ಟೆಂಡರ್‌, ಖರೀದಿಯಲ್ಲಿ ಅಕ್ರಮ ಇದಕ್ಕೆ ಹಾಕಬೇಕು ಕಡಿವಾಣ

ಇ– ಹಾಸ್ಪಿಟಲ್‌ ಯೋಜನೆಗೆ ಆರೋಗ್ಯ ಇಲಾಖೆಯು ಅವಸರದಲ್ಲಿ ಗುತ್ತಿಗೆ ನೀಡಿದೆ. ಯೋಜನೆಯ ಅನುಷ್ಠಾನಕ್ಕೆ ಬೇಕಾದ ಉಪಕರಣಗಳು ಮತ್ತು ಸೇವೆಗಳಿಗೆ ದುಪ್ಪಟ್ಟು ಹಣ ಪಾವತಿಸಲು ಒಪ್ಪಿಕೊಂಡಿದೆ. ಕಂಪ್ಯೂಟರ್‌ ಟ್ಯಾಬ್ಲೆಟ್‌ಗಳು, ಸ್ಕ್ಯಾನರ್‌ಗಳು, ಅಡೆತಡೆಯಿಲ್ಲದೆ ವಿದ್ಯುತ್‌ ಪೂರೈಸುವ ಯುಪಿಎಸ್‌ಗಳಿಗೆ ಮಾರುಕಟ್ಟೆ ದರಕ್ಕಿಂತ ಹೆಚ್ಚು ಪಾವತಿಸಲಿದೆ. ಒಂದೊಂದು ರಂಧ್ರ ಕೊರೆಯಲು ₹ 148 ಕೊಡುವುದಂತೂ ಅಂದಾದುಂದಿಯ ಪರಮಾವಧಿ. ಸಾರ್ವಜನಿಕರ ಹಣದ ದುರುಪಯೋಗ. ಒಟ್ಟೂ ₹ 34.35 ಕೋಟಿಯ ಈ ಯೋಜನೆಯಲ್ಲಿ ಸರ್ಕಾರ ಚೌಕಾಸಿ ಮಾಡಿದ್ದರೆ ₹ 10 ಕೋಟಿಗೂ ಹೆಚ್ಚು ಉಳಿಯುತ್ತಿತ್ತು. ವಾಸ್ತವದಲ್ಲಿ ಸಗಟು ಖರೀದಿ ದರ ಮಾರುಕಟ್ಟೆ ದರಕ್ಕಿಂತ ಕಡಿಮೆಯೇ ಇರುತ್ತದೆ. ಸಗಟು ದರದಲ್ಲಿ ಪೂರೈಸಲು ಪೈಪೋಟಿಯಿದೆ. ಅದನ್ನು ಲೆಕ್ಕ ಹಾಕಿದರೆ ಉಳಿತಾಯದ ಮೊತ್ತ ಇನ್ನೂ ಹೆಚ್ಚೇ ಇರುತ್ತಿತ್ತು. ಅಂತಹ ಪ್ರಯತ್ನವೇ ನಡೆದಂತೆ ಕಾಣುತ್ತಿಲ್ಲ. ಇನ್ನು, ರಾಜ್ಯದ ಪ್ರಮುಖ ಸರ್ಕಾರಿ ಆಸ್ಪತ್ರೆಗಳಿಗೆ ಬರುವ ರೋಗಿಗಳ ವಿವರ, ಚಿಕಿತ್ಸೆಯ ಮಾಹಿತಿಯನ್ನು ಡಿಜಿಟಲ್‌ ರೂಪದಲ್ಲಿ ಶಾಶ್ವತವಾಗಿ ಸಂಗ್ರಹಿಸಿಡುವ ಇ– ಹಾಸ್ಪಿಟಲ್‌ ಯೋಜನೆಯೇನೋ ಒಳ್ಳೆಯದು. ಅದರಲ್ಲಿ ಎರಡು ಮಾತೇ ಇಲ್ಲ. ಆದರೆ ಖಾಸಗಿ ಸಂಸ್ಥೆಯೊಂದು ಸಲ್ಲಿಸಿದ ದುಬಾರಿ ದರಪಟ್ಟಿಯನ್ನು ಒಪ್ಪಿಕೊಂಡು ಟೆಂಡರ್‌ ತೆರೆದ ಎರಡೇ ದಿನಗಳ ಒಳಗೆ ಕಾರ್ಯಾದೇಶ ನೀಡಿ ಕರಾರು ಪತ್ರ ಮಾಡಿಕೊಂಡಿರುವುದರ ಉದ್ದೇಶ ಏನು? ಇಷ್ಟೊಂದು ಚುರುಕಾಗಿ ಕೆಲಸ ಮಾಡುವ ದಕ್ಷತೆ ಸರ್ಕಾರಕ್ಕೆ ಎಂದಿನಿಂದ ಬಂತು?

