ಏಂಜೆಲಾ ಮರ್ಕೆಲ್ ಪುನರಾಯ್ಕೆ ಮುಗಿಯದ ಸವಾಲುಗಳು

ಈಚಿನ ವರ್ಷಗಳಲ್ಲಿ ಯುರೋಪಿನಾದ್ಯಂತ ತೀವ್ರವಾದಿ ಬಲಪಂಥೀಯ ಪಕ್ಷಗಳು ಮುನ್ನೆಲೆಗೆ ಬರುತ್ತಿವೆ ಎಂಬುದು ನಿಜ. ಹೀಗಿದ್ದೂ ಈ ಪ್ರವೃತ್ತಿಗೆ ಜರ್ಮನಿ ಹೊರತಾಗಿತ್ತು. ಜರ್ಮನಿಯ ಇತಿಹಾಸದಲ್ಲಿ ಅಂತರ್ಗತವಾಗಿರುವಂತಹ ನಾಜಿ ಇತಿಹಾಸದ ತಪ್ಪಿತಸ್ಥ ಭಾವ, ತೀವ್ರವಾದಿ ಬಲಪಂಥೀಯ ಪಕ್ಷಗಳು ಬೆಳೆಯಲು ತಡೆಗೋಡೆಯಾಗಿತ್ತು. ಆದರೆ ಈಗ ಬದಲಾವಣೆಯ ಲಕ್ಷಣಗಳು ಗೋಚರಿಸಿವೆ.

ಈ ಚುನಾವಣೆಯಲ್ಲಿ ಏಂಜೆಲಾ ಮರ್ಕೆಲ್ ಅವರ ಮತ ಹಂಚಿಕೆ ಪಾಲು ಸಹ ಕುಸಿದಿದೆ. ಕಡಿಮೆ ಮತಗಳ ಅಂತರದಿಂದ ಅವರು ಮರು ಆಯ್ಕೆಯಾಗಿದ್ದಾರೆ. ಯುರೋಪ್ ಖಂಡ ಹಾಗೂ ಜರ್ಮನಿಯನ್ನು ಕಾಡುತ್ತಿರುವ ನಿರಾಶ್ರಿತರ ಬಿಕ್ಕಟ್ಟಿನ ಬಗ್ಗೆ ಅವರು ತಳೆದ ನಿಲುವು ಇದಕ್ಕೆ ಕಾರಣ. ವಲಸೆ ವಿಚಾರದಲ್ಲಿ ನೈತಿಕವಾಗಿ ಸರಿ ಇದ್ದಂತಹ ಆದರೆ ಜನಪ್ರಿಯವಲ್ಲದ ನಿಲುವು ತಳೆದಿದ್ದರು ಏಂಜೆಲಾ. 2015ರಿಂದ ಪಶ್ಚಿಮ ಏಷ್ಯಾದಿಂದ ಬರುತ್ತಿರುವ ಲಕ್ಷಾಂತರ ನಿರಾಶ್ರಿತರಿಗೆ ಜರ್ಮನಿಯಲ್ಲಿ ನೀಡಿದ ಆಶ್ರಯ ಸ್ಥಳೀಯರಲ್ಲಿ ಸೃಷ್ಟಿಸಿದ ಅಭದ್ರತೆಯ ಭಾವ ಎಎಫ್‌ಡಿಗೆ ಚುನಾವಣೆಯಲ್ಲಿ ವರದಾನವಾಗಿರುವುದು ಸ್ಪಷ್ಟ.

ಅಂತರರಾಷ್ಟ್ರೀಯ ವೇದಿಕೆಗಳಲ್ಲಿ ಕುಶಲ ಸಂಧಾನಕಾರರೆನಿಸಿದ್ದಾರೆ ಏಂಜೆಲಾ. ಆದರೆ ಈಗ ತಮ್ಮದೇ ದೇಶದಲ್ಲಿ ಹೊಸ ಸರ್ಕಾರವನ್ನು ರಚಿಸುವ ಪ್ರಕ್ರಿಯೆಯಲ್ಲಿ ವಿವಿಧ ಪಕ್ಷಗಳ ಜೊತೆ ಮೈತ್ರಿ ಮಾತುಕತೆಗಳನ್ನು ನಡೆಸುವ ಪ್ರಮುಖ ಸವಾಲುಗಳನ್ನು ಎದುರಿಸಬೇಕಾಗಿದೆ. ಹೀಗಾಗಿ ಏಂಜೆಲಾ ಅವರಿಗೆ ಇದು ‘ದುಃಸ್ವಪ್ನದ ಗೆಲುವು’ ಎಂದೇ ಪತ್ರಿಕೆಯೊಂದು ಬಣ್ಣಿಸಿರುವುದು ಸರಿಯಾದುದು. ‘ಸರ್ಕಾರ ರಚನೆ ಪ್ರಕ್ರಿಯೆಗೆ ತಿಂಗಳುಗಳು ಹಿಡಿಯಬಹುದು’ ಎಂದು ಏಂಜೆಲಾ ಅವರೇ ಹೇಳಿದ್ದಾರೆ.

