ಮೌಲ್ಯಾಧಾರಿತ ರಾಜಕಾರಣದ ಧೀಮಂತ ನಾಯಕ: ಬಿ.ಜಿ.ಬಣಕಾರ

ರಾಜ್ಯ ರಾಜಕಾರಣದಲ್ಲಿಯೇ ಛಾಪು ಮೂಡಿಸಿದ್ದ ಬಿ.ಜಿ.ಬಣಕಾರ ಅವರು ಬಿ.ಎ. ಎಲ್ಎಲ್‌ಬಿ ಪದವಿ ಮುಗಿಸಿ 1955ರಲ್ಲಿ ವಕೀಲಿ ವೃತ್ತಿ ಆರಂಭಿಸಿದರು. ಗಂಭೀರ ಭಾವ ಮುದ್ರೆಯ ಮುಖ, ಸಾತ್ವಿಕ ತೇಜಸ್ಸು ಹೊಂದಿದ್ದ ಅವರು ಅಲ್ಪ ಅವಧಿ ಯಲ್ಲಿಯೇ ಜನಾನುರಾಗಿ ಎನಿಸಿದರು. ಗ್ರಾಮ ಪಂಚಾಯ್ತಿ ಮೂಲಕ ಚುನಾವಣಾ ರಾಜಕೀಯಕ್ಕೆ ಧುಮುಕಿದ ಅವರು ನಂತರ ಮೂರು ಬಾರಿ ಶಾಸಕರಾದರು.

1976ರಲ್ಲಿ ಡಿ.ದೇವರಾಜ ಅರಸು ಸಂಪುಟದಲ್ಲಿ ಪಶು ಸಂಗೋಪನಾ ಸಚಿವರಾಗಿ ಕರ್ತವ್ಯ ನಿರ್ವಹಿಸಿದರು. 1985ರಲ್ಲಿ 3ನೇ ಬಾರಿಗೆ ಜನತಾ ಪಕ್ಷದಿಂದ ಆರಿಸಿ ಬಂದು ವಿಧಾನಸಭಾ ಅಧ್ಯಕ್ಷರಾಗಿ ಅವಿರೋಧವಾಗಿ ಆಯ್ಕೆಯಾದರು.

ನಂತರದ ಚುನಾವಣೆಯಲ್ಲಿ ಸಕ್ರಿಯ ರಾಜಕಾರಣದಿಂದ ನಿವೃತ್ತಿ ಪಡೆದ ಬಿ.ಜಿ.ಬಣಕಾರ ಅವರು ಸಾಮಾಜಿಕ ಚಟುವಟಿಕೆಗಳಲ್ಲಿ ತಮ್ಮನ್ನು ತೊಡಗಿಸಿಕೊಂಡಿದ್ದರು. ಬಿ.ಜಿ.ಬಣಕಾರ ಪ್ರತಿಷ್ಠಾನದ ಮೂಲಕ ಪ್ರತಿ ವರ್ಷ ಅನೇಕ ಕಾರ್ಯಕ್ರಮಗಳನ್ನು ನಡೆಸುತ್ತಿದ್ದರು. ಪ್ರತಿಷ್ಠಾನದ ಮೂಲಕ ಪ್ರತಿಭಾವಂತ ವಿದ್ಯಾರ್ಥಿಗಳು, ವಕೀಲರು, ನೌಕರರು ಹಾಗೂ ಪತ್ರಕರ್ತರನ್ನು ಸನ್ಮಾನಿಸುವ ಪರಿಪಾಠವನ್ನು ಪ್ರತಿ ವರ್ಷ ತಪ್ಪದೇ ನಡೆಸಿಕೊಂಡು ಬರುತ್ತಿದ್ದರು.

ಬಿ.ಜಿ.ಬಣಕಾರ ರಾಜಕೀಯ ನಿವೃತ್ತಿಯ ನಂತರ ಅವರ ಪುತ್ರ ಯು.ಬಿ.ಬಣಕಾರ 2ನೇ ಬಾರಿ ಶಾಸಕರಾಗಿದ್ದು, ಸಕ್ರಿಯ ರಾಜಕಾರಣದಲ್ಲಿ ಉನ್ನತ ಸ್ಥಾನದಲ್ಲಿದ್ದಾರೆ. ಬಿ.ಜಿ.ಬಣಕಾರ ನಿಧನದಿಂದ ತಾಲ್ಲೂಕಿನಲ್ಲಿ ಶೋಕದ ಕಳೆ ಹರಡಿದೆ.