ಸೌತ್‌ ಯುನೈಟೆಡ್‌ಗೆ ಗೆಲುವು

ಅಶೋಕ ನಗರದಲ್ಲಿರುವ ಬೆಂಗಳೂರು ಫುಟ್‌ಬಾಲ್‌ ಕ್ರೀಡಾಂಗಣದಲ್ಲಿ ಮಂಗಳವಾರ ನಡೆದ ಪಂದ್ಯದಲ್ಲಿ ಸೌತ್‌ ಯುನೈಟೆಡ್‌ 3–2 ಗೋಲುಗಳಿಂದ ಆರ್‌ಡಬ್ಲ್ಯುಎಫ್‌ ಎಫ್‌ಸಿ ತಂಡವನ್ನು ಸೋಲಿಸಿತು.

ಆರಂಭದಿಂದಲೇ ಆಕ್ರಮಣಕಾರಿ ಆಟಕ್ಕೆ ಮುಂದಾದ ಸೌತ್‌ ಯುನೈಟೆಡ್‌ ತಂಡಕ್ಕೆ 37ನೇ ನಿಮಿಷದಲ್ಲಿ ಮುನ್ನಡೆ ಲಭಿಸಿತು. ಸುಭಾಷ್‌ ಆಕರ್ಷಕ ರೀತಿಯಲ್ಲಿ ಚೆಂಡನ್ನು ಗುರಿ ಮುಟ್ಟಿಸಿದರು. 41ನೇ ನಿಮಿಷದಲ್ಲಿ ಲೋಕೇಶ್‌ ಗೋಲು ಬಾರಿಸಿ ಸಂಭ್ರಮ ಹೆಚ್ಚಿಸಿದರು. ಇದರ ಬೆನ್ನಲ್ಲೇ (43) ಸುಭಾಷ್‌ ಮೋಡಿ ಮಾಡಿದರು. ಹೀಗಾಗಿ ತಂಡ 3–0ರ ಮುನ್ನಡೆಯೊಂದಿಗೆ ವಿರಾಮಕ್ಕೆ ಹೋಯಿತು.

ದ್ವಿತೀಯಾರ್ಧದಲ್ಲಿ ಆರ್‌ಡಬ್ಲ್ಯುಎಫ್‌ ತಂಡ ಮಿಂಚಿತು. ಈ ತಂಡದ ರೇಗನ್‌ 47 ಮತ್ತು 56ನೇ ನಿಮಿಷಗಳಲ್ಲಿ ಗೋಲು ಬಾರಿಸಿದ್ದರಿಂದ ಹಿನ್ನಡೆ ತಗ್ಗಿತು. ಆದರೆ ಇತರ ಆಟಗಾರರಿಂದ ಅವರಿಗೆ ಸೂಕ್ತ ಬೆಂಬಲ ಸಿಗಲಿಲ್ಲ.

ಡ್ರಾ ಪಂದ್ಯದಲ್ಲಿ ರಾಯಲ್ಸ್‌: ರಾಯಲ್ಸ್‌ ಎಫ್‌ಸಿ ಮತ್ತು ಯಂಗ್‌ ಚಾಲೆಂಜರ್ಸ್‌ ನಡುವಣ ‘ಎ’ ಡಿವಿಷನ್‌ ಲೀಗ್‌ ಪಂದ್ಯ 1–1 ಗೋಲುಗಳಿಂದ ಡ್ರಾ ಆಯಿತು.ರಾಯಲ್ಸ್‌ ತಂಡದ ರಘು 26ನೇ ನಿಮಿಷದಲ್ಲಿ ಗೋಲು ದಾಖಲಿಸಿದರು. 80+3ನೇ ನಿಮಿಷದಲ್ಲಿ ನಿರ್ಮಲ್‌ ಗೋಲು ಬಾರಿಸಿ ಯಂಗ್‌ ಚಾಲೆಂಜರ್ಸ್‌ ತಂಡವನ್ನು ಸೋಲಿನಿಂದ ಪಾರು ಮಾಡಿದರು.