‌ಸುನಿಲ್ ಚೆಟ್ರಿ ಬಳಗದ ಅಜೇಯ ಓಟ

ಭಾರತದ ಏಷ್ಯಾಕಪ್‌ ಕನಸು ನನಸು

ಸುರಿಮಳೆಯ ನಡುವೆಯೇ ಬುಧವಾರ ರಾತ್ರಿ ನಡೆದ ಅರ್ಹತಾ ಸುತ್ತಿನ ನಾಲ್ಕನೇ ಪಂದ್ಯದಲ್ಲಿ ಗೆಲುವಿನ ಕೇಕೆ ಹಾಕಿದ ಸುನಿಲ್ ಚೆಟ್ರಿ ಬಳಗ ಟೂರ್ನಿಯಲ್ಲಿ ಅಜೇಯ ಓಟ ಮುಂದುವರಿಸಿತು. ಮಕಾವ್‌ ನಿರಂತರ ನಾಲ್ಕನೇ ಸೋಲು ಕಂಡಿತು. 2011ರಲ್ಲಿ ಏಷ್ಯಾ ಕಪ್‌ ಟೂರ್ನಿಗೆ ಭಾರತ ಕೊನೆಯದಾಗಿ ಅರ್ಹತೆ ಗಳಿಸಿತ್ತು.

ಪಂದ್ಯ ಗೆದ್ದ ಬಳಿಕ ಆಂಗಳದಿಂದ ಹೊರಬರುತ್ತಿರುವ ಭಾರತ ತಂಡದ ಆಟಗಾರರು.

ಬೆಂಗಳೂರು: ಭಾರತದ ಆಸೆ ಈಡೇರಿತು. ಮಕಾವ್‌ ತಂಡದ ದೌರ್ಬಲ್ಯಗಳನ್ನು ಸದುಪಯೋಗಪಡಿಸಿಕೊಂಡ ತಂಡ 4–1ರಿಂದ ಅಮೋಘ ಜಯ ಸಾಧಿಸಿ 2019ರ ಏಷ್ಯಾಕಪ್‌ ಫುಟ್‌ಬಾಲ್ ಚಾಂಪಿಯನ್‌ಷಿಪ್‌ಗೆ ಅರ್ಹತೆ ಗಳಿಸಿತು. ಈ ಅಪರೂಪದ ಗಳಿಗೆಗೆ ಇಲ್ಲಿನ ಶ್ರೀ ಕಂಠೀರವ ಕ್ರೀಡಾಂಗಣ ಸಾಕ್ಷಿಯಾಯಿತು.

ಸುರಿಮಳೆಯ ನಡುವೆಯೇ ಬುಧವಾರ ರಾತ್ರಿ ನಡೆದ ಅರ್ಹತಾ ಸುತ್ತಿನ ನಾಲ್ಕನೇ ಪಂದ್ಯದಲ್ಲಿ ಗೆಲುವಿನ ಕೇಕೆ ಹಾಕಿದ ಸುನಿಲ್ ಚೆಟ್ರಿ ಬಳಗ ಟೂರ್ನಿಯಲ್ಲಿ ಅಜೇಯ ಓಟ ಮುಂದುವರಿಸಿತು. ಮಕಾವ್‌ ನಿರಂತರ ನಾಲ್ಕನೇ ಸೋಲು ಕಂಡಿತು. 2011ರಲ್ಲಿ ಏಷ್ಯಾ ಕಪ್‌ ಟೂರ್ನಿಗೆ ಭಾರತ ಕೊನೆಯದಾಗಿ ಅರ್ಹತೆ ಗಳಿಸಿತ್ತು.

ಅರ್ಹತಾ ಸುತ್ತಿನಲ್ಲಿ ಇನ್ನೂ ಎರಡು ಪಂದ್ಯಗಳು ಬಾಕಿ ಇದ್ದರೂ ಬುಧವಾರ ಜಯ ಗಳಿಸಿ ನಿರಾಳವಾಗುವುದು ತಂಡದ ಉದ್ದೇಶವಾಗಿತ್ತು. ಹೀಗಾಗಿ ಪ್ರಯೋಗಗಳಿಗೆ ಕೋಚ್ ಸ್ಟೀಫನ್‌ ಕಾನ್‌ಸ್ಟಂಟೈನ್‌ ಮುಂದಾಗಲಿಲ್ಲ. ಫಾರ್ವರ್ಡ್ ಆಟಗಾರ ಬಲವಂತ್‌ ಸಿಂಗ್ ಬದಲಿಗೆ ಯೂಜೆನ್‌ಸೆನ್‌ ಲಿಂಗ್ಡೊ ಅವರನ್ನು ಅಂತಿಮ 11ರಲ್ಲಿ ಸೇರಿಸಿದ್ದು ಬಿಟ್ಟರೆ ಹೆಚ್ಚಿನ ಬದಲಾವಣೆಗಳಿಗೆ ಅವರು ಮೊರೆ ಹೋಗಲಿಲ್ಲ.

