ಕೀಳರಿಮೆ ಬಿತ್ತಬೇಡಿ!

ನಿಜವೆಂದರೆ, ಯಾವ ಕೆಲಸವೂ ಕೀಳೆನ್ನದೆ ತಿಳಿದು ಸಮರ್ಪಣೆ–ಸೇವಾ ಭಾವದಿಂದ ಕಾಯಕನಿಷ್ಠೆ ಮೆರೆಯುತ್ತಿರುವ ಆ ಯುವಕರಿಗೆ, ಅವರು ನಮ್ಮ ಮಕ್ಕಳೇ ಆದರೂ, ‘ಶಹಬ್ಬಾಸ್‌’ ಎನ್ನಬೇಕು, ಅವರಿಗೆ ಕಾಯಕ ಅಭಿಮಾನ ಮೂಡುವಂತೆ ಮಾಡಬೇಕು, ಕೀಳರಿಮೆ ಅಲ್ಲ. ತ್ಯಾಜ್ಯ ಆಹಾರವನ್ನು ಬಿಸಾಕದೆ, ಸಂಗ್ರಹಿಸಿ ಮೂಕಪ್ರಾಣಿಗಳಿಗೆ ಉಪಯೋಗಿಸಬಹುದು, ಅದು ಪುಣ್ಯ ಕಾರ್ಯವೇ.

ಈ ಕೆಲಸ ಒಂದು ವೇಳೆ ಯುವಕರು ಮಾಡದಿದ್ದರೆ, ಪಾತ್ರೆ ತೊಳೆಯುವವರಾದರೂ ಮಾಡಲೇಬೇಕಲ್ಲವೇ? ಅವರೂ ಮನುಷ್ಯರೇ ಅಲ್ಲವೇ? ಅವರಿಗೆ ಏನು ಹೇಳುತ್ತೀರಿ? ಈ ರೀತಿಯ ಕೀಳರಿಮೆ ಭಾವದಿಂದಾಗಿಯೇ ಇಂದು ಕೈಕೆಸರಾಗುವ ಕೃಷಿ ಕೆಲಸಕ್ಕೆ ಆಳುಗಳೇ ಸಿಗುತ್ತಿಲ್ಲ, ಎಲ್ಲರಿಗೂ ಶಹರವೇ ಬೇಕು– ಕೆಳ ದರ್ಜೆ ಕೆಲಸವೋ, ಕಳ್ಳತನವೋ, ಹೇಗಾದರೂ ಸರಿ!

ಇನ್ನು, ಆಹಾರ ಬಿಸಾಕುವವರ, ಅದನ್ನು ಪ್ರತ್ಯೇಕ ಬಕೆಟ್‌ಗೆ ಹಾಕದವರ ಬಗ್ಗೆ– ಈ ಅನಾಗರಿಕ, ಬೇಜವಾಬ್ದಾರಿ ವರ್ತನೆ ನಮ್ಮ ಭಾರತೀಯರಲ್ಲಿ ಹಾಸುಹೊಕ್ಕಾಗಿದೆ, ಎಲ್ಲಾ ಕ್ಷೇತ್ರಗಳಲ್ಲೂ! ಸುಧಾರಿಸಲಾಗದು. ಅವರ ಬಗ್ಗೆ ಬೇಕಾದರೆ ಅಲವತ್ತುಕೊಳ್ಳಬಹುದು!

ಇಳಿಮನೆ ಸುಭಾಶ್ಚಂದ್ರ ಹೆಗಡೆ, ಹುಬ್ಬಳ್ಳಿ