ಸಿದ್ದರಾಮಯ್ಯ ಪ್ರಧಾನಿಯಾದರೆ ಅಚ್ಚರಿಪಡಬೇಕಿಲ್ಲ– ಧರ್ಮಸೇನ

ವಿರೋಧ ಪಕ್ಷಗಳು ಸಿದ್ದರಾಮಯ್ಯ ಪ್ರಧಾನಮಂತ್ರಿ ಹುದ್ದೆಯ ಆಕಾಂಕ್ಷಿ ಎಂದು ವ್ಯಂಗ್ಯ ಮಾಡುತ್ತಿವೆ. ಆದರೆ, ನರೇಂದ್ರ ಮೋದಿ ಪ್ರಧಾನಿಯಾಗುತ್ತಾರೆ ಎಂದು ಯಾರಾದರೂ ಕನಸು ಕಂಡಿದ್ದರಾ? ಪ್ರಧಾನಿ ಹುದ್ದೆಗೆ ಏರುವ ಎಲ್ಲ ಸಾಮರ್ಥ್ಯ ಸಿದ್ದರಾಮಯ್ಯ ಅವರಲ್ಲಿದೆ ಎಂದು ಅವರು ಹೇಳಿದರು.

ಸಿದ್ದರಾಮಯ್ಯ ಕುರಿತು ಬಿಜೆಪಿಯಲ್ಲಿ ಭಯ: ‘ಬೆಳಗಾವಿಯಲ್ಲಿ ನಡೆಯುತ್ತಿರುವ ವಿಧಾನಸಭಾ ಅಧಿವೇಶನದಲ್ಲಿ ಬಿಜೆಪಿ ಶಾಸಕರು ಊಟದ ವೇಳೆ ಮಾತನಾಡುತ್ತಾ, ಗುಜರಾತ್ ಸೇರಿದಂತೆ ಇತರೆ ರಾಜ್ಯಗಳಲ್ಲಿ ಬಿಜೆಪಿಗೆ ಗೆಲುವು ಸುಲಭವಾಗಲಿದೆ. ಆದರೆ, ಕರ್ನಾಟಕದಲ್ಲಿ ಸಿದ್ದರಾಮಯ್ಯ ಇರುವುದರಿಂದ ಗೆಲುವು ಕಷ್ಟ. ಒಂದು ವೇಳೆ ಸಿದ್ದರಾಮಯ್ಯ ಇಲ್ಲದಿದ್ದರೆ ಗೆಲುವು ಸುಲಲಿತವಾಗುತ್ತಿತ್ತು ಎಂದು ಹೇಳಿದರು. ಇದು ಸಿದ್ದರಾಮಯ್ಯ ಅವರನ್ನು ಕುರಿತು ಬಿಜೆಪಿಗಿರುವ ಭೀತಿಯನ್ನು ತೋರ್ಪಡಿಸುತ್ತದೆ’ ಎಂದು ಧರ್ಮಸೇನ ತಿಳಿಸಿದರು.

‘ಲೋಕೋಪಯೋಗಿ ಸಚಿವ ಎಚ್.ಸಿ.ಮಹದೇವಪ್ಪ ಸಿದ್ದರಾಮಯ್ಯ ಅವರೊಂದಿಗೆ ಮಾತನಾಡುತ್ತಾ, ಮುಂಬರುವ ವಿಧಾನಸಭಾ ಚುನಾವಣೆಯಲ್ಲಿ ಕಾಂಗ್ರೆಸ್‌ಗೆ ಕನಿಷ್ಠ 100 ಸ್ಥಾನ ಬರಬಹುದು ಎಂದು ಹೇಳಿದರು. ಇದಕ್ಕೆ ಪ್ರತಿಕ್ರಿಯಿಸಿದ ಸಿದ್ದರಾಮಯ್ಯ ಕನಿಷ್ಠ 120 ಸ್ಥಾನ ಬರಲಿದೆ ಎಂದು ಹೇಳಿದರು. ಇದು ಸಿದ್ದರಾಮಯ್ಯ ಅವರಲ್ಲಿರುವ ವಿಶ್ವಾಸವನ್ನು ತೋರಿಸುತ್ತದೆ’ ಎಂದರು.

ಅನಂತಕುಮಾರ್ ಹೆಗಡೆ ಅಯೋಗ್ಯ– ಧರ್ಮಸೇನ
ಸಂಸದ ಅನಂತಕುಮಾರ್ ಹೆಗಡೆ ಅಯೋಗ್ಯ. ಮುಖ್ಯಮಂತ್ರಿ ಕುರಿತು ಅವರು ಹೇಳಿರುವ ಮಾತುಗಳು ಮತದಾರರಿಗೆ ಮಾಡಿದ ಅವಮಾನ ಎಂದು ಧರ್ಮಸೇನ ಕಿಡಿಕಾರಿದರು.

‘ಅಟಲ್‌ ಬಿಹಾರಿ ವಾಜಪೇಯಿ ಒಳ್ಳೆಯ ಕೆಲಸಗಳನ್ನು ಮಾಡಿದ್ದಾರೆ ಎಂದು ಕಾಂಗ್ರೆಸ್‌ ಸಹ ಸ್ವಾಗತಿಸುತ್ತದೆ. ಇದು ನಮ್ಮ ಪಕ್ಷದ ಸಂಸ್ಕೃತಿ. ಆದರೆ, ಸಿದ್ದರಾಮಯ್ಯ ಮಾಡಿರುವ ಒಳ್ಳೆಯ ಕಾರ್ಯಕ್ರಮಗಳನ್ನು ಬಿಜೆಪಿ ಸ್ವಾಗತಿಸುತ್ತಿಲ್ಲ. ಬದಲಿಗೆ, ಕೀಳು ಮಾತಿನಲ್ಲಿ ನಿಂದಿಸುತ್ತಿದೆ. ಇದು ಅವರ ಪಕ್ಷದ ಸಂಸ್ಕೃತಿ’ ಎಂದು ಟೀಕಿಸಿದರು.