ಗಂಡನ ಚಿಕಿತ್ಸೆಗೆ ಮಗು ಮಾರಾಟ

ಪತಿಗೆ ಚಿಕಿತ್ಸೆ ಕೊಡಿಸುವುದಕ್ಕಾಗಿ ಹಾಸನದ ಮಹಿಳೆಯೊಬ್ಬರು ತನ್ನ ಮೂರು ತಿಂಗಳ ಗಂಡು ಮಗುವನ್ನು ವಾರದ ಹಿಂದೆ ₹ 22 ಸಾವಿರಕ್ಕೆ ಮಾರಾಟ ಮಾಡಿದ್ದರು. ಹಾಸನದ ರಂಗೋಲಿಹಳ್ಳದ ಗಾಯತ್ರಿ ನಾಗರಾಜ್‌ ಖರೀದಿಸಿದ್ದರು. ಮಾರಾಟ ಮಾಡಿದ ಮಹಿಳೆಯ ವಿವರ ತಿಳಿದು ಬಂದಿಲ್ಲ.

ಗಾಯತ್ರಿ ಆ ಮಗುವನ್ನು ಬೇಲೂರಿನ ಹೊಸನಗರ ಬಡಾವಣೆಯ ಮಂಜುಳಾ ದೇವರಾಜ್‌ ಅವರಿಗೆ ಮರು ಮಾರಾಟ ಮಾಡಿದರು. ನಂತರ ಈ ವಿಚಾರವನ್ನು ನಿವೃತ್ತ ನರ್ಸ್‌ ಶಾಂತಮ್ಮ ಅವರಿಗೆ ಗಾಯತ್ರಿ ತಿಳಿಸಿದ್ದು, ಮಗು ಮಾರಾಟದ ವಿಚಾರ ಹೊರಬಂದಿದೆ. ಮಹಿಳಾ ಮತ್ತು ಮಕ್ಕಳ ಅಭಿವೃದ್ಧಿ ಇಲಾಖೆ, ಜಿಲ್ಲಾ ಮಕ್ಕಳ ಸಂರಕ್ಷಣಾ ಇಲಾಖೆ, ಮಕ್ಕಳ ಸಹಾಯವಾಣಿ ಅಧಿಕಾರಿಗಳು ಮಂಜುಳಾ ಮನೆಗೆ ತೆರಳಿ ಮಗುವನ್ನು ವಶಕ್ಕೆ ಪಡೆದಿದ್ದಾರೆ.