ಇದು ವಿಚಿತ್ರವಾದ ಫೋಟೊ ಶೂಟ್. ಸಾಮಾನ್ಯವಾಗಿ ಫೋಟೊ ಶೂಟ್ ಎಂದರೆ ಫೋಟೊ ತೆಗೆಯುವವನು ಮತ್ತು ತೆಗೆಸಿಕೊಳ್ಳುವವರು ಮುಖ್ಯವಾಗಿ ಇರುತ್ತಾರೆ. ವಾಸ್ತವಿಕವಾಗಿ ಇಲ್ಲಿ ನಡೆಯುತ್ತಿರುವುದು ಗರ್ಭಿಣಿಯ ಫೋಟೊ ಶೂಟ್. ಇಲ್ಲಿ ಒಬ್ಬ ವಿಶೇಷ ಅತಿಥಿ ಇದ್ದಾರೆ. ಅವರೇ ಈ ಶೂಟ್‌ನ ಪ್ರಮುಖ ಆಕರ್ಷಣೆ. ಅವರೇ ಜೇನುನೊಣಗಳು!
ಈ ಫೋಟೊ ಶೂಟ್‌ನ ಹೆಸರು ‘ಬೆಲ್ಲಿ ಬೀ’ ಎಮಿಲಿ ಮುಲ್ಲರ್, 33 ವರ್ಷದ ಈ ಮಹಿಳೆ ಈ ಸಾಹಸ ಮಾಡಿದವರು. ಇವರು ವೃತ್ತಿಪರ ಜೇನು ಕೃಷಿಕರು. ಆದ್ದರಿಂದಲೇ ಇವರಿಗೆ ಜೇನು ನೊಣಗಳ ಗುಣಗಳು ತಿಳಿದಿವೆ. ‘Mueller Honey Bee’ ಎಂಬ ಕಂಪೆನಿಯನ್ನೂ ನಡೆಸುತ್ತಿದ್ದಾರೆ.
ಈ ರೀತಿಯ ಫೋಟೊ ಶೂಟ್ ಮಾಡಿಸಿಕೊಳ್ಳುವ ಕಾರಣ ಕೇಳಿದರೆ, ‘ಜೇನು ನೊಣಗಳು ಬದುಕು ಮತ್ತು ಸಾವು ಎರಡನ್ನೂ ಪ್ರತಿನಿಧಿಸುತ್ತವೆ. ಈ ಹಿಂದೆ ಮೂರು ಬಾರಿ ಗರ್ಭಪಾತವಾಗಿತ್ತು. ನಾಲ್ಕನೆಯ ಬಾರಿಗೆ ನಾನು ಗರ್ಭ ಧರಿಸಿರುವ ಕಾರಣ ಈ ಫೋಟೊ ಶೂಟ್ ನನ್ನ ಆ ಮೂರು ಮಕ್ಕಳಿಗಾಗಿ’.
ಈ ಶೂಟ್ ನನಗೆ ಆಧ್ಯಾತ್ಮಿಕ ಅನುಭವವನ್ನು ನೀಡಿತು. ಇದರ ಜೊತೆಯಲ್ಲಿ ಜೇನು ನೊಣಗಳ ಸಂರಕ್ಷಣೆಯ ಸಣ್ಣ ಪ್ರಯತ್ನವೂ ಆಗಿದೆ ಎನ್ನುತ್ತಾರೆ ಎಮಿಲಿ. ಅಂದಹಾಗೆ, ಈ ಶೂಟ್ ಮಾಡಿದವರು ಕೆನ್‌ಡ್ರಾ ಡಮಿಸ್‌.
