ಕೃಷ್ಣಾ ನದಿಗೆ ಹೆಚ್ಚುವರಿ ನೀರು: ಪ್ರವಾಹ ಭೀತಿ

ತಾಲ್ಲೂಕಿನ ನದಿ ಪಾತ್ರದ ಗ್ರಾಮಗಳಲ್ಲಿ ಮಧ್ಯಾಹ್ನ ಪ್ರವಾಹದ ಭೀತಿ ಉಂಟಾಗಿದ್ದು, ತೀರ ನದಿ ದಂಡೆಯಲ್ಲಿನ ಗದ್ದೆಗಳು ಮತ್ತು ಜಮೀನುಗಳು ಮುಳುಗಡೆಯಾಗಿರುವುದು ಕಂಡು ಬಂದಿದೆ. ಯಾವುದೇ ಜೀವ ಹಾನಿ ಸಂಭವಿಸಿಲ್ಲ. ನದಿಯ ಮೂಲಕ ಏತ ನೀರಾವರಿ ಸೌಲಭ್ಯ ಪಡೆಯಲಾಗಿದ್ದ ರೈತರ ಪಂಪ್‌ಸೆಟ್‌ಗಳು ಗುರುವಾರ ಏಕಾಏಕಿಯಾಗಿ ನದಿಗೆ ಪ್ರವಾಹ ಬಂದ ಕಾರಣ ನೀರಿನಲ್ಲಿ ಮುಳುಗಡೆಯಾಗಿದೆ. ಕೆಲವು ರೈತರು ಪ್ರವಾಹವನ್ನು ಲೆಕ್ಕಿಸದೆ ನದಿಯಲ್ಲಿ ಇಳಿದು ಪಂಪ್‌ಸೆಟ್‌ಗಳನ್ನು ದಡಕ್ಕೆ ತರುವ ಪ್ರಯತ್ನ ಮಾಡಿದ್ದಾರೆ.

ಸಂಪರ್ಕ ಕಡಿತ ಭೀತಿ: ಅಣೆಕಟ್ಟೆಯಿಂದ ಗುರುವಾರ ರಾತ್ರಿ ನದಿಗೆ ಇನ್ನು ಹೆಚ್ಚಿನ ಪ್ರಮಾಣದಲ್ಲಿ ನೀರು ಹರಿಬಿಟ್ಟರೆ ತಾಲ್ಲೂಕಿನ ಹೂವಿನಹೆಡ್ಗಿ ಗ್ರಾಮದ ಮುಂದೆ ಇರುವ ಸೇತುವೆ ಮುಳುಗಡೆಯಾಗುವ ಸಂಭವ ಇದೆ. ಈಗಾಗಲೇ ಸೇತುವೆಗೆ ಕೆಲವೇ ಅಡಿಗಳು ಮಾತ್ರ ಬಾಕಿ ಉಳಿದಿದ್ದು, ಅಪಾಯದ ಮಟ್ಟದಲ್ಲಿ ನದಿ ಉಕ್ಕಿ ಹರಿಯುತ್ತಿದೆ.

ಪ್ರಯಾಣಿಕರು ಮತ್ತು ವಾಹನ ಸವಾರರು ಎದುರಿಕೊಂಡು ಸೇತುವೆ ಮೇಲೆ ಸಂಚಾರಕ್ಕೆ ಹಿಂದೇಟು ಹಾಕುತ್ತಿದ್ದಾರೆ. ದೇವದುರ್ಗ, ಜಾಲಹಳ್ಳಿ ಮತ್ತು ಗಬ್ಬೂರು ಪೊಲೀಸ್‌ರು ಸೇತುವೆ ಬಳಿ ಇದ್ದುಕೊಂಡು ಪ್ರಯಾಣಿಕರ ಸುರಕ್ಷಿತಕ್ಕಾಗಿ ಕ್ರಮ ವಹಿಸಿದ್ದಾರೆ.

ಪ್ರತಿ ವರ್ಷ ಸೇತುವೆ ಎರಡರಿಂದ ಮೂರು ದಿನ ಮುಳುಗಡೆಯಾಗುವುದು ಸಾಮಾನ್ಯ. ಕರ್ನಾಟಕ ಮತ್ತು ಮಹಾರಾಷ್ಟ್ರಕ್ಕೆ ಸಂಪರ್ಕ ಕಲ್ಪಿಸುವ ಪ್ರಮುಖ ರಾಜ್ಯ ಹೆದ್ದಾರಿಯಾಗಿದ್ದು, ಸೇತುವೆ ಮುಳುಗಡೆಯಾದರೆ ಪ್ರಯಾಣಿಕರು ಸುಮಾರು 70 ಕಿಲೋ ಮೀಟರ್‌ ಸುತ್ತುವರೆದು ಶಹಾಪುರ ತಲುಪಬೇಕಾಗುತ್ತದೆ.