ಚೆಟ್ರಿ ಬಳಗದವರು ಆರಂಭದಲ್ಲಿ ಪಂದ್ಯದ ಮೇಲೆ ಆಧಿಪತ್ಯ ಸ್ಥಾಪಿಸಿದರು. ಎದುರಾಳಿ ತಂಡದ ಗೋಲುಪೆಟ್ಟಿಗೆ ಬಳಿ ನಿರಂತರ ಆಕ್ರಮಣ ನಡೆಸಿದರು. ಆದರೆ ನಂತರ ಕೆಲವು ನಿಮಿಷ ತಂಡದ ಆಟ ನೀರಸವಾಗಿತ್ತು. ಚೀಂಗ್ ಚೆಂಗ್‌ ಯಾಂಗ್ ಬಳಗದ ರಕ್ಷಣಾ ಕೋಟೆ ಬಲಿಷ್ಠವಾಗಿರಲಿಲ್ಲ. ಆದರೂ ಚೆಟ್ರಿ ಪಡೆ ಗೋಲು ಗಳಿಸಲು ಪರದಾಡಿತು. 15ನೇ ನಿಮಿಷದಲ್ಲಿ ಮಕಾವ್‌ ತಂಡಕ್ಕೆ ಮೊದಲ ಪೆನಾಲ್ಟಿ ಕಾರ್ನರ್ ಅವಕಾಶವನ್ನೂ ಬಿಟ್ಟುಕೊಟ್ಟಿತು. ಆದರೆ ಗೋಲು ಗಳಿಸಲು ಭಾರತದ ಡಿಫೆಂಡರ್‌ಗಳು ಅವಕಾಶ ನೀಡಲಿಲ್ಲ.

19ನೇ ನಿಮಿಷದಲ್ಲಿ ಭಾರತಕ್ಕೆ ಫ್ರೀ ಕಿಕ್‌ ಅವಕಾಶ ಲಭಿಸಿದಾಗ ಪ್ರೇಕ್ಷಕರು ಸಂಭ್ರಮಪಟ್ಟರು. ಚೆಟ್ರಿ ಚೆಂಡು ಒದೆಯಲು ಸಜ್ಜಾದಾಗ ಈ ಸಂಭ್ರಮ ಇಮ್ಮಡಿಗೊಂಡಿತು. ಬಲವಾಗಿ ಒದ್ದ ಚೆಂಡು ಮಿಂಚಿನ ವೇಗದಲ್ಲಿ ಗೋಲು ಪೆಟ್ಟಿಗೆಯತ್ತ ನುಗ್ಗಿತು. ಆದರೆ ಬಲಭಾಗದ ಕಂಬಕ್ಕೆ ತಾಗಿ ಹೊರಗೆ ಸಾಗಿತು.

ಮುನ್ನಡೆ ತಂದುಕೊಟ್ಟ ಬೋರ್ಜಿ: 20 ನಿಮಿಷಗಳ ನಂತರ ಭಾರತ ಪ್ರಾಬಲ್ಯ ಮೆರೆಯಿತು. ಚೆಂಡಿನ ಮೇಲೆ ಪೂರ್ಣ ಹಿಡಿತ ಸಾಧಿಸಿದ ಭಾರತಕ್ಕೆ 27ನೇ ನಿಮಿಷದಲ್ಲಿ ಮಿಡ್‌ಫೀಲ್ಡರ್‌ ರಾವ್ಲಿನ್‌ ಬೋರ್ಜಿ ಮುನ್ನಡೆ ತಂದುಕೊಟ್ಟರು. ಎದುರಾಳಿ ತಂಡದ ರಕ್ಷಣಾ ಕೋಟೆಯನ್ನು ಸುಲಭವಾಗಿ ಭೇದಿಸಿದ ಬೋರ್ಜಿ ಸಂಭ್ರಮ ಉಕ್ಕಿಸಿದರು. ಆದರೆ 36ನೇ ನಿಮಿಷದಲ್ಲಿ ಮಕಾವ್ ತಿರುಗೇಟು ನೀಡಿತು.

