ನಾಳೆ ಹಿರಿಯೂರಿಗೆ ಸಿದ್ದರಾಮಯ್ಯ: ಗರಿಗೆದರಿದ ಹುಮ್ಮಸ್ಸು

ವಾಣಿ ವಿಲಾಸ ಜಲಾಶಯದಿಂದ ನಗರದ ಜನತೆಗೆ ₹ 43 ಕೋಟಿ ವೆಚ್ಚದಲ್ಲಿ ಪೂರ್ಣಗೊಳಿಸಿರುವ ಪೈಪ್‌ಲೈನ್ ಮೂಲಕ ಕುಡಿಯುವ ನೀರು ಪೂರೈಕೆ ಮಾಡುವ ಯೋಜನೆ, ಅಲ್ಪ ಸಂಖ್ಯಾತರ ಇಲಾಖೆಯ ₹ 25 ಕೋಟಿ ವೆಚ್ಚದ ಕಾಮಗಾರಿ, ₹ 42 ಕೋಟಿ ವೆಚ್ಚದ ವಾಣಿ ವಿಲಾಸ ಜಲಾಶಯ ಉಪ ವಿಭಾಗದ ಕಾಮಗಾರಿ, ₹ 16 ಕೋಟಿ ವೆಚ್ಚದಲ್ಲಿ ಸಣ್ಣ ನೀರಾವರಿ ಇಲಾಖೆ ನಿರ್ಮಿಸಿರುವ ಚೆಕ್ ಡ್ಯಾಂಗಳು, ₹ 36 ಕೋಟಿ ವೆಚ್ಚದಲ್ಲಿ ನಿರ್ಮಿಸಿರುವ ಗಣ್ಯರ ಪ್ರವಾಸಿ ಮಂದಿರ ಕಟ್ಟಡವನ್ನು ಮುಖ್ಯಮಂತ್ರಿ ಉದ್ಘಾಟಿಸಲಿದ್ದಾರೆ.

ಭದ್ರಾ ಮೇಲ್ದಂಡೆ ಯೋಜನೆ ಕಾಮಗಾರಿ ಪೂರ್ಣಗೊಳಿಸಲು ₹ 448 ಕೋಟಿ ಬಿಡುಗಡೆ ಮಾಡುತ್ತಿರುವ ವಿಚಾರ ಚುನಾವಣೆ ಹತ್ತಿರ ಬಂದ ಸಂದರ್ಭದಲ್ಲಿ ಕಾಂಗ್ರೆಸ್ ನಾಯಕರಿಗೆ ಪ್ರಚಾರದ ದೊಡ್ಡ ವಿಷಯವಾಗಲಿದೆ. ಜತೆಗೆ ಕುರುಬ, ಕುಂಚಿಟಿಗ, ಬಲಿಜ, ಈಡಿಗ, ಮಡಿವಾಳ, ಸವಿತಾ ಸಮಾಜ, ಕುಂಬಾರ, ಮುಸ್ಲಿಮರ ಶಾದಿ ಮಹಲ್‌ಗಳ ನಿರ್ಮಾಣಕ್ಕೆ ಶಂಕುಸ್ಥಾಪನೆ ನೆರವೇರಿಸುವ ಕಾರಣ ಈ ಸಮುದಾಯಗಳ ಜನರು ಹೆಚ್ಚು ಸೇರುವ ನಿರೀಕ್ಷೆ ಸಂಘಟಕರಲ್ಲಿದೆ. ದಲಿತರಿಗೆ ಪ್ರೊ.ಕೃಷ್ಣಪ್ಪ ಸ್ಮಾರಕ ಸಮುದಾಯ ಭವನ, ದೇವರಾಜ ಅರಸು ಸಮುದಾಯ ಭವನಗಳಿಗೂ ಭೂಮಿ ಪೂಜೆ ನಡೆಯಲಿದೆ.

ಆತಂಕ: ಹೊಳಲ್ಕೆರೆ, ಚಳ್ಳಕೆರೆ ನಗರಗಳ ಕಾರ್ಯಕ್ರಮ ಮುಗಿಸಿಕೊಂಡು ಮುಖ್ಯಮಂತ್ರಿ ಹಿರಿಯೂರಿಗೆ ಬರುವುದು 4 ಗಂಟೆಗಿಂತ ತಡವಾದರೆ wಹೇಗೆ ಎಂಬ ಚಿಂತೆ ಸ್ಥಳೀಯ ಶಾಸಕ ಡಿ. ಸುಧಾಕರ್ ಹಾಗೂ ಪಕ್ಷದ ಮುಖಂಡರನ್ನು ಕಾಡುತ್ತಿದೆ. ಸಂಜೆ 6ಕ್ಕೆ ಕತ್ತಲಾಗುವುದರ ಜತೆಗೆ ಒಂದು ವಾರದಿಂದ ಹೆಚ್ಚಿರುವ ಚಳಿಯಿಂದಾಗಿ ಸಮಾರಂಭಕ್ಕೆ ಬರುವ ಜನ ಬೇಗ ಹೋದರೇನು ಗತಿ ಎಂಬ ಆತಂಕವಿದೆ.