ಮೈಸೂರು ದಸರಾದ ಪ್ರಮುಖ ಆಕರ್ಷಣೆಗಳಲ್ಲಿ ಟಾಂಗಾ ಸವಾರಿ ಕೂಡ ಒಂದು. ಟಾಂಗಾ ಪ್ರಯಾಣವು ಆಹ್ಲಾದಕರ ಹಾಗೂ ಮನೋಲ್ಲಾಸ ನೀಡುವಂತಹದು. ಮೈಸೂರಿಗೆ ಬರುವ ವಿದೇಶಿ ಪ್ರವಾಸಿಗರು ಕೂಡ ಟಾಂಗಾ ಸವಾರಿಯನ್ನು ಇಷ್ಟಪಡುತ್ತಾರೆ. 1940–60ರ ನಡುವಿನ ಅವಧಿಯಲ್ಲಿ ಟಾಂಗಾಗಳೇ ಮೈಸೂರಿಗರ ಪ್ರಮುಖ ಸಾರಿಗೆ ವ್ಯವಸ್ಥೆ.
ಆದರೆ ಇಂದು ಟಾಂಗಾಗಳನ್ನು ಕೇಳುವವರೇ ಇಲ್ಲ. ಹಿಂದೆ ನಗರದಲ್ಲಿ ಸುಮಾರು ಒಂದು ಸಾವಿರ ಟಾಂಗಾಗಳಿದ್ದವು. ಈಗ ಅವುಗಳ ಸಂಖ್ಯೆ 150ಕ್ಕೆ ಇಳಿದಿದೆ ಎಂದು ಹೇಳಲಾಗಿದೆ.
ಟಾಂಗಾವಾಲಾಗಳ ಜೀವನ ನಿರ್ವಹಣೆಯೂ ಕಷ್ಟಕರವಾಗಿದೆ. ದಸರಾ ಸಂದರ್ಭದಲ್ಲಿ ಅವರ ಕಡೆ ಗಮನಹರಿಸುವ ಜಿಲ್ಲಾಡಳಿತ ಅವರ ಅಭಿವೃದ್ಧಿಗಾಗಿ ಯಾವುದೇ ಯೋಜನೆ ರೂಪಿಸಿಲ್ಲ. ಮೈಸೂರಿನ ಪ್ರಮುಖ ಆಕರ್ಷಣೆಗಳಲ್ಲೊಂದಾದ ಟಾಂಗಾಗಳನ್ನು ಉಳಿಸುವ ನಿಟ್ಟಿನಲ್ಲಿ ಪ್ರಯತ್ನಗಳಾಗಬೇಕು. –ಕೆ.ವಿ.ವಾಸು, ಮೈಸೂರು