ನವದೆಹಲಿ : ವಧು–ವರ ಆಯ್ಕೆಯ ಆನ್ಲೈನ್ ತಾಣವಾಗಿರುವ ಮ್ಯಾಟ್ರಿಮೋನಿಡಾಟ್ಕಾಂ (Matrimony.com), ಗುರುವಾರ ದೇಶಿ ಷೇರುಪೇಟೆಯಲ್ಲಿ ವಹಿವಾಟು ಆರಂಭಿಸಿತು.
ನೀಡಿಕೆ ಬೆಲೆಯಾದ ₹ 985ರ ಮಟ್ಟದಲ್ಲಿಯೇ ಪ್ರತಿ ಷೇರಿನ ಬೆಲೆ ಮುಂಬೈ ಷೇರುಪೇಟೆಯಲ್ಲಿ ವಹಿವಾಟು ಆರಂಭಿಸಿತು. ರಾಷ್ಟ್ರೀಯ ಷೇರುಪೇಟೆಯಲ್ಲಿಯೂ ಇದೇ ಬೆಲೆ ಮಟ್ಟದಲ್ಲಿ ವಹಿವಾಟು ನಡೆಯಿತು.
ಆರಂಭಿಕ ಸಾರ್ವಜನಿಕ ಕೊಡುಗೆ (ಐಪಿಒ) ಮೂಲಕ ₹ 500 ಕೋಟಿ ಸಂಗ್ರಹಿಸುವ ಉದ್ದೇಶಕ್ಕೆ 4.43 ಪಟ್ಟು ಹೆಚ್ಚಿನ ಬೇಡಿಕೆ ಕಂಡು ಬಂದಿತ್ತು. ಪ್ರತಿ ಷೇರಿನ ಬೆಲೆ ಮಟ್ಟವನ್ನು ₹ 983 ರಿಂದ 985ರವರೆಗೆ ನಿಗದಿಪಡಿಸಲಾಗಿತ್ತು. ಸಂಸ್ಥೆಯು ಭಾರತ್ ಮ್ಯಾಟ್ರಿಮೋನಿ ಬ್ರ್ಯಾಂಡ್ ಹೆಸರಿನಡಿ ಅಂತರ್ಜಾಲದಲ್ಲಿ ವಧು ವರ ಆಯ್ಕೆಯ ಸೇವೆ ಒದಗಿಸುತ್ತಿದೆ.
ಸಂಗ್ರಹವಾದ ಹಣವನ್ನು ಕಚೇರಿ ನಿರ್ಮಾಣ ಉದ್ದೇಶಕ್ಕೆ ಭೂಮಿ ಖರೀದಿ, ಪ್ರಚಾರ, ಜಾಹೀರಾತು, ಸಾಲ ಮರುಪಾವತಿ ಉದ್ದೇಶಕ್ಕೆ ಬಳಸಿಕೊಳ್ಳಲಾಗುತ್ತಿದೆ.