ನ್ಯಾಯಾಂಗ ಉತ್ತರದಾಯಿ ಮಸೂದೆಗೆ ಮರುಜೀವ ನೀಡಿ

ವಾಗ್ದಂಡನೆ ವಿಧಿಸುವ ಅಧಿಕಾರ ಸಂಸತ್‌ಗೆ ಸೇರಿದ್ದು. ನ್ಯಾಯಮೂರ್ತಿಗಳನ್ನು ಅಧಿಕಾರದಿಂದ ಕೆಳಗಿಳಿಸುವುದು ಸಲೀಸಲ್ಲ. ಅನೇಕ ರಕ್ಷಣಾತ್ಮಕ ಕ್ರಮಗಳನ್ನು ಸಂವಿಧಾನ ಒದಗಿಸಿದೆ. ಹೀಗಾಗಿ ವಾಗ್ದಂಡನೆಗೆ, ನ್ಯಾಯಮೂರ್ತಿಗಳ ದುರ್ವರ್ತನೆ ಸಾಬೀತಾಗಿರಬೇಕು ಎಂದು ಸಂವಿಧಾನ ಹೇಳುತ್ತದೆ. ಇದಕ್ಕೆ ಸಂಬಂಧಿಸಿದಂತೆ ಸಿಜೆಐ ಅವರ ದುರ್ವರ್ತನೆ ಎನಿಸಬಹುದಾದ ವಿಚಾರಗಳನ್ನು ಪ್ರತಿಪಕ್ಷಗಳು ಪ್ರಸ್ತಾಪಿಸಿವೆ. ಸೂಕ್ಷ್ಮ ಪ್ರಕರಣಗಳ ವಿಚಾರಣೆಗಾಗಿ ಪೀಠಗಳ ನೇಮಕ ಹಾಗೂ ಕರ್ತವ್ಯ ಹಂಚಿಕೆ ಕುರಿತಂತೆ ನ್ಯಾಯಾಲಯವು ಹಿಂದಿನಿಂದ ಪಾಲಿಸಿಕೊಂಡು ಬಂದ ನಿಯಮಗಳನ್ನು ಮುರಿಯಲಾಗಿದೆ ಎಂಬಂಥ ದೂರು ಇವುಗಳಲ್ಲಿ ಮುಖ್ಯವಾದದ್ದು. ಈ ಬಗ್ಗೆ ಜನವರಿ ತಿಂಗಳಲ್ಲಿ ಸುಪ್ರೀಂ ಕೋರ್ಟ್‌ನ ನಾಲ್ವರು ಅತ್ಯಂತ ಹಿರಿಯ ನ್ಯಾಯಮೂರ್ತಿಗಳು ಪತ್ರಿಕಾಗೋಷ್ಠಿಯಲ್ಲಿ ಮಾತನಾಡಿದ್ದು ಹಿಂದೆಂದೂ ನಡೆದಿರದಂತಹ ವಿದ್ಯಮಾನವಾಗಿತ್ತು. ಈ ಬಗ್ಗೆ ಸಿಜೆಐಗೆ ಮನವರಿಕೆ ಮಾಡಿಕೊಡುವ ಪ್ರಯತ್ನಗಳು ವಿಫಲವಾದ ನಂತರ ಅನಿವಾರ್ಯವಾಗಿ ದೇಶದ ಜನರ ಮುಂದೆ ಬಂದಿದ್ದಾಗಿ ಈ ನ್ಯಾಯಮೂರ್ತಿಗಳು ಹೇಳಿದ್ದರು. ಸಹೋದ್ಯೋಗಿ ನ್ಯಾಯಮೂರ್ತಿಗಳ ಕಾಳಜಿಗಳನ್ನು ಸೂಕ್ತವಾಗಿ ನಿರ್ವಹಿಸುವಲ್ಲಿ ಸಿಜೆಐ ವಿಫಲವಾಗಿರುವುದು ಸ್ಪಷ್ಟ. ಬಿಕ್ಕಟ್ಟಿನ ಪರಿಹಾರಕ್ಕೆ ಅನೌಪಚಾರಿಕ ನೆಲೆಯಲ್ಲಿ ಸಮಾಲೋಚನಾ ವ್ಯವಸ್ಥೆ ರೂಪಿಸಿದ್ದಲ್ಲಿ ಈ ಅನಪೇಕ್ಷಿತ ಬೆಳವಣಿಗೆಗಳನ್ನು ತಡೆಗಟ್ಟಬಹುದಿತ್ತು.

ಕಾಂಗ್ರೆಸ್ ನೇತೃತ್ವದಲ್ಲಿ ಈ ವಾಗ್ದಂಡನೆ ವಿಚಾರ ಮಂಡಿತವಾಗಿರುವುದರಿಂದ ರಾಜಕೀಯ ಉದ್ದೇಶಗಳನ್ನು ಸಹಜವಾಗಿಯೇ ಆರೋಪಿಸಲಾಗುತ್ತಿದೆ. ಆದರೆ ಕಾಂಗ್ರೆಸ್‍ನ ಹಿರಿಯ ನಾಯಕರಾದ ಮನಮೋಹನ್ ಸಿಂಗ್, ಪಿ. ಚಿದಂಬಂ ಅವರು ವಾಗ್ದಂಡನೆ ವಿಧಿಸಲು ನೀಡಲಾಗಿದ್ದ ಸೂಚನೆ ಪತ್ರಕ್ಕೆ ಸಹಿ ಹಾಕಿಲ್ಲ. ಇದೇನೇ ಇರಲಿ, ಈ ವಿದ್ಯಮಾನ ಜನಸಾಮಾನ್ಯರಿಗೆ ನೀಡುವ ಸಂದೇಶ ಗಂಭೀರವಾದದ್ದು. ಸುಪ್ರೀಂ ಕೋರ್ಟ್‌ನಲ್ಲಿ ಎಲ್ಲವೂ ಸರಿ ಇಲ್ಲ ಎಂಬಂಥ ಭಾವನೆ ಮೂಡುವುದೇ ಕಳವಳಕಾರಿಯಾದದ್ದು. ಪ್ರಜಾಪ್ರಭುತ್ವದ ಆಧಾರಸ್ತಂಭವಾದ ನ್ಯಾಯಾಂಗದ ಸ್ವಾತಂತ್ರ್ಯ ಮುಖ್ಯವಾದದ್ದು. ಇದಕ್ಕೆ ನ್ಯಾಯಾಂಗವೂ ಉತ್ತರದಾಯಿಯಾಗಬೇಕು. ಕೆಲಸದ ನಿರ್ವಹಣೆಯಲ್ಲಿ ಪಾರದರ್ಶಕತೆ ಇರಬೇಕು. ಇದಕ್ಕೆ ಸಂಬಂಧಿಸಿದಂತೆ ಕಳೆದ ಅನೇಕ ವರ್ಷಗಳಿಂದ ನನೆಗುದಿಗೆ ಸಿಲುಕಿರುವ ನ್ಯಾಯಾಂಗ ಗುಣಮಟ್ಟ ಹಾಗೂ ಉತ್ತರದಾಯಿ ಮಸೂದೆಯನ್ನು ಪುನರುಜ್ಜೀವಗೊಳಿಸುವುದು ಸದ್ಯದ ಅಗತ್ಯ. ನ್ಯಾಯಾಂಗದ ಕಾರ್ಯವೈಖರಿಯಲ್ಲಿ ಆಗಬೇಕಿರುವ ಅನೇಕ ಸುಧಾರಣೆಗಳ ಬಗ್ಗೆ ಗಂಭೀರವಾದ ಚಿಂತನೆ ಅಗತ್ಯ.