‘ಅಪ್ಪಿಕೊ’ ಚಳವಳಿಗೆ ಮೂರೂವರೆ ದಶಕ

ಇದು ಹಿರಿಯ ಪರಿಸರ ವಿಜ್ಞಾನಿ ಪ್ರೊ. ಮಾಧವ ಗಾಡ್ಗೀಳ್ ಅವರು ಶಿರಸಿ ವಿಭಾಗದ ಡಿಸಿಎಫ್ ಆಗಿದ್ದ ರಾಮಯ್ಯ ಅವರಿಗೆ 1983 ಸೆಪ್ಟೆಂಬರ್ 27ರಂದು ಬರೆದಿರುವ ಪತ್ರದ ಒಕ್ಕಣಿಕೆ. ತಾಲ್ಲೂಕಿನ ಹುಲೇಕಲ್ ವಲಯ ಅರಣ್ಯದಲ್ಲಿ ಇಲಾಖೆ ಮರಗಳ ಕಟಾವಿಗೆ ಮುಂದಾದಾಗ ಜನರ ನೇತೃತ್ವದಲ್ಲಿ ಮರಗಳನ್ನು ತಬ್ಬಿಕೊಂಡು ರಕ್ಷಿಸುವ ಅಪ್ಪಿಕೊ  ಚಳವಳಿ ಆರಂಭಗೊಂಡಿತು. 1983ರ ಸೆ. 8ರಂದು ಸಾಲ್ಕಣಿಯಲ್ಲಿ ಆರಂಭವಾಗಿದ್ದ ಚಳವಳಿಗೆ ಇಂದು (ಸೆ.8) 34 ವರ್ಷಾಚರಣೆಯ ಸಂಭ್ರಮ. ‘ಅಪ್ಪಿಕೊ ಚಳವಳಿ ಆರಂಭವಾಗಿದ್ದ ದಿನವನ್ನು ಹಿರಿಯ ಪರಿಸರವಾದಿ ಸುಂದರಲಾಲ್ ಬಹುಗುಣ ಅವರು ಸಹ್ಯಾದ್ರಿ ದಿನಾಚರಣೆ ಎಂದು ಕರೆದಿದ್ದರು. ಈ ಬಾರಿ ಈ ದಿನಾಚರಣೆಯನ್ನು ಮೂರು ದಿನ ಧಾರವಾಡದಲ್ಲಿ ಆಚರಿಸಲಾಗುತ್ತಿದೆ’ ಎಂದು ಚಳವಳಿಯ ನೇತೃತ್ವ ವಹಿಸಿದ್ದ ಪಾಂಡುರಂಗ ಹೆಗಡೆ ತಿಳಿಸಿದ್ದಾರೆ.

ಹಿಂದಿನ ದಿನಗಳನ್ನು ಮೆಲಕು ಹಾಕಿರುವ ಅವರು ಮಾಧವ ಗಾಡ್ಗೀಳ ಅವರ ಪತ್ರದ ಪ್ರತಿಯನ್ನು ಮಾಧ್ಯಮಗಳಿಗೆ ನೀಡಿದ್ದಾರೆ. ‘ಸಾಲ್ಕಣಿಯ ಲಕ್ಷ್ಮಿ ನರಸಿಂಹ ಯುವಕ ಮಂಡಳಿಯ ಪ್ರತಿನಿಧಿಗಳ ಪ್ರಕಾರ,ಸುಲಭವಾಗಿ ತಲುಪಬಹುದಾದ ಪ್ರದೇಶದಲ್ಲಿನ ಮರಗಳನ್ನು ಕಟಾವಿಗೆ ಆಯ್ದುಕೊಳ್ಳಲಾಗಿದೆ ಮತ್ತು ಮರ ಕಟಾವಿನ ವೇಳೆ ಹೆಚ್ಚು ಮರಗಳಿಗೆ ಹಾನಿಯಾಗಿದೆ. ಆರ್ಎಫ್ಒ ಗೋಪಾಲ್ ಅವರ ಜತೆಗೆ ತಾವು ಸ್ಥಳ ಪರಿಶೀಲನೆ ನಡೆಸಿದ್ದು, ಮರ ಕಟಾವು ವೇಳೆ ಉದ್ದೇಶಿಸಿದ್ದಕ್ಕಿಂತ ಹೆಚ್ಚು ಮರಗಳಿಗೆ ಹಾನಿಯಾಗಿದೆ. ಈ ಬಗ್ಗೆ ಯುವಕ ಮಂಡಳಿ ದೂರಿರುವುದು ಸತ್ಯವಾಗಿದೆ. ನನ್ನ ಶಿಫಾರಸುಗಳೆಂದರೆ, ಅರಣ್ಯ ಸಂರಕ್ಷಣೆಯಲ್ಲಿ ಸಾಲ್ಕಣಿಯ ಯುವ ಮಂಡಳ ಸೇರಿದಂತೆ ಎಲ್ಲ ಆಸಕ್ತರನ್ನು ಸೇರಿಸಿಕೊಳ್ಳಬೇಕು.

