ಡೊಕ್ಲಾಂನಲ್ಲಿ ಚೀನಾ ಮೂಲಸೌಕರ್ಯ ಅಭಿವೃದ್ಧಿ ತಾತ್ಕಾಲಿಕ: ಬಿಪಿನ್ ರಾವತ್

‘ಡೊಕ್ಲಾಂನ ಒಂದು ಪ್ರದೇಶದಲ್ಲಿ ಚೀನಾ ಸೈನಿಕರು ಇರುವುದು ನಿಜ. ಆದರೂ ನಾವು ಆರಂಭದಲ್ಲಿ ನೋಡಿದಾಗ ಇದ್ದಷ್ಟು ಸಂಖ್ಯೆಯಲ್ಲಿ ಈಗಿಲ್ಲ. ಅವರು ಅಲ್ಲಿ ಕೆಲ ಮೂಲಸೌಕರ್ಯ ಅಭಿವೃದ್ಧಿ ಚಟುವಟಿಕೆ ಹಮ್ಮಿಕೊಂಡಿದ್ದುದು ಹೌದು. ಅದು ತಾತ್ಕಾಲಿಕ’ ಎಂದು ರಾವತ್ ಹೇಳಿದ್ದಾರೆ.

ಡೊಕ್ಲಾಂನ ಉತ್ತರ ಭಾಗದ ಮೇಲೆ ಹಿಡಿತ ಸಾಧಿಸಲು ಚೀನಾ ಸೇನೆ ಯತ್ನಿಸುತ್ತಿದೆ ಎಂಬ ಮಾಧ್ಯಮಗಳ ವರದಿಗೆ ರಾವತ್ ಅವರು ಈ ಸ್ಪಷ್ಟನೆ ನೀಡಿದ್ದಾರೆ. ಡೊಕ್ಲಾಂನಲ್ಲಿ ಚೀನಾ ಸೇನೆ ಮೂಲಸೌಕರ್ಯ ಅಭಿವೃದ್ಧಿಗೊಳಿಸಲು ಮುಂದಾಗಿದೆ ಎಂದು ಮಾಧ್ಯಮಗಳಲ್ಲಿ ಇತ್ತೀಚೆಗೆ ವರದಿಯಾಗಿತ್ತು.

ಆದಾಗ್ಯೂ, ಡೊಕ್ಲಾಂ ಪ್ರದೇಶದ ಮೇಲೆ ಹಿಡಿತ ಸಾಧಿಸಲು ಚೀನಾ ಸೇನೆ ಮುಂದಾದಲ್ಲಿ ಅದನ್ನು ಎದುರಿಸಲು ಭಾರತೀಯ ಸೇನೆ ಸಿದ್ಧವಿದೆ ಎಂದು ರಾವತ್ ಹೇಳಿದ್ದಾರೆ.