ಚಾಮರಾಜನಗರ

ಕನ್ನಡ ಸಾಹಿತ್ಯ ಸಮ್ಮೇಳನ ವಿಫಲ

ಚುನಾವಣೆ ಸಂದರ್ಭದಲ್ಲಿ ಸಮ್ಮೇಳನ ನಡೆಸುವುದು ಬೇಕಿರಲಿಲ್ಲ. ಆದರೆ, ತರಾತುರಿಯಲ್ಲಿ ಸಮ್ಮೇಳನ ನಡೆಸಲಾಯಿತು. ಅವಿವೇಕದ ಪರಮಾವಧಿಯಿಂದ ಅದು ವಿಫಲವಾಯಿತು

ಚಾಮರಾಜನಗರ: ‘ಮೈಸೂರಿನಲ್ಲಿ ನಡೆದ 83ನೇ ಕನ್ನಡ ಸಾಹಿತ್ಯ ಸಮ್ಮೇಳನದ ಉದ್ದೇಶ ಸಂಪೂರ್ಣವಾಗಿ ವಿಫಲವಾಗಿದೆ’ ಎಂದು ಕನ್ನಡ ಚಳವಳಿ ವಾಟಾಳ್‌ ಪಕ್ಷದ ಅಧ್ಯಕ್ಷ ವಾಟಾಳ್‌ ನಾಗರಾಜ್‌ ಟೀಕಿಸಿದರು.

ನಗರದ ಜೆ.ಎಚ್. ಪಟೇಲ್‌ ಸಭಾಂಗಣದಲ್ಲಿ ಮಂಗಳವಾರ ಕರ್ನಾಟಕ ಕನ್ನಡ ರಕ್ಷಣಾ ವೇದಿಕೆಯಿಂದ ನಡೆದ ಗಡಿನಾಡ ಕನ್ನಡಿಗರ ಸಮಾವೇಶ ಉದ್ಘಾಟಿಸಿ ಅವರು ಮಾತನಾಡಿದರು.

ಚುನಾವಣೆ ಸಂದರ್ಭದಲ್ಲಿ ಸಮ್ಮೇಳನ ನಡೆಸುವುದು ಬೇಕಿರಲಿಲ್ಲ. ಆದರೆ, ತರಾತುರಿಯಲ್ಲಿ ಸಮ್ಮೇಳನ ನಡೆಸಲಾಯಿತು. ಅವಿವೇಕದ ಪರಮಾವಧಿಯಿಂದ ಅದು ವಿಫಲವಾಯಿತು ಎಂದು ಟೀಕಿಸಿದರು.

ಸಮ್ಮೇಳನದಲ್ಲಿ ಮಹದಾಯಿ, ಕಳಸಾ ಬಂಡೂರಿ, ಕಾವೇರಿ, ಮೇಕೆದಾಟು ಯೋಜನೆಗಳ ಬಗ್ಗೆ ಮಾತನಾಡಲಿಲ್ಲ. ರಾಜ್ಯದಲ್ಲಿ ಸುಮಾರು 1.5 ಕೋಟಿ ಜನ ಕನ್ನಡಿಗರು ನಿರುದ್ಯೋಗಿಗಳಾಗಿದ್ದಾರೆ. ಈ ಬಗ್ಗೆ ಚರ್ಚೆ ನಡೆಯಲಿಲ್ಲ. ಪರಭಾಷಿಕರ ದಾಳಿ ಹಾಗೂ ಪರಭಾಷೆ ಚಿತ್ರಗಳ ಹಾವಳಿಯ ಬಗ್ಗೆ ಧ್ವನಿ ಎತ್ತಲಿಲ್ಲ. ಯಾವುದಕ್ಕಾಗಿ ಸಮ್ಮೇಳನ ನಡೆಸಿದ್ದೀರಾ? ಇದರ ಪ್ರಯೋಜನವೇನು? ಎಂದು ಆಕ್ರೋಶ ವ್ಯಕ್ತಪಡಿಸಿದರು.

