ಹರಾರೆ: ಜಿಂಬಾಬ್ವೆ ಅಧ್ಯಕ್ಷ ಹುದ್ದೆ ತೊರೆಯಲು ನಿರಾಕರಿಸಿರುವ ರಾಬರ್ಟ್ ಮುಗಾಬೆ ವಿರುದ್ಧ ಮಂಗಳವಾರದಿಂದ ವಾಗ್ದಂಡನೆ ಪ್ರಕ್ರಿಯೆ ಆರಂಭವಾಗಲಿದೆ. ಅದರ ಟಿಪ್ಪಣಿಯೂ ಸಿದ್ಧವಾಗಿದೆ.
ಅಸ್ಥಿರತೆಯ ಮೂಲ: ‘ಮುಗಾಬೆ ಅಸ್ಥಿರತೆಯ ಮೂಲ. ಅವರು ದೇಶದ ಕಾನೂನಿಗೆ ಅಗೌರವ ತೋರಿದ್ದಾರೆ. ಕಳೆದ 15 ವರ್ಷಗಳಲ್ಲಿ ದೇಶದ ಆರ್ಥಿಕತೆಯನ್ನು ಅವರು ದಿಕ್ಕುತಪ್ಪಿಸಿದ್ದಾರೆ’ ಎಂದು ಆಡಳಿತಾರೂಢ ಪಕ್ಷ ಸಿದ್ಧಪಡಿಸಿರುವ ವಾಗ್ದಂಡನೆ ನಿಲುವಳಿ ಟಿಪ್ಪಣಿಯಲ್ಲಿ ಉಲ್ಲೇಖಿಸಲಾಗಿದೆ.
ಬಗ್ಗದ ಮುಗಾಬೆ: ಅಧ್ಯಕ್ಷ ಹುದ್ದೆ ತೊರೆಯಲು ಸೋಮವಾರ ಮಧ್ಯಾಹ್ನದವರೆಗೆ ನೀಡಿದ್ದ ಗಡುವನ್ನು ರಾಬರ್ಟ್ ಮುಗಾಬೆ ಮುರಿದಿದ್ದಾರೆ. ರಾಜೀನಾಮೆ ನೀಡಿ ಅಥವಾ ವಾಗ್ದಂಡನೆ ಎದುರಿಸಿ ಎಂದು ಆಡಳಿತಾರೂಢ ಪಕ್ಷ ತಾಕೀತು ಮಾಡಿದ್ದರೂ, ಅವರು ಬಗ್ಗಿಲ್ಲ.
