ತೆರಿಗೆ ಹೊರೆ ತಗ್ಗಿಸಿದ ಮಂಡಳಿ

ಜಿಎಸ್‌ಟಿ: 29 ಸರಕು, 54 ಸೇವೆ ಅಗ್ಗ

ಕೇಂದ್ರ ಹಣಕಾಸು ಸಚಿವ ಅರುಣ್‌ ಜೇಟ್ಲಿ ಅಧ್ಯಕ್ಷತೆಯಲ್ಲಿ ನಡೆದ ಮಂಡಳಿಯ 25ನೇ ಸಭೆಯಲ್ಲಿ 29 ಕೈ ಉತ್ಪನ್ನಗಳ ಮೇಲಿನ ತೆರಿಗೆಯನ್ನು ಶೂನ್ಯಕ್ಕೆ ಇಳಿಸಲಾಗಿದೆ. ಕೆಲ ಕೃಷಿ ಉತ್ಪನ್ನಗಳೂ ಸೇರಿದಂತೆ 54 ಸೇವೆಗಳ ಮೇಲಿನ ತೆರಿಗೆ ಹೊರೆಯನ್ನೂ ತಗ್ಗಿಸಲಾಗಿದೆ.

ಜಿಎಸ್‌ಟಿ: 29 ಸರಕು, 54 ಸೇವೆ ಅಗ್ಗ

ನವದೆಹಲಿ: ದೇಶದಾದ್ಯಂತ ಜಾರಿಗೆ ಬಂದಿರುವ ಸಮಗ್ರ ಪರೋಕ್ಷ ತೆರಿಗೆ ವ್ಯವಸ್ಥೆಯಾಗಿರುವ ಸರಕು ಮತ್ತು ಸೇವಾ ತೆರಿಗೆಗಳಲ್ಲಿ ‘ಜಿಎಸ್‌ಟಿ ಮಂಡಳಿ’ಯು ಗುರುವಾರ ವ್ಯಾಪಕ ಬದಲಾವಣೆಗಳನ್ನು ಮಾಡಿದೆ.

ಮಿಠಾಯಿ, ಜೈವಿಕ ಡೀಸೆಲ್‌ ಒಳಗೊಂಡಂತೆ 29 ಸರಕುಗಳ ಮೇಲಿನ ತೆರಿಗೆ ಹೊರೆ ತಗ್ಗಿಸಲಾಗಿದೆ. ಜಾಬ್‌ ವರ್ಕ್ಸ್‌, ಟೇಲರಿಂಗ್‌ ಸೇವೆ, ಪಾರ್ಕ್‌ಗಳ ಪ್ರವೇಶ ಶುಲ್ಕ ಒಳಗೊಂಡಂತೆ 54 ಬಗೆಯ ಸೇವೆಗಳ ಮೇಲಿನ ತೆರಿಗೆ ದರವನ್ನೂ ಕಡಿಮೆ ಮಾಡಲಾಗಿದೆ.

ಬಳಸಿದ ಮಧ್ಯಮ, ದೊಡ್ಡ ಗಾತ್ರ ಮತ್ತು ಸ್ಪೋರ್ಟ್ಸ್‌ ಯುಟಿಲಿಟಿ ವೆಹಿಕಲ್‌ಗಳ (ಎಸ್‌ಯುವಿ) ಮೇಲಿನ ದರವನ್ನು ಶೇ 28 ರಿಂದ ಶೇ 18ಕ್ಕೆ ಇಳಿಸಲಾಗಿದೆ. ಹಳೆಯ ಕಾರುಗಳ ಮೇಲಿನ ದರವನ್ನು ಶೇ 12ಕ್ಕೆ ತಗ್ಗಿಸಲಾಗಿದೆ. ವಜ್ರ ಮತ್ತು ಅಮೂಲ್ಯ ಹರಳುಗಳ ಮೇಲಿನ ದರವನ್ನು ಶೇ 3 ರಿಂದ ಶೇ 0.25ಕ್ಕೆ ಇಳಿಸಲಾಗಿದೆ. ನೀರಾವರಿ ಸಲಕರಣೆ, ಮದರಂಗಿ, ಖಾಸಗಿಯವರು ಪೂರೈಸುವ ಎಲ್‌ಪಿಜಿ ಮೇಲಿನ ದರಗಳೂ ಕಡಿತಗೊಂಡಿವೆ.

