ರಾಘವೇಂದ್ರಸ್ವಾಮಿ ದರ್ಶನ ಪಡೆದ ನಟ ರಜನಿಕಾಂತ್‌

ಮಠದ ಪ್ರಾಂಗಣದೊಳಗೆ ಬರುವ ಪೂರ್ವ ಮಂತ್ರಾಲಯದ ಗ್ರಾಮದೇವತೆ ಮಂಚಾಲಮ್ಮ ದೇವಿ ಹಾಗೂ ಆಂಜನೇಯಸ್ವಾಮಿಗೆ ಮೊದಲು ನಮಸ್ಕರಿಸಿ, ಆನಂತರ ರಾಘವೇಂದ್ರ ಸ್ವಾಮಿಗಳ ದರ್ಶನ ಮಾಡಿದರು. ಪೀಠಾಧಿಪತಿ ಸುಬುಧೇಂದ್ರ ತೀರ್ಥರನ್ನು ಭೇಟಿ ಮಾಡಿ ಆಶೀರ್ವಾದ ಪಡೆದುಕೊಂಡರು. ಮಠದಿಂದ ನಡೆಯುತ್ತಿರುವ ವಿವಿಧ ಅಭಿವೃದ್ಧಿ ಕೆಲಸಗಳ ಕುರಿತಾಗಿ ಸುಮಾರು 10 ನಿಮಿಷ ಸ್ವಾಮೀಜಿಯವರ ಮಾತುಗಳನ್ನು ಆಲಿಸಿದರು.

‘ಈಗ ತಾವು ತುರ್ತಾಗಿ ಹೋಗುತ್ತಿದ್ದೀರಿ ಎಂದು ತಿಳಿದುಕೊಂಡಿದ್ದೇನೆ. ಮತ್ತೊಮ್ಮೆ ಬಿಡುವು ಮಾಡಿಕೊಂಡು ಬಂದು ಮಠದ ಅಭಿವೃದ್ಧಿ ಕೆಲಸಗಳನ್ನು ವೀಕ್ಷಿಸಬೇಕು. ಇದರಿಂದ ನಮಗೂ ಸಂತೋಷವಾಗುತ್ತದೆ’ ಎಂದು ಸುಬುಧೇಂದ್ರ ತೀರ್ಥರು ತಿಳಿಸಿದರು.

‘ಗಡಿಬಿಡಿ ಏನಿಲ್ಲ. ಮಠದೊಳಗೆ ಜನಸಂದಣಿ ಹೆಚ್ಚಾಗಿ ಬಿಡುತ್ತದೆ. ಮತ್ತೊಮ್ಮೆ ಬರುತ್ತೇನೆ’ ಎಂದು ನಟ ರಜನಿಕಾಂತ್‌ ಅವರು ಸ್ವಾಮೀಜಿಗಳಿಗೆ ಹೇಳಿದರು. ಸುಬುಧೇಂದ್ರ ತೀರ್ಥರು ರಜನಿಕಾಂತ್‌ ಅವರಿಗೆ ಶಾಲು ಹೊದಿಸಿ ಸನ್ಮಾನಿಸಿ, ಪರಿಮಳ ಪ್ರಸಾದ, ತುಳಸಿಮಣಿ ಹಾಗೂ ಬೃಂದಾವನ ಪ್ರತಿಮೆಯೊಂದನ್ನು ನೆನಪಿನ ಕಾಣಿಕೆಯಾಗಿ ನೀಡಿದರು.

ರಜನಿಕಾಂತ್‌ ಅವರು ಮಂತ್ರಾಲಯಕ್ಕೆ ಮಠಕ್ಕೆ ಈ ಮೊದಲು ಅನೇಕ ಸಲ ಭೇಟಿ ನೀಡುತ್ತಾ ಬಂದಿದ್ದಾರೆ. ಸುಬುಧೇಂದ್ರ ತೀರ್ಥರು ಪೀಠಾಧಿಪತಿಗಳಾದ ನಂತರದಲ್ಲಿ ಇದೇ ಮೊದಲ ಸಲದ ಭೇಟಿಯಾಗಿದೆ. ಮಠಕ್ಕೆ ರಜನಿಕಾಂತ್‌ ಅವರು ಭೇಟಿ ನೀಡುತ್ತಿರುವ ಕುರಿತು ಮಠದ ಅಧಿಕಾರಿಗಳಿಗೆ ಯಾವುದೇ ಸೂಚನೆ ಇರಲಿಲ್ಲ. ಸಾಮಾನ್ಯರಂತೆ ಮಠಕ್ಕೆ ಬಂದು ಆಶೀರ್ವಾದ ಪಡೆದು ಮರಳಿದರು.