ಬ್ರೆಕ್ಸಿಟ್ ಹಾಗೂ ಅಮೆರಿಕದಲ್ಲಿ ಡೊನಾಲ್ಡ್ ಟ್ರಂಪ್ ಆಧ್ಯ್ಯಕ್ಷರಾಗಿ ಆಯ್ಕೆಯಾದ ನಂತರ, ಯುರೋಪಿನಾದ್ಯಂತ ಬೀಸುತ್ತಿರುವ ಜಾಗತೀಕರಣ ವಿರೋಧಿ ಭಾವ ಫ್ರಾನ್ಸ್‌ನಲ್ಲಿ ಎಮ್ಮಾನುಯೆಲ್ ಮ್ಯಾಕ್ರನ್ ಚುನಾವಣೆಯಿಂದ ತಗ್ಗಿದಂತಹ ಭಾವನೆ ಮೂಡಿಸಿತ್ತು. ಆದರೆ ಯುರೋಪ್‌ನಲ್ಲಿ ವ್ಯಾಪಕವಾಗುತ್ತಿರುವ ವಲಸೆ ವಿರೋಧಿ ಭಾವನೆಗಳನ್ನು ನಿರ್ವಹಿಸಬೇಕಾದ ಅಗತ್ಯ ಇದೆ ಎಂಬುದಕ್ಕೆ ಜರ್ಮನಿಯಲ್ಲಿ ಈಗ ತೀವ್ರವಾದಿ ಬಲಪಂಥೀಯ ಪಕ್ಷವಾದ ಎಎಫ್‌ಡಿ ಗೆಲುವು ಸಂಕೇತವಾಗಿದೆ. ಜಾಗತಿಕವಾಗಿ ತಳಮಳದ ದಿನಗಳು ಇವು. ಬ್ರೆಕ್ಸಿಟ್, ಡೊನಾಲ್ಡ್ ಟ್ರಂಪ್ ಅವರ ಮುಕ್ತ ವ್ಯಾಪಾರ ವಿರೋಧಿ ನೀತಿಗಳು, ಕೊರಿಯಾ ದ್ವೀಪದಲ್ಲಿನ ಅಶಾಂತಿ, ಅಫ್ಗಾನಿಸ್ತಾನ ಹಾಗೂ ಪಶ್ಚಿಮ ಏಷ್ಯಾದಲ್ಲಿ ಮುಗಿಯದ ಯುದ್ಧಗಳು– ಅನಿಶ್ಚಯದ ದಿನಗಳಿಗೆ ಕಾರಣವಾಗಿವೆ. ಇಂತಹ ಸನ್ನಿವೇಶದಲ್ಲಿ ಶ್ರೀಮಂತ ರಾಷ್ಟ್ರವಾಗಿರುವ ಜರ್ಮನಿಗೆ ಮರ್ಕೆಲ್ ನಾಯಕತ್ವವನ್ನೇ ಭಾರತ ಸೇರಿದಂತೆ ಬಹುತೇಕ ರಾಷ್ಟ್ರಗಳು ಬಯಸುತ್ತವೆ ಎಂಬುದು ಸಹಜ. ಎರಡು ವಿಶ್ವ ಮಹಾಯುದ್ಧಗಳ ನಂತರ ಕಂಡುಕೊಳ್ಳಲಾದ ಮೌಲ್ಯಗಳು ಹಾಗೂ ನೀತಿಗಳನ್ನು ಎತ್ತಿಹಿಡಿಯುವ ವಿಶ್ವನಾಯಕರ ಕೊರತೆ ಇರುವ ಸಂದರ್ಭದಲ್ಲಿ ಏಂಜೆಲಾ ಮರ್ಕೆಲ್ ಅವರು ಇನ್ನೂ ಹೆಚ್ಚಿನ ಜಾಗತಿಕ ಪಾತ್ರ ನಿರ್ವಹಿಸಬೇಕೆಂಬ ನಿರೀಕ್ಷೆಯೂ ಇದೆ.