ನವದೆಹಲಿ: ಕಾಸ್ಟಿಂಗ್ ಕೌಚ್ ಎಂಬುದು ಕಠೋರ ಸತ್ಯ. ಸಿನಿಮಾ ರಂಗದಲ್ಲಿ ಮಾತ್ರವಲ್ಲ ಅದು ಎಲ್ಲ ಕಡೆಯೂ ಇದೆ. ಸಂಸತ್ತಿನಲ್ಲಿಯೂ ಇದೆ ಎಂದು ಕಾಂಗ್ರೆಸ್ ನೇತಾರೆ ರೇಣುಕಾ ಚೌಧರಿ ಹೇಳಿದ್ದಾರೆ.
ಬಾಲಿವುಡ್ ನೃತ್ಯ ಸಂಯೋಜಕಿ ಸರೋಜ್ ಖಾನ್ ಅವರು ಕಾಸ್ಟಿಂಗ್ ಕೌಚ್ ಬಗ್ಗೆ ನೀಡಿದ ಹೇಳಿಕೆಗೆ ಮಾಜಿ ಸಂಸದೆ ರೇಣುಕಾ ಚೌಧರಿ ಈ ರೀತಿ ಪ್ರತಿಕ್ರಿಯಿಸಿದ್ದಾರೆ.
[related]
ಸಿನಿಮಾರಂಗದಲ್ಲಿ ಮಾತ್ರವಲ್ಲ, ಇದು ಎಲ್ಲ ಕ್ಷೇತ್ರದಲ್ಲಿಯೂ ನಡೆಯುತ್ತಿದೆ. ಸಂಸತ್ ಅಥವಾ ಇನ್ನುಳಿದ ಕ್ಷೇತ್ರಗಳಲ್ಲಿ ಇದು ನಡೆಯುವುದಿಲ್ಲ ಎಂದು ಅಂದುಕೊಳ್ಳಬೇಡಿ. ಇದೀಗ ಭಾರತೀಯರು ಇದರ ವಿರುದ್ಧ ದನಿಯೆತ್ತಿ #Metoo ಎಂದು ಹೇಳುವ ಸಮಯ ಬಂದಿದೆ ಎಂದು ರೇಣುಕಾ ಹೇಳಿದ್ದಾರೆ.
ಮಂಗಳವಾರ ಮುಂಬೈನಲ್ಲಿ ಸುದ್ದಿಗೋಷ್ಠಿಯೊಂದರಲ್ಲಿ ಮಾತನಾಡಿದ ಸರೋಜ್ ಖಾನ್ ಕಾಸ್ಟಿಂಗ್ ಕೌಚ್ ಅಂದರೆ ಸಿನಿಮಾರಂಗದಲ್ಲಿ ಕೆಲಸ ಮಾಡುವುದಕ್ಕಾಗಿ ಲೈಂಗಿಕ ಸಹಕಾರದ ವಿನಿಮಯ. ಇದು ಈಗ ಶುರುವಾದದ್ದು ಏನೂ ಅಲ್ಲ. ಈ ಹಿಂದಿನಿಂದಲೇ ಇದೆ. ನೀವು ಯಾಕೆ ಸಿನಿಮಾ ರಂಗವನ್ನು ಮಾತ್ರ ಟಾರ್ಗೆಟ್ ಮಾಡುತ್ತೀರಿ? ಇದೆಲ್ಲ ನಿಮಗೆ ಹೊಟ್ಟೆಗೆ ಅನ್ನ ನೀಡುತ್ತದೆಯಲ್ಲವೇ? ಅತ್ಯಾಚಾರ ಮಾಡಿ ಎಸೆಯುವುದಿಲ್ಲವಲ್ಲಾ ಎಂದು ಪ್ರಶ್ನಿಸಿದ್ದರು.