ಲಖನೌ: ಸಮವಸ್ತ್ರ ಧರಿಸದೆ ಜೀನ್ಸ್ ತೊಟ್ಟು ಶಾಲೆಗೆ ಬಂದ ವಿದ್ಯಾರ್ಥಿಯ ಜೀನ್ಸ್ನ್ನು ಶಾಲಾ ಸಿಬ್ಬಂದಿ ಕತ್ತರಿಸಿದ್ದು, ಇದರಿಂದ ಗಾಯಗೊಂಡ ವಿದ್ಯಾರ್ಥಿ ನಡೆದಾಡಲು ಕಷ್ಟಪಡುವಂತಾಗಿದೆ.
ಈ ಘಟನೆ ಕಾನ್ಪುರದ ಸಿಕಂಧರ್ನಲ್ಲಿ ನಡೆದಿದ್ದು, ಪೊಲೀಸ್ ಠಾಣೆಯಲ್ಲಿ ದೂರು ದಾಖಲಿಸಲಾಗಿದೆ.
ಪರೀಕ್ಷೆಯ ದಿನ ವಿದ್ಯಾರ್ಥಿ ಸಮವಸ್ತ್ರ ಧರಿಸದೆ ಶಾಲೆಗೆ ಜೀನ್ಸ್, ಶರ್ಟ್ ಹಾಕಿಕೊಂಡು ಬಂದಿದ್ದ. ಇದರಿಂದ ಕೋಪಗೊಂಡ ಶಾಲಾ ನಿರ್ವಾಹಕ ಎರಡು ಕತ್ತರಿ ತೆಗೆದುಕೊಂಡು ವಿದ್ಯಾರ್ಥಿಯ ಜೀನ್ಸ್ ಕತ್ತರಿಸಿದ್ದಾರೆ. ಈ ವೇಳೆ ವಿದ್ಯಾರ್ಥಿಯ ಎರಡು ತೊಡೆಗಳಿಗೆ ಗಾಯವಾಗಿದೆ.
‘ನನ್ನ ಮಗನ ಮಾತುಗಳನ್ನು ಕೇಳಿಸಿಕೊಳ್ಳದ ಶಾಲಾ ಸಿಬ್ಬಂದಿ ಕತ್ತರಿಯಿಂದ ಜೀನ್ಸ್ ಕತ್ತರಿಸಿದ್ದಾರೆ. ಆಗ ಮಗನಿಗೆ ಗಾಯವಾಗಿದೆ. ಅಲ್ಲದೇ ಮಗನನ್ನು ಸಮವಸ್ತ್ರ ಧರಿಸಿ ಬಂದರೆ ಮಾತ್ರ ಶಾಲೆಗೆ ಪ್ರವೇಶ ನೀಡುವಂತೆ ಹೇಳಿ ಮನೆಗೆ ಕಳುಹಿಸಿದ್ದಾರೆ. ಇವರ ವರ್ತನೆ ಸರಿಯಲ್ಲ’ ಎಂದು ವಿದ್ಯಾರ್ಥಿಯ ತಂದೆ ವಿನೋದ್ ಪಾಲ್ ಹೇಳಿದ್ದಾರೆ.