ರಿಟರ್ನ್‌ ಸಲ್ಲಿಕೆ ಸರಳ: ಜಿಎಸ್‌ಟಿ ರಿಟರ್ನ್‌ ಸಲ್ಲಿಸುವ ಪ್ರಕ್ರಿಯೆಯನ್ನು ಸರಳಗೊಳಿಸಿ ಸಣ್ಣ ವರ್ತಕರ ಮೇಲಿನ ತೆರಿಗೆ ಪಾವತಿ ಹೊರೆ ತಗ್ಗಿಸುವ ನಿಟ್ಟಿನಲ್ಲಿ ಕೈಗೊಳ್ಳಬೇಕಾದ ಕ್ರಮಗಳ ಬಗ್ಗೆಯೂ ಸಭೆ ವಿವರವಾಗಿ ಚರ್ಚಿಸಿತು. ಪ್ರತಿ ತಿಂಗಳೂ ಒಂದು ರಿಟರ್ನ್‌ ಸಲ್ಲಿಸಲು ಅವಕಾಶ ಮಾಡಿಕೊಡಲು ನಿರ್ಧರಿಸಲಾಗಿದೆ.

ಸಭೆಯಲ್ಲಿ ಭಾಗವಹಿಸಿದ್ದ ಇನ್ಫೊಸಿಸ್‌ನ ಕಾರ್ಯನಿರ್ವಾಹಕಯೇತರ ಅಧ್ಯಕ್ಷ ನಂದನ್‌ ನಿಲೇಕಣಿ ಅವರು ರಿಟರ್ನ್‌ ಸಲ್ಲಿಕೆ ಪ್ರಕ್ರಿಯೆ ಸರಳಗೊಳಿಸುವ ಬಗ್ಗೆ ಮಾಹಿತಿ ನೀಡಿದರು. ಹೊಸ ಪ್ರಕ್ರಿಯೆಯನ್ನು ಮಂಡಳಿಯ ಮುಂದಿನ ಸಭೆಯಲ್ಲಿ ಅಂತಿಮಗೊಳಿಸಲು ನಿರ್ಧರಿಸಲಾಗಿದೆ.

ಕೇಂದ್ರ ಹಣಕಾಸು ಸಚಿವ ಅರುಣ್‌ ಜೇಟ್ಲಿ ಅಧ್ಯಕ್ಷತೆಯಲ್ಲಿ ನಡೆದ ಮಂಡಳಿಯ 25ನೇ ಸಭೆಯಲ್ಲಿ 29 ಕೈ ಉತ್ಪನ್ನಗಳ ಮೇಲಿನ ತೆರಿಗೆಯನ್ನು ಶೂನ್ಯಕ್ಕೆ ಇಳಿಸಲಾಗಿದೆ. ಹೊಸ ದರಗಳು ಇದೇ 25 ರಿಂದ ಜಾರಿಗೆ ಬರಲಿವೆ.

ಫೆ. 1ರಿಂದ ಇ–ವೇ ಬಿಲ್‌:  ‘₹ 50 ಸಾವಿರಕ್ಕಿಂತ ಹೆಚ್ಚಿನ ಮೊತ್ತದ ಸರಕುಗಳ ಅಂತರರಾಜ್ಯ ಸಾಗಾಣಿಕೆಯಲ್ಲಿ ವಿದ್ಯುನ್ಮಾನ ವೇಬಿಲ್‌ (ಇ–ವೇ ಬಿಲ್) ವ್ಯವಸ್ಥೆಯನ್ನು ಫೆಬ್ರುವರಿ 1ರಿಂದ ದೇಶದಾದ್ಯಂತ ಜಾರಿಗೆ ತರಲಾಗುವುದು. ಇದೇ 25ರವರೆಗೆ ಈ ವ್ಯವಸ್ಥೆಯ ಪ್ರಾಯೋಗಿಕ ಪರೀಕ್ಷೆ ನಡೆಯಲಿದೆ.

ಇದರಿಂದ ವಹಿವಾಟುದಾರರ ತೆರಿಗೆ ತಪ್ಪಿಸುವ ಪ್ರವೃತ್ತಿಯು ಸಂಪೂರ್ಣವಾಗಿ ಕೊನೆಗೊಳ್ಳಲಿದೆ. ಈ ವ್ಯವಸ್ಥೆ ಜಾರಿಗೆ ತರಲು ಇದುವರೆಗೆ 15 ರಾಜ್ಯ ಸರ್ಕಾರಗಳು ಸಮ್ಮತಿಸಿವೆ.