ಒಂದು ವಾರದ ಹಿಂದೆ ಕೂಡ ಇದೇ ರೀತಿ, ಆರೋಗ್ಯ ಭಾಗ್ಯ ಯೋಜನೆಯ ಫಲಾನುಭವಿಗಳನ್ನು ನೋಂದಣಿ ಮಾಡಿಕೊಳ್ಳುವ ಮತ್ತು ಆಧಾರ್‌ ಸಂಖ್ಯೆಗೆ ಜೋಡಿಸುವ ಕೆಲಸಕ್ಕಾಗಿ ₹ 450 ಕೋಟಿಯ ಟೆಂಡರ್‌ ಕರೆಯಲಾಗಿತ್ತು. ಆ ವ್ಯವಹಾರದಲ್ಲಿ ಸಹ ಯಾವುದೂ ಪಾರದರ್ಶಕವಾಗಿರಲಿಲ್ಲ. ಎಲ್ಲವೂ ತರಾತುರಿಯಲ್ಲೇ ನಡೆದಿದ್ದವು. ಇದೇ ಮಾದರಿಯ ಯೋಜನೆಗೆ ಉತ್ತರ ಪ್ರದೇಶದಲ್ಲಿ ಪ್ರತೀ ಫಲಾನುಭವಿಗೆ ತಲಾ ₹ 10 ಖರ್ಚಾಗಿದ್ದರೆ, ನಮ್ಮ ಸರ್ಕಾರ ತಲಾ ₹ 70 ಖರ್ಚು ಮಾಡಲು ಮುಂದಾಗಿತ್ತು. ಸಾರ್ವಜನಿಕ ವಲಯದಿಂದ ಭಾರಿ ಟೀಕೆ– ಟಿಪ್ಪಣಿಗಳು ಬಂದ ನಂತರ ಕೈಬಿಟ್ಟಿತ್ತು. ಸರ್ಕಾರಿ ಟೆಂಡರ್‌, ಖರೀದಿ ಪ್ರಕ್ರಿಯೆಗಳು ಪಾರದರ್ಶಕವಾಗಿರಬೇಕು. ಅದಕ್ಕಾಗಿಯೇ ನಮ್ಮಲ್ಲಿ ‘ಕರ್ನಾಟಕ ಸಾರ್ವಜನಿಕ ಸಂಗ್ರಹಣೆಯಲ್ಲಿ ಪಾರದರ್ಶಕತೆ ಕಾಯ್ದೆ’ (ಕೆಟಿಟಿಪಿ) ಜಾರಿಯಲ್ಲಿದೆ. ಅದನ್ನು ಪಾಲಿಸುವುದು ಕಡ್ಡಾಯ. ಆದರೆ ಈ ಎರಡೂ ಪ್ರಕ್ರಿಯೆಗಳಲ್ಲಿ ಆರೋಗ್ಯ ಇಲಾಖೆ ಈ ಕಾಯ್ದೆಯನ್ನು ಪಾಲಿಸಿದಂತೆ ಕಾಣುತ್ತಿಲ್ಲ. ಇದು ಅಕ್ಷಮ್ಯ. ತಾನೇ ಮಾಡಿದ ಕಾಯ್ದೆ, ನಿಯಮಗಳಿಗೆ ಸರ್ಕಾರ ಬದ್ಧವಾಗಿರಬೇಕು. ಸಾರ್ವಜನಿಕರ ಹಣದ ದುರುಪಯೋಗಕ್ಕೆ ಕಡಿವಾಣ ಬೀಳಬೇಕು. ಇನ್ನಾದರೂ ಇಂತಹ ದುಸ್ಸಾಹಸಕ್ಕೆ ಸರ್ಕಾರ ಕೈಹಾಕದೇ ಇರಲಿ.