ರೈತರಿಗೆ ವರದಾನವಾದ ಕೃಷಿ ಹೊಂಡ

ಸಕಾಲಕ್ಕೆ ಮಳೆಯಾದ ಪರಿಣಾಮ ಮಳೆಯಾಶ್ರಿತ ಭೂಮಿಯಲ್ಲಿ ಬೆಳೆದ ವಿವಿಧ ಬೆಳೆಗಳಿಗೆ ಜೀವಕಳೆ ಬಂದಿದೆ. ರೈತರು ತಮ್ಮ ಜಮೀನುಗಳಲ್ಲಿ ಕೃಷಿ ಭಾಗ್ಯ ಯೋಜನೆಯಡಿ ನಿರ್ಮಿಸಿಕೊಂಡ ಕೃಷಿ ಹೊಂಡಗಳು ತುಂಬಿದ್ದು, ರೈತರು ಹರ್ಷಚಿತ್ತರಾಗಿ ಕೃಷಿ ಚಟುವಟಿಕೆ ಆರಂಭಿಸಿದ್ದಾರೆ. 63 ಅಡಿ ಉದ್ದ, 63 ಅಡಿ ಅಗಲ ಮತ್ತು 9 ಅಡಿ ಆಳದ ಅಳತೆಯಲ್ಲಿ ತಾಲ್ಲೂಕಿನಾದ್ಯಂತ ಒಟ್ಟು 148 ಕೃಷಿ ಹೊಂಡಗಳನ್ನು ನಿರ್ಮಿಸಲಾಗಿದೆ.

ಕೃಷಿ ಇಲಾಖೆಯಿಂದ ಫಲಾನುಭವಿ ರೈತರ ಪ್ರತಿ ಕೃಷಿ ಹೊಂಡಕ್ಕೆ (ಕೆಂಪು ಮಣ್ಣು)  ₹67 ಸಾವಿರ ಮತ್ತು ಕಪ್ಪು ಮಣ್ಣಿನ ಹೊಂಡಕ್ಕೆ ₹51 ಸಾವಿರ ಸಹಾಯಧನ ನೀಡಲಾಗಿದೆ. ಡೀಸೆಲ್ ಚಾಲಿತ ನೀರು ಎತ್ತುವ ಯಂತ್ರ ₹12 ರಿಂದ ₹16 ಸಾವಿರ, ಸ್ಪಿಂಕ್ಲರ್, ಉಪಕರಣ ₹4100 ರಂತೆ ರಿಯಾಯಿತಿ ದರದಲ್ಲಿ ಖರೀದಿಸಿದ್ದಾರೆ.

ಮಳೆ ಕೊರತೆಯಿಂದ ತುಂಗಭದ್ರಾ ಜಲಾಶಯದಲ್ಲಿ ನೀರು ಸಂಗ್ರಹವಾಗದೆ ಕಾಲುವೆಗಳಿಗೆ ನೀರು ತಡವಾಗಿ ಹರಿಸಿದ್ದಾರೆ. ಪ್ರಾರಂಭದಲ್ಲಿ ಸುರಿದ ಮುಂಗಾರು ಮಳೆಯನ್ನು ನಂಬಿ ಮಳೆಯಾಶ್ರಿತ ಭೂಮಿಯಲ್ಲಿ ಬಿತ್ತಿದ್ದ ಬೀಜ ಮೊಳಕೆ ಒಡೆದು ಗಿಡವಾಗುವ ಮೊದಲೇ ಮಳೆ ಮಾಯವಾಗಿತ್ತು. ಇದರಿಂದ ಉತ್ತಮ ಬೆಳೆಯ ನಿರೀಕ್ಷೆ ಹುಸಿಯಾಗಿತ್ತು. ರೈಷಿ ಇಲಾಖೆ ಜಾರಿಗೆ ತಂದಿರುವ ಕೃಷಿ ಹೊಂಡ ಯೋಜನೆ ಅನೇಕ ರೈತರ ಕೈಹಿಡಿದಿದೆ.

* * 

ಮಳೆಯಿಂದ ಕೃಷಿ ಹೊಂಡಗಳು ತುಂಬಿರುವುದರಿಂದ ಕಾಲುವೆ ನೀರು ಕಾಯದೆ ಕೃಷಿ ಚಟುವಟಿಕೆಯಲ್ಲಿ ತೊಡಗಿದ್ದೇವೆ. ಬರಗಾಲದಲ್ಲಿ ಕೃಷಿ ಹೊಂಡ ನಮ್ಮ ಪಾಲಿಗೆ ವರವಾಗಿ ಪರಿಣಮಿಸಿದೆ
ಸುಬ್ಬರಾವ್‌,ಫಲಾನುಭವಿ