ಪಿತೃಪಕ್ಷ: ಗಗನಕ್ಕೇರಿದ ಸೊಪ್ಪು, ಸೌತೆ ಕಾಯಿ ಬೆಲೆ

ಕಳೆದ ತಿಂಗಳು ಒಂದು ಕಟ್ಟು ಕೊತ್ತಂಬರಿ ಸೊಪ್ಪಿನ ಬೆಲೆ ಕೇವಲ ₹ 5 ಇತ್ತು. ಪಿತೃಪಕ್ಷ ಮಾಸ ಆರಂಭವಾದೊಡನೆ ಕೊತ್ತಂಬರಿ ಸೊಪ್ಪಿನ ಬೆಲೆ ₹ 20ಕ್ಕೆ ಏರಿತ್ತು. ಆದರೆ ಸೋಮವಾರ ಮಾರುಕಟ್ಟೆಯಲ್ಲಿ ಕೊತ್ತಂಬರಿ ಸೊಪ್ಪಿನ ಬೆಲೆ ಕೇಳಿದವರೆಲ್ಲ ಬೆಚ್ಚಿ ಬಿದ್ದರು. ಒಂದು ಕಟ್ಟು ₹ 60ಕ್ಕೇರಿದ್ದು ವ್ಯಾಪಾರಿಗಳು ಕೊತ್ತಂಬರಿಯನ್ನು ಚಿನ್ನದಂತೆ ಮಾರಾಟ ಮಾಡುತ್ತಿದ್ದಾರೆ.

ಪಿತೃಪಕ್ಷದಲ್ಲಿ ಮಾಂಸಹಾರ ಮಾಡುವ ಕಾರಣ ಕೊತ್ತಂಬರಿ ಬೆಲೆ ಗಗನಕ್ಕೇರಿದೆ. ಕಳೆದ ರಂಜಾನ್‌ ಆಚರಣೆ ದಿನವೂ ಕೊತ್ತಂಬರಿ ಸೊಪ್ಪಿನ ಬಲೆ ₹ 60ಕ್ಕೇರಿತ್ತು. ಮತ್ತೆ ಅದೇ ದಿನ ಮರುಕಳಿಸಿದ್ದು ಗ್ರಾಹಕರ ಜೇಬಿಗೆ ಬರೆ ಬಿದ್ದಿದೆ. ಇತರ ಎಲ್ಲಾ ಸೊಪ್ಪುಗಳ ಬೆಲೆ ಕೂಡ ಏರಿಕೆ ಕಂಡಿದ್ದು ಕಟ್ಟು ಮೆಂಥೆ ₹ 40, ಸಬ್ಬಸಿಗೆ ₹30, ಪಾಲಕ್‌ ₹ 20, ಪುದೀನಾ ₹ 20ಕ್ಕೆ ಮಾರಾಟವಾಗುತ್ತಿದೆ.

ಎರಡು ದಿನಗಳಿಂದ ಸೌತೆಕಾಯಿ ಬೆಲೆ ಕೂಡ ಏರಿಕೆ ಕಂಡಿದೆ. ಮೂರು ಸೌತೆಕಾಯಿ ₹ 20ಕ್ಕೆ ಮಾರಾಟವಾಗುತ್ತಿವೆ. ಮೂರು ನಿಂಬೆ ಹಣ್ಣಿಗೆ ₹ 10 ತೆರಬೇಕಾಗಿದೆ. ಹಸಿ ಶುಂಠಿಗೆ ಬೇಡಿಕೆ ಹೆಚ್ಚಾಗಿದ್ದು ರಸ್ತೆಗಳಲ್ಲಿ ಇಟ್ಟುಕೊಂಡು ಮಾರಾಟ ಮಾಡುತ್ತಿದ್ದಾರೆ. 5 ಬಾಳೆ ಎಲೆಗಳು ₹ 20ಕ್ಕೆ ಮಾರಾಟವಾಗುತ್ತಿವೆ.

‘ಪಿತೃಪಕ್ಷ ಬಂತೆಂದರೆ ಕೊತ್ತಂಬರಿ ಸೊಪ್ಪಿನ ಬೆಲೆ ದುಬಾರಿಯಾಗುತ್ತದೆ. ₹ 100ಕ್ಕೇರಿದರೂ ಜನರು ಕೊತ್ತಂಬರಿ ಕೊಳ್ಳಲೇಬೇಕು. ಮಾಂಸದ ಅಡುಗೆಗೆ ಕೊತ್ತಂಬರಿ ಸೊಪ್ಪು ಬಹಳ ಮುಖ್ಯ. ಹೀಗಾಗಿ ವ್ಯಾಪಾರಿಗಳು ಇಂತಹ ಸಮಯದಲ್ಲಿ ಬಾಯಿಗೆ ಬಂದ ಬಲೆ ಹೇಳುತ್ತಾರೆ’ ಎಂದು ಗ್ರಾಹಕ ರಾಮೇಗೌಡ ಹೇಳಿದರು.

