಯಲ್ಲಿ ನಡೆದ ಹರಾಜಿನಲ್ಲಿ ಪ್ರತಿ ಕ್ವಿಂಟಲ್‌ ಕೊಬ್ಬರಿ ₹ 13,100ಕ್ಕೆ ಮಾರಾಟವಾಗುವ ಮೂಲಕ ಮೂರೂವರೆ ವರ್ಷಗಳ ಬಳಿಕ ದಾಖಲೆ ಏರಿಕೆ ಆಗಿದೆ. ಎರಡು ತಿಂಗಳ ಹಿಂದೆ ಕೇವಲ ₹ 7,800–8,000 ಅಸುಪಾಸಿನಲ್ಲಿದ್ದ ಧಾರಣೆ ಕೆಲವೇ ದಿನಗಳ ಹರಾಜಿನಲ್ಲಿ ಕ್ವಿಂಟಲ್‌ ಗೆ ₹ 5,000 ಹೆಚ್ಚಳವಾಗಿರುವುದು ತೆಂಗು ಬೆಳೆಗಾರರಲ್ಲಿ ಆಶಾಭಾವ ಮೂಡಿಸಿದೆ.

ಜುಲೈ 6ರಂದು ನಡೆದ ಹರಾಜಿನಲ್ಲಿ ₹ 7,926 ರಿಂದ 8,225ರ ಅಸುಪಾಸಿನಲ್ಲಿದ್ದ ಧಾರಣೆ ಕ್ರಮೇಣ ಚೇತರಿಕೆ ಕಂಡಿದ್ದು, ಆ. 4ರ ಹರಾಜಿನಲ್ಲಿ ₹ 9,100 ಗಳಿಗೆ ತಲುಪಿತ್ತು. ಆ. 23ರ ಹರಾಜಿನ ವೇಳೆಗೆ ₹ 12,000 ಸಮೀಪಿಸಿತ್ತು. ಈಗ ₹ 13,100ಗಳಿಗೆ ಹೆಚ್ಚಳವಾಗಿದೆ.

‘ನೆರೆ ರಾಜ್ಯಗಳ ವ್ಯಾಪಾರಿಗಳು ಕೊಬ್ಬರಿ ಖರೀದಿಸಲು ಮುಂದಾಗಿರುವುದು ಸಹಜವಾಗಿಯೇ ಬೆಲೆ ಏರಿಕೆಗೆ ಕಾರಣವಾಗಿದೆ. ಮುಂದಿನ ದಿನಗಳಲ್ಲಿ ಕೊಬ್ಬರಿ ಧಾರಣೆ ₹15,000ರಿಂದ ₹ 16,000 ಗಡಿ ದಾಟುವ ನಿರೀಕ್ಷೆ ಇದೆ. ರೈತರು ಕೊಬ್ಬರಿ ಮಾರಾಟಕ್ಕೆ ಗಡಿಬಿಡಿ ಮಾಡಿಕೊಳ್ಳಬಾರದು’ ಎಂದು ವರ್ತಕ ಲೋಕೇಶ್‌ ಸಲಹೆ ನೀಡಿದರು.
ನಾಗರ ಪಂಚಮಿ, ವರಮಹಾಲಕ್ಷ್ಮಿ, ಗೌರಿ, ಗಣೇಶ, ಆಯುಧ ಪೂಜೆ, ದೀಪಾವಳಿ ಹಬ್ಬಗಳು ಸಾಲುಸಾಲಾಗಿ ಬಂದಿರುವುದು ಮಾರುಕಟ್ಟೆಯಲ್ಲಿ ಸಹಜವಾಗಿ ಕೊಬ್ಬರಿಗೆ ಬೇಡಿಕೆ ಹೆಚ್ಚುವಂತೆ ಮಾಡಿದೆ.

ಪಂಜಾಬ್‌, ದೆಹಲಿ, ಮಧ್ಯಪ್ರದೇಶ, ರಾಜಸ್ತಾನ, ಮಹಾರಾಷ್ಟ್ರ, ಪುಣೆ, ಉತ್ತರ ಪ್ರದೇಶ ಸೇರಿದಂತೆ ಉತ್ತರ ಭಾರತದ ಅನೇಕ ರಾಜ್ಯಗಳಿಗೆ ಅರಸೀಕೆರೆ, ತಿಪಟೂರು ಹಾಗೂ ತುರವೇಕೆರೆ ಹಾಗೂ ಇತರ ಕೃಷಿ ಉತ್ಪನ್ನ ಮಾರುಕಟ್ಟೆಗಳಿಗೆ ಹೆಚ್ಚಿನ ಪ್ರಮಾಣದ ಕೊಬ್ಬರಿ ರವಾನೆ ಆಗುತ್ತಿರುವುದು ನಿರೀಕ್ಷೆಗಿಂತ ಹೆಚ್ಚಿನ ಬೇಡಿಕೆ ಬಂದಿದೆ.