ಹೇಳುವೆ ಕೇಳಿರಿ ಚಿಣ್ಣರೆ ನಿಮಗೆ
ಹಕ್ಕಿಯ ತ್ಯಾಗದ ಕತೆಯೊಂದು
ಆಶ್ರಯ ಕೊಟ್ಟ ಮರಕ್ಕಾಗಿ ತನ್ನ
ಪ್ರಾಣವ ತೆತ್ತ ಪರಿಯನ್ನು
ಅಗ್ನಿ ದೇವಗೆ ಅಜೀರ್ಣವಾಗಿ
ಹೊಟ್ಟೆಯ ನೋವು ಬಂದಿತ್ತು
ಧನ್ವಂತರಿಯೆಂಬ ವೈದ್ಯರನ್ನು
ತಕ್ಷಣ ಕರೆಯಿಸಲಾಗಿತ್ತು
ಅಗ್ನಿದೇವನ ಪರೀಕ್ಷಿಸಿ ವೈದ್ಯರು
ಸಲಹೆಯೊಂದನು ಕೊಟ್ಟರು
ಉದರ ನೋವಿನ ಶಮನಕೆ ಔಷಧಿ
ಸಸ್ಯಗಳೇ ಮದ್ದು ಎಂದರು
ಖಾಂಡವ ವನದಲಿ ಗಿಡಮೂಲಿಕೆಗಳು
ಯಥೇಚ್ಛವಾಗಿ ದೊರೆಯುವವು
ಈಗಲೇ ಹೋಗಿ ವನವನು ಸವಿಯಲು
ನೋವಿಗೆ ಮುಕ್ತಿಯು ಲಭಿಸುವುದು
ವೈದ್ಯರ ಮಾತಿಗೆ ಮನ್ನಣೆ ಕೊಟ್ಟು
ಖಾಂಡವ ವನವನು ಧಹಿಸಲು
ಶುರುವನು ಹಚ್ಚಿದ ಅಗ್ನಿದೇವನು
ಔಷಧೀ ಸಸ್ಯಗಳೆಲ್ಲವನು
ವನವದು ಹೊತ್ತಿ ಉರಿಯಲು ಇಂದ್ರಗೆ
ಕೋಪವು ನೆತ್ತಿಗೆ ಏರಿತ್ತು
ತಡವನು ಮಾಡದೆ ವನದೊಳು ರಭಸದಿ
ಸುರಿಯಲು ತೊಡಗಿದ ಮಳೆಯನ್ನು
ಅಗ್ನಿದೇವನು ಓಡುತ ಹೋಗಿ
ಕಂಡನು ಕೃಷ್ಣಾರ್ಜುನರನ್ನು
ಖಾಂಡವ ವನವನು ಧಹಿಸಲು ತನಗೆ
ರಕ್ಷಣೆಯನ್ನು ಕೋರಿದನು
ಒಡನೆ ಅರ್ಜುನ ತನ್ನಯ ಬಾಣದಿ
ಗಗನಕೆ ಚಪ್ಪರ ತೊಡಿಸಿದನು
ಕೆಳಗಡೆ ಒಂದ್ಹನಿ ಬೀಳದ ಹಾಗೆ
ತಡೆಯನು ಮಳೆಗೆ ಒಡ್ಡಿದನು
ಇಂದ್ರನ ಸುತನಿಗೆ ಧನ್ಯತೆ ಅರ್ಪಿಸಿ
ನಿರ್ಭಯಗೊಂಡು ಅಗ್ನಿದೇವನು
ಖಾಂಡವ ವನವನು ಸುಟ್ಟು ಹಾಕಲು
ಸಂತಸದಿಂದಲಿ ತೊಡಗಿದನು
ಆ ವನದಲಿ ಇರುವಾ ಮರದಲಿ ಒಂದು
ಹಕ್ಕಿಯು ಆಶ್ರಯ ಪಡೆದಿತ್ತು
ಅಗ್ನಿದೇವನ ಉದರಕೆ ಆ ಮರ
ಆಹುತಿಯಾಗಲು ತೊಡಗಿತ್ತು
ಗಾಬರಿಗೊಂಡಾ ಹಕ್ಕಿಯು ಮರವನು
ಉಳಿಸಲು ಉಪಾಯ ಹೂಡಿತ್ತು
ಹತ್ತಿರ ಹರಿಯುವ ತೊರೆಯಲಿ ಮುಳುಗಿ
ರೆಕ್ಕೆಯ ನೆನೆಸಿ ತಂದಿತ್ತು
ನೆನೆದಾ ದೇಹದ ರೆಕ್ಕೆಗಳಿಂದಲಿ
ಮರಕೆ ನೀರನು ಸಿಡಿಸಿತ್ತು
ಹೊತ್ತಿದ ಅಗ್ನಿಗೆ ಹಕ್ಕಿಯ ಅಲ್ಪ
ನೀರದು ನಿಲುಕದೆ ಹೋಗಿತ್ತು
ಎಷ್ಟೋ ಹೊತ್ತು ಹಕ್ಕಿಯು ಹೀಗೆ
ಪ್ರಯಾಸವನ್ನು ಪಟ್ಟಿತ್ತು
ತನ್ನಯ ಪ್ರಾಣವು ಮರದಾ ಜೊತೆಗೆ
ದಹಿಸುವವರೆಗೂ ಶ್ರಮಿಸಿತ್ತು
ಹಕ್ಕಿಯ ಕಾಳಜಿ ಕಣ್ಣಾರೆ ಕಂಡ
ಇಂದ್ರನ ಮನವು ಕಲುಕಿತ್ತು
ಖಾಂಡವ ದಹನದ ಜೊತೆಯಲಿ ಹಕ್ಕಿಯ
ತ್ಯಾಗದ ಕತೆಯೂ ಬೆರೆತ್ತಿತ್ತು.
ಚಿತ್ರಗಳು; ಮದನ್‌ ಸಿ.ಪಿ.
.......
ಸೋಮಲಿಂಗ ಬೇಡರ ಆಳೂರ
ತಾಜಾ ಸುದ್ದಿಗಾಗಿ ಪ್ರಜಾವಾಣಿ ಟೆಲಿಗ್ರಾಂ ಚಾನೆಲ್ ಸೇರಿಕೊಳ್ಳಿ | ಪ್ರಜಾವಾಣಿ ಆ್ಯಪ್ ಇಲ್ಲಿದೆ: ಆಂಡ್ರಾಯ್ಡ್ | ಐಒಎಸ್ | ನಮ್ಮ ಫೇಸ್‌ಬುಕ್ ಪುಟ ಫಾಲೋ ಮಾಡಿ.