ಮಾಂಸ ಸೇವನೆ: ಗಣೇಶನ ಜಾಹೀರಾತು ಹಿಂದಕ್ಕೆ

ಈ ಜಾಹೀರಾತನ್ನು ಆಸ್ಟ್ರೇಲಿಯಾ ಮಾಂಸ ಮತ್ತು ಜಾನುವಾರು ಸಂಘ ಕಳೆದ ತಿಂಗಳು ಬಿಡುಗಡೆ ಮಾಡಿತ್ತು. ಇದಕ್ಕೆ ಆಸ್ಟ್ರೇಲಿಯಾದ ಹಿಂದೂ ಸಮುದಾಯ ಆಕ್ರೋಶ ವ್ಯಕ್ತಪಡಿಸಿ ಜಾಹೀರಾತನ್ನು ಕೂಡಲೇ ವಾಪಸ್‌ ಪಡೆಯುವಂತೆ ಆಗ್ರಹಿಸಿತ್ತು.

’ನಿಮ್ಮ ನಂಬಿಕೆ, ಹಿನ್ನೆಲೆ ಹಾಗೂ ಗ್ರಹಿಕೆಗಳು ಏನೇ ಇರಲಿ, ಕುರಿ ಮಾಂಸದ ವಿಚಾರದಲ್ಲಿ ಮಾತ್ರ ಎಲ್ಲರೂ ಒಂದಾಗುತ್ತಾರೆ ಎಂಬುದನ್ನು ಪ್ರಚುರಪಡಿಸುವುದಷ್ಟೇ ನಮ್ಮ ಉದ್ದೇಶ’ ಎಂದು ಸಂಘದ ಮಾರುಕಟ್ಟೆ ವ್ಯವಸ್ಥಾಪಕ ಆ್ಯಂಡ್ರ್ಯೂ ಹೋವಿ ಪ್ರತಿಕ್ರಿಯಿಸಿದ್ದರು. ಇದನ್ನೇ ಬೆಂಬಲಿಸಿದ್ದ ಸಮಿತಿ, ಈ ಜಾಹೀರಾತಿನಲ್ಲಿ ಯಾವುದೇ ಲೋಪವಿಲ್ಲ’ ಎಂದಿತ್ತು. ಆದರೆ ಇದೀಗ, ಜಾಹೀರಾತು ಕಾನೂನಿಗೆ ವಿರುದ್ಧವಾಗಿರುವುದಾಗಿ ಹೇಳುವ ಮೂಲಕ ತನ್ನ ಮಾತನ್ನು ಹಿಂದಕ್ಕೆ ಪಡೆದಿದೆ.

’ಕೂಡಲೇ ಈ ಜಾಹೀರಾತನ್ನು ವಾಪಸ್‌ ಪಡೆಯಬೇಕು ಹಾಗೂ ಎಲ್ಲಿಯೂ ಇದನ್ನು ಪ್ರಕಟಿಸಬಾರದು’ ಎಂದು ಸಮಿತಿ ಸಂಘಕ್ಕೆ ನಿರ್ದೇಶಿಸಿದೆ.