ಅನಿರೀಕ್ಷಿತವಲ್ಲ

‘ನ್ಯಾಯಂಗ ಕ್ರಿಯಾಶೀಲತೆ’ಯ  (Judicial activism) ಬಗ್ಗೆ ಕಾರ್ಯಾಂಗ ಕಂಗಾಲಾದ ಪ್ರಸಂಗಗಳನ್ನು ಈ ಹಿಂದೆ ಕಂಡಿದ್ದೇವೆ. ಆದರೀಗ ನ್ಯಾಯಾಂಗದ ಆಂಶಿಕ ‘ಜಾಗೃತಿ’, ನ್ಯಾಯ ವ್ಯವಸ್ಥೆಯನ್ನೇ ಪೇಚಿಗೆ ಸಿಲುಕಿಸಿರುವುದು ವಿಚಿತ್ರ ಬೆಳವಣಿಗೆ. ಕೊಕ್ಕೆಯಿಂದಲೋ ಬಿಕ್ಕೆಯಿಂದಲೋ ಸ್ವಾರ್ಥ ಸಾಧಿಸಿಕೊಳ್ಳುವುದು ರಾಜಕೀಯದಲ್ಲಿ ಚಿರಪರಿಚಿತ ಸಂಗತಿ. ಅದು ನ್ಯಾಯಾಂಗದ ಮೇಲೂ ಪ್ರಯೋಗವಾಗುತ್ತಿರಬಹುದೇ ಎಂಬ ಸಂದೇಹ ತರಿಸುವಂಥ ನ್ಯಾಯನಿರ್ಣಯಗಳು ಇತ್ತೀಚಿನ ದಿನಗಳಲ್ಲಿ ಬಂದಿದ್ದವು. ಅದಕ್ಕೆ ಪಂಜು ಹಿಡಿಯುವ ಕೆಲಸವನ್ನು ನಾಲ್ವರು ಹಿರಿಯ ನ್ಯಾಯಮೂರ್ತಿಗಳು ಮಾಡಿದ್ದಾರೆ.

ಕಾರ್ಯಾಂಗದ ಅವ್ಯವಹಾರಗಳನ್ನು, ಅದರಲ್ಲಿದ್ದುಕೊಂಡೇ ಬಯಲಿಗೆಳೆಯುತ್ತಿದ್ದವರನ್ನು ಅನ್ಯಾಯದ ವಿರುದ್ಧ ಹೋರಾಡುವವರು (whistle blowers) ಎನ್ನಲಾಗುತ್ತಿತ್ತು. ಈಗಲಾದರೋ, ನ್ಯಾಯಮೂರ್ತಿಗಳು ಕಹಳೆಯನ್ನೇ ಊದಿದ್ದಾರೆ! ಎಚ್ಚೆತ್ತುಕೊಳ್ಳಬೇಕಾದ್ದು ನ್ಯಾಯಾಂಗವಲ್ಲ, ಕಾರ್ಯಾಂಗ-ಶಾಸಕಾಂಗಗಳು ಮತ್ತು ಅದನ್ನು ಉಂಟುಮಾಡುವ ಚುನಾವಣಾ ವ್ಯವಸ್ಥೆ.