ಹಫ್ತಾ ವಸೂಲಿಗೆ ಬೇಸತ್ತು ಕೊಲೆ: ಐವರ ಸೆರೆ

ನಂದಿನಿ ಲೇಔಟ್‌ನ ಜಯಮಾರುತಿ ನಗರದ ರಾಕೇಶ್ ಅಲಿಯಾಸ್ ರಾಖಿ (22), ಮಣಿ (25), ವಿನಯ್ ಅಲಿಯಾಸ್ ವಿನಿ (20), ಕಮ್ಮಗೊಂಡನಹಳ್ಳಿಯ ರಾಜಶೇಖರ್ ಅಲಿಯಾಸ್ ಶೇಖರ್ (26) ಹಾಗೂ ಮಾರಣ್ಣ ಲೇಔಟ್‌ನ ಚಂದನ್ ಅಲಿಯಾಸ್ ಚಂದು (25) ಬಂಧಿತರು.

‘ಆ್ಯಂಡ್ರೋಸ್ ಅವರ ಸ್ನೇಹಿತರ ವಿಚಾರಣೆಯಿಂದ ಆರೋಪಿಗಳ ಬಗ್ಗೆ ಸುಳಿವು ಸಿಕ್ಕಿತು. ಅದರಂತೆ ಆರೋಪಿಗಳನ್ನು ವಶಕ್ಕೆ ಪಡೆದು ವಿಚಾರಣೆ ನಡೆಸಿದೆವು. ಆ್ಯಂಡ್ರೋಸ್, ಆಟೊ ನಿಲ್ದಾಣದ ಇತರ ಆಟೊ ಚಾಲಕರನ್ನು ಬೆದರಿಸಿ ಪ್ರತಿ ತಿಂಗಳು ಹಫ್ತಾ ವಸೂಲಿ ಮಾಡುತ್ತಿದ್ದರು. ದಿನೇ ದಿನೇ ಅವರ ಉಪಟಳ ಹೆಚ್ಚಾಗಿತ್ತು. ಹೀಗಾಗಿ, ಹತ್ಯೆ ಮಾಡಿದೆವು’ ಎಂದು ಆರೋಪಿಗಳು ತಪ್ಪೊಪ್ಪಿಕೊಂಡಿದ್ದಾರೆ ಎಂದು ಪೊಲೀಸರು ತಿಳಿಸಿದರು.

ಹತ್ಯೆಗೂ ಮುನ್ನ 15 ದಿನಗಳ ಹಿಂದೆ ನಡೆದ ಗಲಾಟೆಯಲ್ಲಿ ಮಣಿಗೆ ಆ್ಯಂಡ್ರೋಸ್ ಹಿಗ್ಗಾಮುಗ್ಗಾ ಥಳಿಸಿದ್ದರು. ಇದೇ ಕಾರಣಕ್ಕೆ ಹತ್ಯೆ ಮಾಡಲು ಆರೋಪಿ ನಿರ್ಧರಿಸಿದ್ದ. ಪ್ರತಿನಿತ್ಯ ಮದ್ಯ ಕೊಡಿಸುವಂತೆ ಹಾಗೂ ಹಣ ನೀಡುವಂತೆ ಆ್ಯಂಡ್ರೋಸ್ ತೊಂದರೆ ಕೊಡುತ್ತಿದ್ದರಿಂದ ಬೇಸತ್ತಿದ್ದ ಇತರ ಆರೋಪಿಗಳು ಮಣಿ ನಿರ್ಧಾರಕ್ಕೆ ಬೆಂಬಲ ನೀಡಿದ್ದರು ಎಂದು ಪೊಲೀಸರು ತಿಳಿಸಿದರು.

ಶ್ರೀರಾಂಪುರ ನಿವಾಸಿಯಾದ ಆ್ಯಂಡ್ರೋಸ್ ಸ್ನೇಹಿತನ ಭೇಟಿಗೆಂದು ಪಶ್ಚಿಮ ಕಾರ್ಡ್‌ ರಸ್ತೆಗೆ ಬರುತ್ತಿದ್ದರು. ಅಲ್ಲಿಗೆ ಬಂದ ಆರೋಪಿಗಳು ಮಚ್ಚು–ಲಾಂಗುಗಳಿಂದ ಹಲ್ಲೆ ನಡೆಸಿದ್ದರು. ಬಳಿಕ ತಲೆ ಮೇಲೆ ಕಲ್ಲು ಎತ್ತಿಹಾಕಿ ಪರಾರಿಯಾಗಿದ್ದರು ಎಂದು ಹೇಳಿದರು.