ನವದೆಹಲಿ: ಮಧ್ಯಾಹ್ನದ ಮೇಲೆ ಅಪಘಾತಗಳ ಪ್ರಮಾಣ ಹೆಚ್ಚು ಎನ್ನುತ್ತಿದೆ ಕೇಂದ್ರ ಭೂ ಸಾರಿಗೆ ಮತ್ತು ಹೆದ್ದಾರಿ ಸಚಿವಾಲಯ ಬಿಡುಗಡೆ ಮಾಡಿರುವ ವಾರ್ಷಿಕ ವರದಿ.
2016ರಲ್ಲಿ ಸಂಭವಿಸಿರುವ ಶೇಕಡ 18ರಷ್ಟು ಅಪಘಾತಗಳು ಮಧ್ಯಾಹ್ನ 3ರಿಂದ ಸಂಜೆ 6 ಗಂಟೆಯೊಳಗೆ ಸಂಭವಿಸಿವೆ. ಶೇಕಡ 35ರಷ್ಟು ಅಪಘಾತಗಳು ಸಂಭವಿಸಿರುವುದು ಮಧ್ಯಾಹ್ನ 3ರಿಂದ ರಾತ್ರಿ 9 ಗಂಟೆಯೊಳಗೆ ಎನ್ನುತ್ತದೆ ಈ ವರದಿ.
2005ರಿಂದ 2016ರ ಅವಧಿಯಲ್ಲಿ ಭಾರತದಲ್ಲಿ ಸುಮಾರು 15 ಲಕ್ಷ (1,550,098) ಮಂದಿ ರಸ್ತೆ ಅಪಘಾತದಲ್ಲಿ ಮೃತಪಟ್ಟಿದ್ದಾರೆ ಎಂದು ವರದಿ ಹೇಳಿದೆ.
2016ರಲ್ಲಿ ಪ್ರತಿ ದಿನ ಸರಾಸರಿ 1,317 ರಸ್ತೆ ಅಪಘಾತಗಳು ಸಂಭವಿಸಿವೆ. ಈ ಅಪಘಾತಗಳಿಂದ 1,50,785 ಮಂದಿ ಮೃತಪಟ್ಟಿದ್ದರೆ, 4,94,624 ಮಂದಿ ಗಾಯಗೊಂಡಿದ್ದಾರೆ. ಮೃತಪಟ್ಟವರ ಪೈಕಿ ಶೇಕಡ 25ರಷ್ಟು ಮಂದಿ 25ರಿಂದ 35 ವಯಸ್ಸಿನವರು ಎಂದು ವರದಿ ತಿಳಿಸಿದೆ.