ಯಾವ ವ್ಯಾಪ್ತಿಯಲ್ಲಿ ಎಷ್ಟು ಮರ ಕಡಿಯಲಾಗುತ್ತದೆ, ಗುತ್ತಿಗೆದಾರ ಯಾರು ಎಂಬ ವಿವರವನ್ನು ಆಸಕ್ತರಿಗೆ ತಿಳಿಸಬೇಕು. ಮರಗಳನ್ನು ಗುರುತಿಸುವ, ಕಟಾವು ಮತ್ತು ಸಾಗಣೆ ಪ್ರಕ್ರಿಯೆಯಲ್ಲಿ ಸ್ಥಳೀಯರ ನೆರವು ಪಡೆಯಬೇಕು.  ಇಂಥ ಪ್ರದೇಶಗಳಿಗೆ ಇಲಾಖೆಯ  ಹಿರಿಯ ಅಧಿಕಾರಿಗಳು ಸ್ಥಳೀಯರ ಜತೆಗೂಡಿ ಭೇಟಿ ನೀಡಬೇಕು. ಉರುವಲಿಗಾಗಿ ಮರಗಳನ್ನು ಕಡಿಯುವ ಬದಲು ಮೃತ ಮತ್ತು ಒಣಗಿದ ಮರಗಳನ್ನು ಬಳಸುವ ಬಗ್ಗೆ ಗಂಭೀರ ಚಿಂತನೆ ನಡೆಸಬೇಕು ಮತ್ತು ಅರಣ್ಯೀಕರಣ ಪ್ರಕ್ರಿಯೆಯಲ್ಲಿ ಸ್ಥಳೀಯರ ಪಾಲ್ಗೊಳ್ಳುವಿಕೆಯನ್ನು ಬೆಂಬಲಿಸಬೇಕು’ ಎಂಬ ಅಂಶ ಗಾಡ್ಗೀಳ್ ಅವರ ಪತ್ರದ ಮುಂದಿನ ಭಾಗದಲ್ಲಿದೆ.

* * 

ಧಾರಾವಾಡ ಕೃಷಿ ವಿಶ್ವವಿದ್ಯಾಲಯದಲ್ಲಿ ಕೃಷಿ ಮತ್ತು ಸಹ್ಯಾದ್ರಿ, ಬಾಲ ಬಳಗ ಶಾಲೆಯಲ್ಲಿ ಸಹ್ಯಾದ್ರಿ ದಿನಾಚರಣೆ, ವಿದ್ಯಾವರ್ಧಕ ಸಂಘದಲ್ಲಿ ಪ್ರಕೃತಿ ಗೀತೆ ಕಾರ್ಯಕ್ರಮ ಹಮ್ಮಿಕೊಳ್ಳಲಾಗಿದೆ.
ಪಾಂಡುರಂಗ ಹೆಗಡೆ
ಅಪ್ಪಿಕೊ ಚಳವಳಿ ಮುಖಂಡ