ಮತ್ತೊಂದು ಹುಲಿಯ ಹೆಜ್ಜೆ ಗುರುತು ಪತ್ತೆ

ಈ ಮಧ್ಯೆ ಗ್ರಾಮದಲ್ಲಿ ಮೇಕೆಯೊಂದನ್ನು ಚಿರತೆ ತಿಂದು ಹಾಕಿದೆ. ಆರಂಭದಲ್ಲಿ ಇದು ಹುಲಿಯದೇ ಕೃತ್ಯ ಎಂದು ಶಂಕಿಸಲಾಗಿತ್ತು. ಆದರೆ, ಪ್ರತ್ಯಕ್ಷದರ್ಶಿಗಳು ಮೇಕೆಯನ್ನು ಚಿರತೆ ತಿನ್ನುತ್ತಿದ್ದ ದೃಶ್ಯ ನೋಡಿದ್ದಾಗಿ ತಿಳಿಸಿದ್ದಾರೆ.

ಕಾರ್ಯಾಚರಣೆ ಸ್ಥಗಿತ: ಸೋಮವಾರ ಮುಂಜಾನೆ 6 ಗಂಟೆಯಿಂದಲೇ ಹುಲಿ ಪತ್ತೆ ಕಾರ್ಯಾಚರಣೆಯನ್ನು ದಸರಾ ಆನೆಗಳ ಸಹಾಯದಿಂದ ಆರಂಭಿಸಲಾಯಿತು. ಇದರಲ್ಲಿ ಅರ್ಜುನ, ಅಭಿಮನ್ಯು ಹಾಗೂ ಕೃಷ್ಣ ಆನೆಗಳು ಭಾಗಿಯಾಗಿದ್ದವು. ಆದರೆ, ಮಧ್ಯಾಹ್ನದವರೆಗೂ ಹುಲಿ ಕುರಿತು ಹೆಜ್ಜೆ ಗುರುತುಗಳಾಗಲಿ ಅಥವಾ ಮತ್ತಾವುದೇ ಸುಳಿವುಗಳು ದೊರೆಯದೆ ಇದ್ದುದರಿಂದ ಕಾರ್ಯಾಚರಣೆಯನ್ನು ನಿಲ್ಲಿಸಲಾಯಿತು.

ಜಂಗಲ್‌ಲಾಡ್ಜ್‌ನಿಂದ ಹೊರಕ್ಕೆ ಹುಲಿ?
ಹೊಸದಾಗಿ ಅಳವಡಿಸಲಾಗಿದ್ದ ನಾಲ್ಕು ಕ್ಯಾಮೆರಾಗಳ ಪೈಕಿ 2 ಕ್ಯಾಮೆರಾದಲ್ಲಿ ಹುಲಿಯು ಜಂಗಲ್ ಲಾಡ್ಜ್‌ನಿಂದ ಹೊರ ಹೋಗುತ್ತಿರುವುದು ಕಂಡು ಬಂದಿದೆ ಎಂದು ಹೇಳಲಾಗಿದೆ. ಆದರೆ, ಈ ವಿಷಯವನ್ನು ಅಧಿಕಾರಿಗಳು ದೃಢಪಡಿಸಿಲ್ಲ.

ಬೋಟ್ ಮೂಲಕ ಕಾರ್ಯಾಚರಣೆ: ಕ್ಯಾಮೆರಾದಲ್ಲಿ ಸೆರೆಯಾದ ಹುಲಿ ಹೊರಗಡೆ ಹೋದ ಜಾಗದಲ್ಲಿ ಕಬಿನಿ ಹಿನ್ನೀರು ಇದ್ದು, ಅರಣ್ಯ ಇಲಾಖೆ ಸಿಬ್ಬಂದಿ ಜಂಗಲ್ ಲಾಡ್ಜ್‌ನ ಬೋಟುಗಳ ಮೂಲಕ ಎರಡೂ ಕಡೆಯ ದಂಡೆಯನ್ನು ಪರಿಶೀಲಿಸಿದರು. ಆದರೆ, ಇಲ್ಲಿಯೂ ಹುಲಿಯ ಯಾವುದೇ ಹೆಜ್ಜೆ ಗುರುತುಗಳು ಕಂಡು ಬಂದಿಲ್ಲ ಎಂದು ಅಧಿಕಾರಿಗಳು ತಿಳಿಸಿದ್ದಾರೆ.