ಸಮ್ಮೇಳನವನ್ನು ಕೆಲವರ ತೀಟೆ ತೀರಿಸಿಕೊಳ್ಳುವುದಕ್ಕಾಗಿ ಮಾಡಲಾಗಿದೆ. ಅವರಿಗೆ ಇಷ್ಟ ಬಂದ ಹಾಗೆ ಮಾತನಾಡಿದ್ದಾರೆ. ಕಾಂಗ್ರೆಸ್‌, ಬಿಜೆಪಿ ಹಾಗೂ ಜೆಡಿಎಸ್‌ ವರಿಷ್ಠರನ್ನು ಆಹ್ವಾನಿಸಲಾಗಿದೆ. ಆದರೆ, ಕನ್ನಡ ಚಳವಳಿ ಮಾಡಿದ ಒಬ್ಬ ನಾಯಕನನ್ನು ಕೂಡ ಆಹ್ವಾನಿಸಲಿಲ್ಲ ಎಂದು ಆರೋಪಿಸಿದರು.

ಸಾಹಿತಿಗಳು ಪುಸ್ತಕ ಬರೆದು ಬಿಟ್ಟರೆ ಅವರೇನು ಚಂದ್ರಲೋಕದಿಂದ ಬಂದವರಾಗುತ್ತಾರೆಯೇ? ಕನ್ನಡಕ್ಕಾಗಿ ಅವರು ಒಂದು ಚಳವಳಿ ಮಾಡಿ ಪೊಲೀಸ್‌ ಸ್ಟೇಷನ್‌ ಮೆಟ್ಟಿಲು ಹತ್ತಲಿ ಎಂದು ಸವಾಲು ಹಾಕಿದರು.

ಸಮ್ಮೇಳನದಲ್ಲಿ ಬಹಳ ಮುಖ್ಯವಾಗಿ ಗೌರಿ ಲಂಕೇಶ್‌ ಹಾಗೂ ಎಂ.ಎಂ. ಕಲಬುರ್ಗಿ ಅವರನ್ನು ಮರೆತಿದ್ದಾರೆ. ಸಾಹಿತಿಗಳು ನಾಟಕ, ಡೋಂಗಿತನ ಪ್ರದರ್ಶಿಸುತ್ತಿದ್ದಾರೆ. ಕೇವಲ ಪ್ರಶಸ್ತಿ ಹಿಂತಿರುಗಿಸುತ್ತೇನೆ ಎನ್ನುತ್ತಾರೆ. ಇದರಿಂದ ಏನೂ ಬದಲಾಗುವುದಿಲ್ಲ. ಎಲ್ಲರೂ ಬೀದಿಗೆ ಬಂದು ಹೋರಾಟ ಮಾಡಬೇಕು ಎಂದರು.

ಬಾವುಟ ಬದಲಾವಣೆ ಬೇಡ: ಕನ್ನಡ ಬಾವುಟದ ಮಹತ್ವ ಯಾವುದೇ ಪಕ್ಷದ ನಾಯಕರು, ಸಾಹಿತಿಗಳಿಗೂ ಗೊತ್ತಿಲ್ಲ. ಬಾವುಟದಲ್ಲಿ ಬದಲಾವಣೆ ಮಾಡಬಾರದು. ಸರ್ಕಾರ ಬಾವುಟ ಸಮಿತಿ ರಚನೆ ಮಾಡಿದ್ದರೆ ಕೂಡಲೇ ರದ್ದುಪಡಿಸಬೇಕು ಎಂದು ಒತ್ತಾಯಿಸಿದರು.

