‘ಜವ’ನ ಚಿತ್ರವಿಚಿತ್ರ ಕಲರವ

ಆ ಸಂಜೆಯ ಕಾರ್ಯಕ್ರಮದಲ್ಲಿ ‘ಜವ’ ಸಿನಿಮಾದ ಸಿ.ಡಿ. ಬಿಡುಗಡೆಯ ಜತೆ ವಿನಯಚಂದ್ರ, ವಚನ ಶೆಟ್ಟಿ, ವೀರೇಂದ್ರ ಅವರಂಥ ಕೆಲವು ಸಮಾನ ಮನಸ್ಕರು ಸೇರಿ ಮಾಡಿಕೊಂಡಿರುವ ಯುಎಂಜಿ (ಅರ್ಬನ್‌ ಮೀಡಿಯಾ ಗ್ಯಾರೇಜ್‌) ಕಂಪೆನಿಯ ಉದ್ಘಾಟನೆಯೂ ಇತ್ತು. ಇದಕ್ಕಾಗಿಯೇ ಶಿವರಾಜಕುಮಾರ್‌ ಸಹ ಬಂದಿದ್ದರು.

ಯುಎಂಜಿ ಸಂಸ್ಥೆಯ ಮೊದಲ ಸಿನಿಮಾ ‘ಜವ’. ತಮ್ಮ ಸಹೋದರ ಅಭಯಚಂದ್ರ ಅವರ ನಿರ್ದೇಶನದ ಈ ಚಿತ್ರಕ್ಕೆ ವಿನಯಚಂದ್ರ ಸಂಗೀತ ಸಂಯೋಜನೆ ಮಾಡಿದ್ದಾರೆ.

‘ಜವ ಶೀರ್ಷಿಕೆಯೇ ವಿಭಿನ್ನವಾಗಿದೆ. ಈ ಕಂಪೆನಿಯಿಂದ ತುಂಬ ಒಳ್ಳೆಯ ಸಿನಿಮಾಗಳು ಬರಲಿ’ ಎಂದು ಹಾರೈಸಿದರು ಶಿವರಾಜಕುಮಾರ್‌.

ಸಾಯಿಕುಮಾರ್ ಈ ಚಿತ್ರದಲ್ಲಿ ಮುಖ್ಯಪಾತ್ರದಲ್ಲಿ ನಟಿಸುತ್ತಿದ್ದಾರೆ.  ‘ಹೊಸ ಪೀಳಿಗೆಯವರು ಹೊಸದಾಗಿಯೇ ಯೋಚಿಸುತ್ತಿದ್ದಾರೆ. ವಿನಯ ಮತ್ತು ಅಭಯ ಇಬ್ಬರೂ ನನಗೆ ಲವ ಕುಶರಂತೆ ಕಾಣುತ್ತಾರೆ. ಇದು ನನಗೂ ಹೊಸ ರೀತಿಯ ಸಿನಿಮಾ. ಆದ್ದರಿಂದ ಅದನ್ನು ನೋಡಲು ಕಾಯುತ್ತಿದ್ದೇನೆ’ ಎಂದರು ಹಿರಿಯ ನಟ ಸಾಯಿಕುಮಾರ್‌.  ವಿ. ಮನೋಹರ್‌ ಈ ಚಿತ್ರಕ್ಕೆ ಎರಡು ಹಾಡುಗಳನ್ನು ಬರೆದಿದ್ದಾರೆ. ‘ಇದೊಂದು ಮಿಸ್ಟರಿ ಥ್ರಿಲ್ಲರ್‌. ಸದ್ಯವೇ ಟ್ರೈಲರ್‌, ಟೀಸರ್‌ ಬಿಡುಗಡೆ ಮಾಡುತ್ತೇವೆ’ ಎಂದು ಹೇಳಿದರು ನಿರ್ದೇಶಕರು.

ಬೆಂಗಳೂರು, ಚಿಕ್ಕಮಗಳೂರು ಸುತ್ತಮುತ್ತಲಿನ ಪ್ರದೇಶಗಳಲ್ಲಿ ‘ಜವ’ನನ್ನು ಚಿತ್ರೀಕರಿಸಲಾಗಿದೆ.

ಇದೇ ಸಂದರ್ಭದಲ್ಲಿ ಯುಎಂಜಿ ಕಂಪೆನಿಯಿಂದ ಹೊರಬರುತ್ತಿರುವ ಹೊಸ ಸಿನಿಮಾ ‘ಬ್ಲಾಕ್‌ ಸಿ ನಂ.135' ಎಂಬ ವಿಭಿನ್ನ ಹೆಸರಿನ ಚಿತ್ರದಲ್ಲಿ ಶಿವರಾಜಕುಮಾರ್‌ ನಾಯಕನಾಗಿ ನಟಿಸುತ್ತಿರುವ ಸುದ್ದಿಯನ್ನೂ ಬಹಿರಂಗಪಡಿಸಲಾಯಿತು.

‘ಬ್ಲಾಕ್‌ ಸಿ...’ ಚಿತ್ರದ ಸ್ಕ್ರಿಪ್ಟ್‌ ತುಂಬ  ಚೆನ್ನಾಗಿದೆ. ಸಿನಿಮಾದ ಹೆಸರು ಕೂಡ ಅಷ್ಟೇ ವಿಭಿನ್ನವಾಗಿದೆ. ಶೀರ್ಷಿಕೆ ನೋಡಿಯೇ ಜನರು ಸಿನಿಮಾ ನೋಡಲಿಕ್ಕೆ ಬರುತ್ತಾರೆ’ ಎಂಬ ವಿಶ್ವಾಸ ವ್ಯಕ್ತಪಡಿಸಿದರು ಎಂದರು ಶಿವಣ್ಣ.