ಫಾರ್ವರ್ಡ್ ಆಟಗಾರ ನಿಕೋಲಾಸ್‌ ಮಾರಿಯೊ ಟೆರಾವೊ ಸುಲಭವಾಗಿ ಚೆಂಡನ್ನು ಗೋಲು ಪೆಟ್ಟಿಗೆಯೊಳಗೆ ಸೇರಿಸಿದರು. ಇದು ಟೂರ್ನಿಯಲ್ಲಿ ಮಕಾವ್ ಗಳಿಸಿದ ಮೊದಲ ಗೋಲು. ಭಾರತ ಬಿಟ್ಟುಕೊಟ್ಟ ಮೊದಲ ಗೋಲು ಕೂಡ.

ಬಲ ತುಂಬಿದ ಬಲ್ವಂತ್‌: 1–1ರಿಂದ ಸಮಬಲ ಸಾಧಿಸಿ ವಿರಾಮಕ್ಕೆ ತೆರಳಿದ ಭಾರತ ದ್ವಿತೀಯಾರ್ಧದಲ್ಲಿ ಪಟ್ಟು ಬದಲಿಸಿತು. ಜಾಕಿಚಂದ್ ಸಿಂಗ್ ತೆಲೆಮ್‌ ಅವರ ಬದಲಿಗೆ ಬಲ್ವಂತ್ ಸಿಂಗ್ ಅವರನ್ನು ಕರೆಸಿಕೊಂಡ ತಂಡ ಮತ್ತಷ್ಟು ಪ್ರಬಲ ದಾಳಿ ನಡೆಸಿತು. ಇದರ ಪರಿಣಾಮ ಗೋಲುಗಳು ಹರಿದು ಬಂದವು.

52ನೇ ನಿಮಿಷದಲ್ಲಿ ಸುನಿಲ್ ಚೆಟ್ರಿ, ಬಲ್ವಂತ್ ಸಿಂಗ್ ಮತ್ತು ಹೋಲಿಚರಣ್‌ ಸಿಂಗ್‌ ಅವರು ಸುಂದರ ಪಾಸ್‌ಗಳ ಮೂಲಕ ಎದುರಾಳಿ ಗೋಲು ಪೆಟ್ಟಿಗೆ ಬಳಿಗೆ ಧಾವಿಸಿ ಆತಂಕ ಸೃಷ್ಟಿಸಿದರು. ಆದರೆ ಗೋಲು ಮೂಡಿ ಬರಲಿಲ್ಲ.

53ನೇ ನಿಮಿಷದಲ್ಲಿ ಭಾರತಕ್ಕೆ ಕಾರ್ನರ್ ಕಿಕ್‌ ಅವಕಾಶ ಲಭಿಸಿತು. ಯೂಜೆನ್‌ಸೆನ್ ಲಿಂಗ್ಡೊ ಒದ್ದ ಚೆಂಡನ್ನು ಜೆಜೆ ಲಾಲ್‌ಪೆಕ್ಲುವಾ ಹೆಡ್ ಮಾಡಿದರು. ಅದರೆ ಗುರಿ ಮುಟ್ಟಲಿಲ್ಲ. 55ನೇ ನಿಮಿಷದಲ್ಲೂ ಲಾಲ್‌ಪೆಕ್ಲುವಾ ನೀಡಿ‌ದ ಕಾರ್ನರ್ ಕಿಕ್ ಬಲ್ವಂತ್ ಸಿಂಗ್ ಹೆಡ್‌ ಮಾಡಿದರು. ಆದರೆ ಫಲ ಸಿಗಲಿಲ್ಲ.

ಚಾಣಾಕ್ಷ ಬಲ್ವಂತ್ ಸಿಂಗ್‌: 59ನೇ ನಿಮಿಷದಲ್ಲಿ ಭಾರತಕ್ಕೆ ಮುನ್ನಡೆ ಸಿಕ್ಕಿತು. ಬಲ್ವಂತ್ ಸಿಂಗ್ ಅವರ ಚಾಣಾಕ್ಷ ನಡೆ ಇದಕ್ಕೆ ಕಾರಣವಾಯಿತು. ಅಂಗಣದ ಮಧ್ಯಭಾಗದಿಂದ ಎದುರಾಳಿ ತಂಡದ ಆಟಗಾರರನ್ನು ವಂಚಿಸುತ್ತ ಚೆಂಡನ್ನು ಮೋಹಕವಾಗಿ ಡ್ರಿಬಲ್ ಮಾಡುತ್ತ ಬಂದ ಅವರು ಎಡಭಾಗದಲ್ಲಿ ಹೊಂಚು ಹಾಕಿ ನಿಂತಿದ್ದ ಚೆಟ್ರಿ ಅವರಿಗೆ ಕೊನೆಯ ಕ್ಷಣದಲ್ಲಿ ಪಾಸ್ ನೀಡಿದರು. ನಾಯಕ ಚೆಂಡನ್ನು ಗುರಿ ಸೇರಿಸಲು ತಡ ಮಾಡಲಿಲ್ಲ.