ಕಾರ್ಯಕ್ರಮಕ್ಕೂ ಮೊದಲು ಹಿರಿಯ ಪತ್ರಕರ್ತ ರಾಜಶೇಖರ ಕೋಟಿ ಅವರ ನಿಧನಕ್ಕೆ ಸಂತಾಪ ಸೂಚಿಸಲಾಯಿತು. ಈ ವೇಳೆ ವಿವಿಧ ಕ್ಷೇತ್ರಗಳಲ್ಲಿ ಸೇವೆ ಸಲ್ಲಿಸಿದ ಸಾಧಕರಿಗೆ ಕನ್ನಡಶ್ರೀ ಪ್ರಶಸ್ತಿ ಪ್ರದಾನ ಮಾಡಲಾಯಿತು.

ವಾಟಾಳ್ ಸೂರ್ಯ ಸಿಂಹಾಸನ ಮಠದ ಸಿದ್ದಲಿಂಗಶಿವಾಚಾರ್ಯ ಸ್ವಾಮೀಜಿ, ಸಿದ್ದಮಲ್ಲೇಶ್ವರ ವಿರಕ್ತ ಮಠ ಚೆನ್ನಬಸವ ಸ್ವಾಮೀಜಿ, ಜಿಲ್ಲಾ ಕನ್ನಡ ಸಂಘಟನೆಗಳ ಒಕ್ಕೂಟದ ಅಧ್ಯಕ್ಷ ಶಾ. ಮುರಳಿ, ಕರ್ನಾಟಕ ಸೇನಾಪಡೆ ಅಧ್ಯಕ್ಷ ಚಾ.ರಂ. ಶ್ರೀನಿವಾಸಗೌಡ, ಜೆಎಸ್‍ಎಸ್ ಮಹಿಳಾ ಕಾಲೇಜು ಪ್ರಾಂಶುಪಾಲ ಎ.ಜಿ. ಶಿವಕುಮಾರ್, ಸಾಹಿತಿ ಸೋಮಶೇಖರ್‌ ಬಿಸಲ್ವಾಡಿ, ಗುತ್ತಿಗೆದಾರ ಕೆ.ಎಸ್. ಮಹದೇವಸ್ವಾಮಿ ಹಾಜರಿದ್ದರು.

‘ಪೇಟಕ್ಕೆ ಅವಮಾನ’
ಮೈಸೂರು ಪೇಟ ಪ್ರಭುತ್ವದ ಸಂಕೇತವಲ್ಲ. ಅದು ನಾಡು, ಭಾಷೆ, ಕನ್ನಡಿಗರ ಸಂಕೇತ. ಅದನ್ನು ನಿರಾಕರಿಸುವ ಮೂಲಕ ಸಮ್ಮೇಳನಾಧ್ಯಕ್ಷರು ಪೇಟಕ್ಕೆ ಅವಮಾನ ಮಾಡಿದ್ದಾರೆ ಎಂದು ವಾಟಾಳ್‌ ನಾಗರಾಜ್‌ ಆರೋಪಿಸಿದರು.

ಮೈಸೂರಿನ ಪೇಟ ಮಹಾರಾಜರ ದರ್ಬಾರು ಎಂದು ಹೇಳಿರುವುದು ಅವರ ಅಜ್ಞಾನ. ವಿಜ್ಞಾನಿ ಸಿ.ವಿ. ರಾಮನ್‌, ಎಂ. ವಿಶ್ವೇಶ್ವರಯ್ಯ, ಕೆಂಗಲ್‌ ಹನುಮಂತಯ್ಯ ತಲೆಯ ಮೇಲೆ ಪೇಟವಿದೆ. ಇದು ಪೇಟಕ್ಕೆ ಇರುವ ಗೌರವ. ಪೇಟದ ಗಾಂಭೀರ್ಯ, ಘನತೆಯ ಖ್ಯಾತಿ ಕರ್ನಾಟಕದಾಚೆಗೂ ಹರಡಿದೆ ಎಂದು ಹೇಳಿದರು.