ಒಂದೊಮ್ಮೆ ಇ–ವೇ ಬಿಲ್‌ ಜಾರಿಗೆ ಬರುತ್ತಿದ್ದಂತೆ ತೆರಿಗೆ ತಪ್ಪಿಸುವುದು ಕಠಿಣವಾಗಲಿದೆ. ₹ 50 ಸಾವಿರಕ್ಕಿಂತ ಹೆಚ್ಚಿನ ಮೊತ್ತದ ಸರಕುಗಳ ಸಾಗಾಣಿಕೆ ವಿವರಗಳೆಲ್ಲ ಸರ್ಕಾರದ ಬಳಿ ಲಭ್ಯ ಇರಲಿದೆ.  ಸರಕುಗಳ ಪೂರೈಕೆದಾರ ಮತ್ತು ಖರೀದಿದಾರರು ತೆರಿಗೆ ರಿಟರ್ನ್ ಸಲ್ಲಿಸದಿದ್ದರೆ ಈ ವಹಿವಾಟಿನ ವಿವರಗಳು ತಾಳೆ ಆಗುವುದಿಲ್ಲ. ತೆರಿಗೆ ತಪ್ಪಿಸಲು ಯತ್ನಿಸಿದವರನ್ನು ಸುಲಭವಾಗಿ ಗುರುತಿಸಲು ಇದರಿಂದ ಸಾಧ್ಯವಾಗಲಿದೆ.

‘ಮಂಡಳಿಯ ಮುಂದಿನ ಸಭೆಯಲ್ಲಿ ಕಚ್ಚಾ ತೈಲ, ನೈಸರ್ಗಿಕ ಅನಿಲ, ಪೆಟ್ರೋಲ್‌, ಡೀಸೆಲ್‌ ಮತ್ತು ರಿಯಲ್‌ ಎಸ್ಟೇಟ್‌ಗಳನ್ನು ಜಿಎಸ್‌ಟಿ ವ್ಯಾಪ್ತಿಗೆ ತರುವುದನ್ನು ಚರ್ಚಿಸಲಿದೆ. ರಾಜಿ ತೆರಿಗೆ ಸೌಲಭ್ಯದಡಿ ಕೇವಲ ₹ 307 ಕೋಟಿ ಸಂಗ್ರಹವಾಗಿದೆ. ಸಮಗ್ರ ಜಿಎಸ್‌ಟಿಯಡಿ ಸಂಗ್ರಹವಾಗಿರುವ ₹ 35 ಸಾವಿರ ಕೋಟಿಗಳನ್ನು ಕೇಂದ್ರ ಮತ್ತು ರಾಜ್ಯಗಳ ಮಧ್ಯೆ ಹಂಚಿಕೆ ಮಾಡಲಾಗುವುದು’ ಎಂದು ಜೇಟ್ಲಿ ಹೇಳಿದರು.

Comments
ಈ ವಿಭಾಗದಿಂದ ಇನ್ನಷ್ಟು
ಜಿತೊ: ನವೋದ್ಯಮ ನೆರವಿಗೆ ವೇದಿಕೆ

ಬೆಂಗಳೂರು
ಜಿತೊ: ನವೋದ್ಯಮ ನೆರವಿಗೆ ವೇದಿಕೆ

28 May, 2018
ಪೆಟ್ರೋಲ್‌, ಡೀಸೆಲ್‌ ದರ ಏರಿಕೆ

ಸತತ 14ನೇ ದಿನ
ಪೆಟ್ರೋಲ್‌, ಡೀಸೆಲ್‌ ದರ ಏರಿಕೆ

28 May, 2018
ಇಪಿಎಫ್‌ಒ: ಆಡಳಿತ ವೆಚ್ಚ ಕಡಿತ

ಅಧಿಸೂಚನೆ ಪ್ರಕಟ
ಇಪಿಎಫ್‌ಒ: ಆಡಳಿತ ವೆಚ್ಚ ಕಡಿತ

28 May, 2018
ಜೇನು ಸಾಕಣೆ ಮಾಹಿತಿಗೆ ‘ಮಧು ಮಿತ್ರ’ ಆ್ಯಪ್‌

ಶಿರಸಿ
ಜೇನು ಸಾಕಣೆ ಮಾಹಿತಿಗೆ ‘ಮಧು ಮಿತ್ರ’ ಆ್ಯಪ್‌

28 May, 2018

ವಿಜ್ಞಾನ ಲೋಕದಿಂದ
ದ್ರಾವಿಡ ಭಾಷಾ ಕುಟುಂಬಕ್ಕೆ 4,500 ವರ್ಷಗಳು!

ವೈವಿಧ್ಯತೆಯಲ್ಲಿ ಶ್ರೀಮಂತವೆನಿಸಿದ ತಾಣವಾದ ಭಾರತದಲ್ಲಿ ಹಲವಾರು ಬಗೆಯ ಸಂಸ್ಕೃತಿಗಳನ್ನು ನಾವು ಕಾಣಬಹುದು. ಇಲ್ಲಿ ಮಾತನಾಡುವ ಹೆಚ್ಚಿನ ಸಂಖ್ಯೆಯ ಭಾಷೆಗಳೇ ಇದಕ್ಕೆ ಒಂದು ಪ್ರಮಾಣಪತ್ರವಾಗಿದೆ.

28 May, 2018