ಚೆನ್ನೈ: ಅಮೋಘ ಆಟ ಆಡಿದ ಭಾರತದ ವೇಲವನ್‌ ಸೆಂಥಿಲ್‌ಕುಮಾರ್‌, ಅಮೆರಿಕದಲ್ಲಿ ನಡೆದ ಮ್ಯಾಡಿಸನ್‌ ಓಪನ್‌ ಸ್ಕ್ವಾಷ್‌ ಟೂರ್ನಿಯಲ್ಲಿ ಪ್ರಶಸ್ತಿ ಜಯಿಸಿದ್ದಾರೆ. ವೇಲವನ್‌ ಅವರು ಪಿಎಸ್‌ಎ ವಿಶ್ವ ಟೂರ್‌ನಲ್ಲಿ ಗೆದ್ದ ಚೊಚ್ಚಲ ಟ್ರೋಫಿ ಇದಾಗಿದೆ.
ಭಾನುವಾರ ನಡೆದ ಪುರುಷರ ಸಿಂಗಲ್ಸ್‌ ವಿಭಾಗದ ಫೈನಲ್‌ ಹಣಾಹಣಿಯಲ್ಲಿ ವೇಲವನ್‌ 7–11, 13–11, 12–10, 11–4ರಲ್ಲಿ ದಕ್ಷಿಣ ಆಫ್ರಿಕಾದ ಟ್ರಿಸ್ಟಾನ್‌ ಐಸೆಲ್‌ ಅವರನ್ನು ಸೋಲಿಸಿದರು. ಈ ಹೋರಾಟ 57 ನಿಮಿಷ ನಡೆಯಿತು.
ಮೊದಲ ಗೇಮ್‌ನಲ್ಲಿ ಮುಗ್ಗರಿಸಿದ ವೇಲವನ್‌, ಎರಡನೇ ಗೇಮ್‌ನಲ್ಲಿ ಎದುರಾಳಿಗೆ ತಿರುಗೇಟು ನೀಡಿದರು. ಮೂರು ಮತ್ತು ನಾಲ್ಕನೇ ಗೇಮ್‌ಗಳಲ್ಲೂ ಮೋಡಿ ಮಾಡಿದ ಭಾರತದ ಆಟಗಾರ ಸಂಭ್ರಮದ ಹೊಳೆಯಲ್ಲಿ ಮಿಂದೆದ್ದರು.
ಮೊದಲ ಸುತ್ತಿನ ಹೋರಾಟದಲ್ಲಿ ಸೆಂಥಿಲ್‌, ಸ್ಪೇನ್‌ನ ಆಟಗಾರ ಬರ್ನಾಟ್‌ ಜೆಯುಮ್‌ಗೆ ಆಘಾತ ನೀಡಿದ್ದರು. ಬರ್ನಾಟ್‌ ಅವರು ವಿಶ್ವ ಕ್ರಮಾಂಕ ಪಟ್ಟಿಯಲ್ಲಿ ಮೂರನೇ ಸ್ಥಾನ ಹೊಂದಿದ್ದರು.
ಕ್ವಾರ್ಟರ್ ಫೈನಲ್‌ನಲ್ಲಿ ಇಂಗ್ಲೆಂಡ್‌ನ ಮಾರ್ಕ್‌ ಫುಲ್ಲರ್‌ ವಿರುದ್ಧ ಗೆದ್ದಿದ್ದ ಸೆಂಥಿಲ್‌, ಸೆಮಿಫೈನಲ್‌ನಲ್ಲಿ ಭಾರತದ ಆದಿತ್ಯ ಜಗತಾಪ್‌ ಅವರನ್ನು ಸೋಲಿಸಿದ್ದರು. ವೇಲವನ್‌ ವಿಶ್ವ ರ‍್ಯಾಂಕಿಂಗ್‌ನಲ್ಲಿ 255ನೇ ಸ್ಥಾನದಲ್ಲಿದ್ದಾರೆ.