ಸ್ವಯಂ ಗೋಲು ನೀಡಿದ ಲಾಮ್‌: 69ನೇ ನಿಮಿಷದಲ್ಲಿ ಮಕಾವ್ ಡಿಫೆಂಡರ್‌ ಲಾಮ್ ಕ ಸೆಂಗ್ ಮಾಡಿದ ತಪ್ಪು ಭಾರತಕ್ಕೆ ಮತ್ತೊಂದು ಗೋಲು ತಂದುಕೊಟ್ಟಿತು. ಬಲ ಮೂಲೆಯಿಂದ ಹೋಲಿಚರಣ್‌ ನರ್ಜರಿ ಒದ್ದ ಚೆಂಡನ್ನು ಗೋಲುಪೆಟ್ಟಿಗೆಯ ಬಳಿ ತಡೆಯಲು ಮುಂದಾದ ಲಾಮ್ ಅವರ ಕೈಗೆ ತಾಗಿ ಚೆಂಡು ‘ಗುರಿ’ ಸೇರಿತು. ಹೆಚ್ಚುವರಿ (90+1) ಅವಧಿಯಲ್ಲಿ ಜೆಜೆ ಲಾಲ್‌ಪೆಕ್ಲುವಾ ಗಳಿಸಿದ ಸುಲಭ ಗೋಲು ಭಾರತದ ಮುನ್ನಡೆಯನ್ನು ಹೆಚ್ಚಿಸಿತು.

ಭಾರತ ಮುಂದಿನ ಪಂದ್ಯಗಳಲ್ಲಿ ಮ್ಯಾನ್ಮಾರ್‌ (ನವೆಂಬರ್‌ 24) ಮತ್ತು ಕಿರ್ಕಿಸ್ತಾನ (ಮಾರ್ಚ್‌ 27) ಎದುರು ಸೆಣಸಲಿದೆ.

Comments
ಈ ವಿಭಾಗದಿಂದ ಇನ್ನಷ್ಟು
ಮಿಥುನ್ ಪ್ರಭಾವಿ ಬೌಲಿಂಗ್‌: 185ಕ್ಕೆ ಆಲೌಟ್‌ ಆದ ವಿದರ್ಭ

ರಣಜಿ ಸೆಮಿಫೈನಲ್‌
ಮಿಥುನ್ ಪ್ರಭಾವಿ ಬೌಲಿಂಗ್‌: 185ಕ್ಕೆ ಆಲೌಟ್‌ ಆದ ವಿದರ್ಭ

17 Dec, 2017
ಚೊಚ್ಚಲ ಪ್ರಶಸ್ತಿಗೆ ಇನ್ನೊಂದೇ ಹೆಜ್ಜೆ

ಚೆನ್‌ ಸವಾಲು ಮೀರಿದ ಸಿಂಧು
ಚೊಚ್ಚಲ ಪ್ರಶಸ್ತಿಗೆ ಇನ್ನೊಂದೇ ಹೆಜ್ಜೆ

17 Dec, 2017
ಶೇಖರ್‌–ಬಾಲಚಂದ್ರ ಫೈನಲ್‌ನಲ್ಲಿ ಪೈಪೋಟಿ

ಟೆಬೆಬುಯಿಯಾ ಇಂಡಿಯಾ ಓಪನ್ ವ್ಹೀಲ್‌ಚೇರ್ ಟೆನಿಸ್‌
ಶೇಖರ್‌–ಬಾಲಚಂದ್ರ ಫೈನಲ್‌ನಲ್ಲಿ ಪೈಪೋಟಿ

17 Dec, 2017
ಖುಷಿ ದಿನೇಶ್ ದಾಖಲೆಗಳ ಡಬಲ್‌

ರಾಣೆಬೆನ್ನೂರು: ಬಸವನಗುಡಿ ಈಜು ಕೇಂದ್ರದ ಪಾರಮ್ಯ
ಖುಷಿ ದಿನೇಶ್ ದಾಖಲೆಗಳ ಡಬಲ್‌

17 Dec, 2017
ಸರಣಿಯ ‘ಫೈನಲ್‌’ನಲ್ಲಿ ಗೆಲುವಿನ ನಿರೀಕ್ಷೆ

ವಿಶಾಖಪಟ್ಟಣದಲ್ಲಿ ಇಂದು ಮೂರನೇ ಏಕದಿನ ಪಂದ್ಯ
ಸರಣಿಯ ‘ಫೈನಲ್‌’ನಲ್ಲಿ ಗೆಲುವಿನ ನಿರೀಕ್ಷೆ

17 Dec, 2017