ಹುಲಿ ಕಾಣಿಸಿಕೊಳ್ಳದ ಹಿನ್ನೆಲೆಯಲ್ಲಿ ಅಧಿಕಾರಿಗಳು ಕೆಲ ಅರಣ್ಯ ಸಿಬ್ಬಂದಿಯನ್ನು ಸ್ಥಳದಲ್ಲಿ ಬಿಟ್ಟು ತಮ್ಮ ತಮ್ಮ ಸ್ವಸ್ಥಾನಕ್ಕೆ ತೆರಳಿದ್ದಾರೆ. ಆನೆಗಳನ್ನೂ ಶಿಬಿರಗಳಿಗೆ ಕಳುಹಿಸಲಾಗಿದೆ.‌ ಎ.ಪಿ.ಸಿ.ಸಿ.ಎಫ್ ಜಯರಾಮ್, ಪಿ.ಸಿ.ಸಿ.ಎಫ್ ಪೊನ್ನಾಟಿ ಶ್ರೀಧರ್, ನಾಗರಹೊಳೆ ವನ್ಯಜೀವಿ ವಲಯದ ಕೃತಿಕಾ, ರಾಜಕುಮಾರ್, ಅಂತರಸಂತೆ ಸಹಾಯಕ ಅರಣ್ಯ ಸಂರಕ್ಷಣಾಧಿಕಾರಿ ಪೂವಯ್ಯ, ಎಸ್.ಟಿ.ಪಿ.ಎಫ್ ಸಹಾಯಕ ಅರಣ್ಯ ಸಂರಕ್ಷಣಾಧಿಕಾರಿ ಶಂಕರೇಗೌಡ, ಡಿ.ಬಿ.ಕುಪ್ಪೆ ವಲಯ ಅರಣ್ಯಾಧಿಕಾರಿ ಸುಬ್ರಹ್ಮಣ್ಯ, ಅಂತರಸಂತೆ ವಲಯಾರಣ್ಯಾಧಿಕಾರಿ ವಿನಯ್, ಮೇಟಿಕುಪ್ಪೆ ವಲಯಾರಣ್ಯಾಧಿಕಾರಿ ಶರಣಬಸಪ್ಪ. ವೈದ್ಯ ಮುಜೀಬು ರೆಹಮಾನ್ ಕಾರ್ಯಾಚರಣೆಯಲ್ಲಿದ್ದರು.

ಕಳೆದ ಕೆಲ ದಿನಗಳ ಹಿಂದೆ ಬಂಡೀಪುರ ಅರಣ್ಯದ ಹೆಡಿಯಾಲ ವ್ಯಾಪ್ತಿಯ ಬರಗಿ ಹಾಗೂ ನಾಗರಹೊಳೆ ಅರಣ್ಯ ವ್ಯಾಪ್ತಿಯ ಅಂತರಸಂತೆ ವಲಯ ಅಂತರಸಂತೆಯ ಜಮೀನುಗಳಲ್ಲಿ ಹುಲಿ ಹಾಣಿಸಿಕೊಂಡು ಆತಂಕ ಸೃಷ್ಟಿಸಿದ್ದವು, ಅರಣ್ಯ ಇಲಾಖೆ ಸಿಬ್ಬಂದಿ ಕಾರ್ಯಾಚರಣೆ ನಡೆಸಿ 2 ಹುಲಿಗಳನ್ನು ಒಂದೊಂದು ದಿನಗಳ ಅಂತರದಲ್ಲಿ ಸೆರೆ ಹಿಡಿಯುವಲ್ಲಿ ಯಶಸ್ವಿಯಾಗಿದ್ದರು.