ನಾಗಮಂಗಲ: ಧಾರಾಕಾರ ಮಳೆ

ಬರದಿಂದಾಗಿ ಕಳೆಗುಂದಿದ್ದ ರೈತನ ಮೊಗದಲ್ಲಿ ಮಂದಹಾಸ ಮೂಡಿದೆ. ಹೊಲಗಳಲ್ಲಿ ಬಿತ್ತಿರುವ ರಾಗಿ, ಅವರೆ, ಜೋಳ, ಅಲಸಂದೆ ಬೆಳೆಗಳು ನಳನಳಿಸುತ್ತಿದ್ದು ಭೂಮಿ ಹಸಿರಿನಿಂದ ಕಂಗೊಳಿಸುತ್ತಿದೆ.

ಧಾರಾಕಾರ ಮಳೆಗೆ ಹಾಲತಿ ಗ್ರಾಮದ ಉಮೇಶ್ ಎಂಬುವವರ ಮನೆ ಕುಸಿದು ಬಿದ್ದಿದ್ದು, ಯಾವುದೇ ಪ್ರಾಣಾಪಾಯ ಆಗಿಲ್ಲ. ಕಳೆದ ಏಳೆಂಟು ವರ್ಷಗಳಿಂದ ಬತ್ತಿಹೋಗಿದ್ದ ಗ್ರಾಮದ ಮುಂದಿನ ಕೆರೆ ಕೋಡಿ ಬಿದ್ದಿದೆ. ಕೆಂದನಳ್ಳಿ, ಬ್ಯಾಡರಹಳ್ಳಿ, ತೊಳಲಿ, ಮೈಲಾರಪಟ್ಟಣ ಇನ್ನಿತರ ಗ್ರಾಮಗಳ ಕೆರೆಗಳು ಭಾಗಶಃ ತುಂಬಿದ್ದು ಮಳೆ ಹೀಗೆಯೇ ಮುಂದುವರಿದರೆ ಒಂದೆರಡು ದಿನಗಳಲ್ಲಿ ಕೋಡಿ ಬೀಳುತ್ತವೆ.

ಬೀದರ್–ಚಾಮರಾಜನಗರ ರಾಷ್ಟ್ರೀಯ ಹೆದ್ದಾರಿಯ ಚಿಣ್ಯ ಗ್ರಾಮದ ವಿದ್ಯಾರ್ಥಿಗಳ ಹಾಸ್ಟೆಲ್ ಬಳಿ ರಸ್ತೆ ಮೇಲೆ ಮರ ಉರುಳಿಬಿದ್ದಿದೆ. ಇದರಿಂದ ಕೆಲ ಹೊತ್ತು ರಸ್ತೆ ಸಂಚಾರಕ್ಕೆ ಅಡ್ಡಿ ಉಂಟಾಗಿತ್ತು.