ಹೆಚ್ಚಿದ ಲಿಂಗತ್ವ ಅಸಮಾನತೆ ತಡೆಯಲು ಕ್ರಮ ಕೈಗೊಳ್ಳಿ

ಭಾರತದಲ್ಲಿ ಲಿಂಗತ್ವ ಅಸಮಾನತೆ ತೀವ್ರತರ ರೀತಿಯಲ್ಲಿ ಮುಂದುವರಿದಿದೆ. ವಿಶ್ವ ಆರ್ಥಿಕ ವೇದಿಕೆ (ಡಬ್ಲ್ಯುಇಎಫ್‌) ಕಳೆದ ವಾರ ಬಿಡುಗಡೆ ಮಾಡಿದ 2017ರ ಜಾಗತಿಕ ಲಿಂಗ ಅಸಮಾನತೆ ಸೂಚ್ಯಂಕದಲ್ಲಿ ಇದು ಮತ್ತೊಮ್ಮೆ ವ್ಯಕ್ತವಾಗಿದೆ. ಈ ಲಿಂಗತ್ವ ಅಂತರ ಸೂಚ್ಯಂಕದಲ್ಲಿ 144 ರಾಷ್ಟ್ರಗಳ ಪೈಕಿ ಭಾರತದ ಸ್ಥಾನ 108ರಲ್ಲಿದೆ. ಕಳೆದ ವರ್ಷ ಈ ಸೂಚ್ಯಂಕದಲ್ಲಿ ಭಾರತದ ಸ್ಥಾನ 87ರಲ್ಲಿತ್ತು. ಎಂದರೆ ಮತ್ತೆ 21 ಸ್ಥಾನಗಳಷ್ಟು ಇಳಿಕೆ ಕಂಡುಬಂದಿದೆ.

2006ರಲ್ಲಿ ಈ ಸೂಚ್ಯಂಕದ ಪ್ರಕಟಣೆ ಆರಂಭವಾದಾಗಲಿಂದ ಅತ್ಯಂತ ಕೆಳಗಿನ ಸ್ಥಾನ ಇದು ಎಂಬುದು ನಾವಿನ್ನೂ ಸಾಗಬೇಕಾಗಿರುವ ದಾರಿಗೆ ದಿಕ್ಸೂಚಿ. ಈ ಸೂಚ್ಯಂಕ ತಯಾರಿಗೆ ಆರೋಗ್ಯ, ಶಿಕ್ಷಣ, ಉದ್ಯೋಗ ಹಾಗೂ ರಾಜಕೀಯ ಕ್ಷೇತ್ರಗಳನ್ನು ವಿಶ್ಲೇಷಣೆಗೆ ಒಳಪಡಿಸಲಾಗಿದೆ. ರಾಜಕೀಯ ಅಧಿಕಾರ, ಉದ್ಯೋಗ, ಆರೋಗ್ಯಕರ ಜೀವನ ನಿರೀಕ್ಷೆ ಮತ್ತು ಸಾಕ್ಷರತೆ ವಿಚಾರಗಳಲ್ಲಿ ಲಿಂಗತ್ವ ಅಸಮಾನತೆ ಹೆಚ್ಚಿರುವುದು ಜಾಗತಿಕ ಸೂಚ್ಯಂಕದಲ್ಲಿ ಭಾರತದ ಸ್ಥಾನ ಕುಸಿಯಲು ಕಾರಣ ಎಂದು ವರದಿ ಹೇಳಿದೆ. ಹೆಣ್ಣುಮಗು ಹುಟ್ಟಲು ಅವಕಾಶವೇ ಇಲ್ಲದ ಸ್ಥಿತಿ ಭಾರತದಲ್ಲಿದೆ. ಲಿಂಗಾನುಪಾತ ಕುಸಿತದ ವಿರುದ್ಧದ ಭಾರತದ ಹೋರಾಟ ಇನ್ನೂ ಫಲ ನೀಡಿಲ್ಲ.

ಹೆಣ್ಣುಮಕ್ಕಳು ಶಿಕ್ಷಣ ಪಡೆದುಕೊಳ್ಳುವುದು ಜಾಸ್ತಿಯಾಗುತ್ತಿದ್ದರೂ ಉದ್ಯೋಗ ಕ್ಷೇತ್ರದಲ್ಲಿ ಮಹಿಳೆಯ ಪಾಲ್ಗೊಳ್ಳುವಿಕೆ ಶೇ 27ರಷ್ಟು ಕಡಿಮೆ ಪ್ರಮಾಣದಲ್ಲಿದೆ ಎಂಬುದು ಆತಂಕಕಾರಿ ವಿದ್ಯಮಾನ. 2004–05 ಹಾಗೂ 2011–12ರ ನಡುವೆ ಸುಮಾರು 1.96 ಕೋಟಿ ಮಹಿಳೆಯರು ಉದ್ಯೋಗ ಕ್ಷೇತ್ರದಿಂದ ಹೊರಗುಳಿದಿದ್ದಾರೆ. ಅಷ್ಟೇ ಅಲ್ಲ ಪುರುಷರು ಹಾಗೂ ಮಹಿಳೆಯರು ಸಮಾನ ಕೆಲಸ ನಿರ್ವಹಿಸಿದರೂ ಮಹಿಳೆಗೆ ಕಡಿಮೆ ವೇತನ ನೀಡುವುದೂ ಮುಂದುವರಿದಿದೆ ಎಂಬುದನ್ನು ವಿಶ್ವ ಆರ್ಥಿಕ ವೇದಿಕೆ ವರದಿ ಎತ್ತಿ ಹೇಳಿದೆ. ಮಹಿಳೆಯರು ಮಾಡುವ ಬಹುತೇಕ ಕೆಲಸಕ್ಕೆ ಬೆಲೆ ಇಲ್ಲ. ಮನೆಯಲ್ಲಿ, ಹೊಲ ಗದ್ದೆಗಳಲ್ಲಿ ಹಾಗೂ ಶಿಶುಪಾಲನೆಯಲ್ಲಿ ಅವರ ಶ್ರಮ ಅಗೋಚರ. ಈ ಮಾನವ ಸಂಪನ್ಮೂಲ ಪರಿಗಣನೆಗೇ ಬರುವುದಿಲ್ಲ ಎಂಬುದು ವಿಷಾದನೀಯ. ಕೃಷಿ ಕ್ಷೇತ್ರದ ಬಿಕ್ಕಟ್ಟು ಮತ್ತು ಕಳೆದ ವರ್ಷ ಅಧಿಕ ಮೌಲ್ಯದ ನೋಟು ರದ್ದತಿ, ಮಹಿಳೆಯ ಆರ್ಥಿಕ ಸ್ಥಿತಿಗತಿ ಮೇಲೆ ಬೀರಿದ ಪರಿಣಾಮವೂ ಈ ಅಸಮಾನತೆ ಹೆಚ್ಚಾಗಲು ಕಾರಣವಾಗಿದೆಯೇ ಎಂಬುದರ ವಿಶ್ಲೇಷಣೆ ಆಗಬೇಕು. ದಶಕಗಳ ಆರ್ಥಿಕ ಪ್ರಗತಿ ಮಹಿಳೆಯ ಬದುಕಿನಲ್ಲಿ ಮಾಡಿರುವ ಬದಲಾವಣೆಗಳೇನು ಎಂಬುದು ಗಂಭೀರವಾದ ಪ್ರಶ್ನೆ.