ನವದೆಹಲಿ: ಸ್ಥಿತ್ಯಂತರ ತೆರಿಗೆ ವಾಪಸಾತಿಗೆ ತೆರಿಗೆದಾರರು ಸಲ್ಲಿಸಿದ ಮನವಿಯಲ್ಲಿನ ಅರ್ಹತೆಯ ಮೊತ್ತ ₹ 12 ಸಾವಿರ ಕೋಟಿಗಳಷ್ಟಿದೆ ಎಂದು ಕೇಂದ್ರ ಸರ್ಕಾರ ತಿಳಿಸಿದೆ.
ಜುಲೈ ತಿಂಗಳಿನಲ್ಲಿ ಸಂಗ್ರಹವಾದ ₹ 95 ಸಾವಿರ ಕೋಟಿ ‘ಜಿಎಸ್ಟಿ’ಯಲ್ಲಿ ₹ 65 ಸಾವಿರ ಕೋಟಿಗಳನ್ನು ತಮಗೆ ಮರು ಪಾವತಿಸಬೇಕು ಎಂದು ತೆರಿಗೆದಾರರು ಕೇಳಿಕೊಂಡಿದ್ದರು. ಇಂತಹ ಮನವಿಗಳ ಸೂಕ್ಷ್ಮ ಪರಿಶೀಲನೆ ನಂತರ ತೆರಿಗೆದಾರರಿಗೆ ಪಾವತಿಸಬೇಕಾದ ಮೊತ್ತ ₹ 12 ಸಾವಿರ ಕೋಟಿಗಳಷ್ಟಾಗಿದೆ ಎಂದು ಸರ್ಕಾರ ತೀರ್ಮಾನಕ್ಕೆ ಬಂದಿದೆ.
ಜುಲೈ 1ರಿಂದ ಜಾರಿಗೆ ಬಂದಿರುವ ಜಿಎಸ್ಟಿ ವ್ಯವಸ್ಥೆಯಡಿ, ಅದಕ್ಕೂ ಮುಂಚಿನ ತೆರಿಗೆ ವ್ಯವಸ್ಥೆಯಲ್ಲಿ ಖರೀದಿಸಿದ ಸರಕುಗಳಿಗೆ ಸಂಬಂಧಿಸಿದಂತೆ ತೆರಿಗೆ ವಾಪಸ್ ಮಾಡಲು ಅವಕಾಶ ಇದೆ. ಇದು ಜಿಎಸ್ಟಿ ಜಾರಿಗೆ ಬಂದ ನಂತರದ 6 ತಿಂಗಳವರೆಗೆ ಮಾತ್ರ ಅನ್ವಯವಾಗಲಿದೆ.