ಎಡೆ ಸಾಮಾಜಿಗೆ ಬೇಡಿಕೆ: ಪಿತೃಪಕ್ಷದಲ್ಲಿ ಮೃತಪಟ್ಟ ಹಿರಿಯರಿಗೆ ಎಡೆ ಇಡುವುದು ವಾಡಿಕೆ. ಮಾಂಸದೂಟದ ಜೊತೆಗೆ ಎಡೆ ಸಾಮಾನುಗಳನ್ನು ಇಟ್ಟು ಪೂಜೆ ಸಲ್ಲಿಸುತ್ತಾರೆ. ಹೀಗಾಗಿ ಮಾರುಕಟ್ಟೆಯಲ್ಲಿ ಈ ಸಾಮಾನುಗಳನ್ನು ಮಾರುವವರು ಹೆಜ್ಜೆಗೊಬ್ಬರಂತೆ ಸ್ಟಾಲ್‌ ಹಾಕಿಕೊಂಡಿದ್ದಾರೆ. ಹರಿಶಿಣ–ಕುಂಕುಮ, ಧೂಪ, ಕರ್ಪೂರ, ಗಂಧದ ಪುಡಿ, ಎಲೆ–ಅಡಿಕೆ, ಬಾಚಣಿಗೆ, ವಿಭೂತಿ, ದಾರ, ಬಳೆ ಮುಂತಾದ ವಸ್ತುಗಳನ್ನು ಒಳಗೊಂಡ ಎಡೆ ಸಾಮಾನುಗಳನ್ನು ಮಾರಾಟ ಮಾಡಲಾಗುತ್ತಿದೆ.

₹ 20 ಕೆ.ಜಿ ಟೊಮೆಟೊ: ತರಕಾರಿ ಬೆಲೆ ಸ್ಥಿರವಾಗಿದ್ದು ₹ 20ಕ್ಕೆ ಕೆ.ಜಿ. ಟೊಮೆಟೊ ಮಾರಾಟವಾಗುತ್ತಿದೆ. ₹ 60ಕ್ಕೆ ಕ್ಯಾರೇಟ್‌, ಬೀಟರೂಟ್‌ ₹ 40, ಬೀನ್ಸ್‌ ₹ 40, ಆಲೂಗಡ್ಡೆ ₹ 20, ಬೆಂಡೆ ಕಾಯಿ ₹ 20ಕ್ಕೆ ಮಾರಾಟವಾಗುತ್ತಿದೆ.

‘ಎಲ್ಲೆಡೆ ಉತ್ತಮ ಮಳೆ ಸುರಿಯುತ್ತಿರುವ ಕಾರಣ ತರಕಾರಿ ಬೆಲೆ ನಿಯಂತ್ರಣಕ್ಕೆ ಬಂದಿದೆ. ಬಿಸಿಲು ಇದ್ದರೆ ಮಾಲು ಬರುವುದಿಲ್ಲ. ಅಂತಹ ಸಮಯದಲ್ಲಿ ಬೆಲೆ ಹೆಚ್ಚಾಗಿರುತ್ತದೆ’ ಎಂದು ತರಕಾರಿ ವ್ಯಾಪಾರಿ ಲವೇಶ್‌ ಹೇಳಿದರು.

ಹಣ್ಣಿನ ಬೆಲೆಯಲ್ಲಿ ಸ್ಥಿರತೆ: ಏಲಕ್ಕಿ ಬಾಳೆಹಣ್ಣು ಕಳೆದ ತಿಂಗಳು ₹ 100ರ ಗಡಿ ದಾಟಿ ಮುಂದೆ ಹೋಗಿತ್ತು. ಆದರೆ ಈಗ ₹ 80ರಲ್ಲಿ ಸ್ಥರತೆ ಕಂಡಿದೆ. ಕೆ.ಜಿ. ವಾಷಿಂಗ್‌ಟನ್‌ ಸೇಬು ₹ 120, ಮೂಸಂಬಿ ₹ 60, ಚಿಕ್ಕಬಳ್ಳಾಪುರ ದಪ್ಪ ದ್ರಾಕ್ಷಿ ₹ 80, ಪಪ್ಪಾಯ ₹ 20, ದಾಳಿಂಬೆ ₹ 80, ಸಪೋಟ ₹ 60, ಸೀತಾಫಲ ₹ 60 ಬೆಲೆ ಇದೆ.