ಪೇಟಕ್ಕೆ ಎಷ್ಟು ಶಕ್ತಿ, ಗೌರವ ಮತ್ತು ಮಹತ್ವವಿದೆ ಎಂದು ಜನರಿಗೆ ತಿಳಿಸುವ ಉದ್ದೇಶದಿಂದ ಡಿ. 3ರಂದು ಪೇಟ ಧರಿಸಿ ಸಾರೋಟಿನಲ್ಲಿ ಮೈಸೂರಿನ ರಸ್ತೆಗಳಲ್ಲಿ ಸಂಚರಿಸುವುದಾಗಿ ತಿಳಿಸಿದರು.

Comments
ಈ ವಿಭಾಗದಿಂದ ಇನ್ನಷ್ಟು

ಯಳಂದೂರು
ಯಳಂದೂರು ತಾಲ್ಲೂಕಿನಲ್ಲಿ ಹೆಚ್ಚು ಬಾಲ್ಯವಿವಾಹ

ಹಿಂದುಳಿದ ವರ್ಗ ಅದರಲ್ಲೂ ಉಪ್ಪಾರ ಜನಾಂಗದಲ್ಲಿ ಬಾಲ್ಯ ವಿವಾಹಗಳು ನಡೆಯುತ್ತಿವೆ. ಇದರ ನಿಯಂತ್ರಣಕ್ಕಾಗಿ ಪಿಎಂಎಸ್ಆರ್ ಸಂಸ್ಥೆ ಸೇರಿದಂತೆ ಅನೇಕ ಸಂಘ ಸಂಸ್ಥೆಗಳು, ಮಹಿಳಾ ಮತ್ತು...

13 Dec, 2017

ಚಾಮರಾಜನಗರ
ಸರ್ಕಾರದ ಸೌಲಭ್ಯ ಸದ್ಬಳಕೆ ಮಾಡಿಕೊಳ್ಳಿ

ಸುಸಜ್ಜಿತವಾಗಿ ವಸತಿ ಶಾಲಾ ಕಟ್ಟಡ ನಿರ್ಮಿಸುವ ಜತೆಗೆ, ಯಾವುದೇ ಲೋಪವಾಗದಂತೆ ಕಾಮಗಾರಿ ಕೈಗೊಳ್ಳಬೇಕು

13 Dec, 2017
ತಂಪುಪಾನೀಯ ಮೊರೆ ಹೋದ ಜನರು

ಚಾಮರಾಜ ನಗರ
ತಂಪುಪಾನೀಯ ಮೊರೆ ಹೋದ ಜನರು

12 Dec, 2017

ಗುಂಡ್ಲುಪೇಟೆ
ಕಾಡುಹಂದಿ ದಾಳಿ: ಟೊಮೆಟೊ ಬೆಳೆ ನಾಶ

‘ಈ ಭಾಗದಲ್ಲಿ ಕಾಡುಹಂದಿಗಳ ಹಾವಳಿ ಹೆಚ್ಚಾಗುತ್ತಿದೆ. ಜಮೀನುಗಳಿಗೆ ತೆರಳಲು ಭಯಪಡುವಂತಾಗಿದೆ. ಕಾಡು ಹಂದಿಗಳು ಹಿಂಡುಹಿಂಡಾಗಿ ಜಮೀನಿಗೆ ದಾಳಿ ನಡೆಸುತ್ತಿವೆ

12 Dec, 2017

ಚಾಮರಾಜನಗರ
‘ನಿರಂಜನಮೂರ್ತಿಗೆ ಬಿಜೆಪಿ ಬೆಂಬಲ’

‘18 ವರ್ಷಗಳಿಂದ ಕ್ಷೇತ್ರವನ್ನು ಪ್ರತಿನಿಧಿಸುತ್ತಿರುವ ಸದಸ್ಯರು ಶಿಕ್ಷಣಕ್ಕೆ ಕ್ಷೇತ್ರಕ್ಕೆ ಸಂಬಂಧಿಸಿದವರಲ್ಲ. ಅವರಿಂದ ಶಿಕ್ಷಕರಿಗೆ ಯಾವ ಉಪಯೋಗವೂ ಆಗಿಲ್ಲ.

12 Dec, 2017